Read bura-pabir Irmiya 26 Bible Online

Irmiya 26 - bura-pabir bible

Irmiya 26

¹Təkəma tə Yehoyakim na ɓzər Yosiya ku ndzi kuthlir Yahuda,

²antə MTHLAKU pəla ali, “Mji ku thlata akwa bərniyayeri na akwa Yahuda ka si kamnyar vəngkər səli ali. Antə mwari kara thləthlata akwa bəbalər mbwar vəngkər səli ni, kara psəmnya ala ɗa shanga su tə I tsawa ala gə ni. Ga aɗiya mbilar su akwa wa.

³Nuhum akwa saka ngəni da ata psi thləma ɗa ka da zhar surharar ɗa na ɗimi ɗimi ni. Antə ma da ku tubi, I ata pali su tə I ɗəmha ata kəra ɗa kəi zhar ɗi ɗa.

⁴Pəla ala ɗa I pəla, ‘Ma giri aɗi ata psi thləm ali ka nu suayeri tə I thlipa ala giri,

⁵ka psi thləm aka naɓiyayeri natə da an mjirna tə I thlenta abbər ka da tsaktə giri wa,

⁶to I ata huzamta mbwar vəngkər səli ngəni tsu apatə I huzamta bərni Shilo, kəi vu ka bərni ni ndzi sur nggənggəla aka shanga mjir duniya.’ ”

⁷Antə pristayeri ka naɓiyayeri ka shanga mji na akwa mbwar vəngkər səli ni ku nggatə su tə I pəla.

⁸Antə təkəma tə I kuri pəla su tə MTHLAKU pəla ali ni təng pristayeri, ka naɓiyayeri ka shanga mji pungkərdzi ali ka ngkəi ra. Da akwa pəla, “Mda ata tsi nga!

⁹Kamnyar mə tə ga akwa ngkər labar abbər MTHLAKU ata huzamta mbwar vəngkər səli ngəni tsu apa su tə tsa ɓdləmta Shilo nə ri, har tə ka tsa ndzi kula mda akwa ni?” Antə shanga mji ku tsaɓəngkərdzi ali.

¹⁰Sakatə mji ol'olər Yahuda ku nggatə su na ku hara, da puɓəladzi akwa kəi kuthli ka mwari akwa mbwar vəngkər səli, ka thləthlata akwa Nyarfu na Bilən.

¹¹Antə pristayeri ka naɓiyayeri pəla aka mji ol'ola ka aka shanga mji ni abbər, “Mdə ngəni kalkal ka mdə hara alari shariyar mta, kamnyar tsa ku gari na ɗimi ata kəra bərni ni, apatə giri ku nggatə ni ka thləma giri.”

¹²Antə I pəla aka shanga kwakunayeri ka shanga mji abbər, “MTHLAKU ku thlentə ra kəi psəmnya su na mwavər na ata wutə mbwa ngəni ka bərni ngəni, apatə I ku kurtə pəla ala giri.

¹³Antə kuji ka giri pali harar giri ka giri kələngkər aka MTHLAKU, antə tsa ata zhar sənta asar ni ata kəra giri.

¹⁴Amma arna, nggədza ra akwa tsiya giri! Giri ata mzhi hara su tə giri hir ka iya.

¹⁵Su tə kalkal ka giri sənda an abbər ma giri ku tsi ra, giri ku tsi mdə na kula biku! Antə asarər ɗimikur ngəni ata ngka ata kəra giri, ka ata kəra shanga mji na akwa Urushalima. Kamnyar jirkurari, MTHLAKU an thlentə ra adzə giri kəi pəla shanga suayeri ngəni ka giri nggata.”

¹⁶Antə kwakunayeri ni kəga shanga mji ku pəla aka pristayeri ka naɓiyayeri ni abbər, “Mdə ngəni aɗi hara su na kalkal ka mdə tsi ni wa, kamnyar su tə MTHLAKU na Hyelər mburu pəla alari antə tsa pəla ala mburu daci.”

¹⁷Antə mji ol'ol laga ku thlatə ka gari aka mji na tsaptədzi ni abbər,

¹⁸“Akwa məvayeri na təramta sakatə Hezekiya an kuthlir Yahuda, naɓi laga aɗi ka thləmari Mika ahar Moresheth na ku gari ala mburu. Tsa pəla MTHLAKU na ka Duna ta Shang akwa pəla abbər, “ ‘Sihiyona ata sə hadləmtadzi ka ndzi apa vəi kukula, Urushalima ata ndzi həi tsaptsaɓa. Antə kuɓər nfwa ata sə kəla ka hartə kəra gar, natə mbwar vəngkər səli ata ni.’ ”

¹⁹Mji ol'ol ni ləkəma ka pəla, Kuthli Hezekiya ka mjir Yahuda aɗi tsi Mika wa. Ata vəyari, Kuthli Hezekiya ku thlivər ɗəffa MTHLAKU ka kiɗa abbər ka MTHLAKU kətadzə ni. Antə MTHLAKU ku zhar sənta asar tə tsa kwamta abbər tsa ata səntari ata kəra ɗa. Amma kulini mburu akwa bara pwasi asar na ola aka kəra mburu sur mburu.

²⁰Aghəla tə mji ol'ol ni ku kuri gariyir ɗa antə mdə damwa ka thləmari Uriya ku gari akwa thləma MTHLAKU. Uriya an ɓzər Shemaiya mdər Kiriyath Yeyarim. Uriya ku psəmnya abbər asar ata si ata kəra bərni ngəni tsu apatə Naɓi Irmiya ku pəla.

²¹Sakatə Kuthli Yehoyakim ka sojayeri arni ka shanga kwakunayeri ku nggatə su tə Uriya pəla, antə kuthli ni thlenta abbər ka mdə tsi Uriya. Amma Uriya ku nggata ata kəra ɗimikur tə mdə ɗəmha ata kərari, antə tsa ku hwi ləhar Masar.

²²Kuthli Yehoyakim ku thlentə Elnathlan ɓzər Akbor kəga mji damwa ahar Masar ka da ra ngkəi Uriya.

²³Antə da ku mwari ahar Masar ni ka ngkəi ni ka səntə ni aka Kuthli Yehoyakim. Antə kuthli ni ku tsi Uriya ka katsakar, ka psu mshiyirni akwa vəi kulər mji na ndzang.

²⁴Amma kamnyar tə Ahikam ɓzər Shafan ku mbwakir aka Irmiya, antə mda aɗi hamta ni ka mji tsi ni wa.