Read bura-pabir Irmiya 28 Bible Online

Irmiya 28 - bura-pabir bible

Irmiya 28

¹Naɓi laga aɗi ka thləmari Hananiya. Tsa an ɓzər Azzur na ahar Gibeyon. Antə vir laga akwa thliya na ntəfkur ar məva na nfwarkur ar kuthlikur Zedekiya na kuthlir Yahuda, Hananiya gari ali ata nca pristayeri ka shanga mji na akwa mbwar MTHLAKU abbər,

²“MTHLAKU na ka Duna ta Shang, Hyelər Israila akwa pəla, I ata kəli bwani tə kuthlir Babila vəngkər ala giri ni.

³Azi ka məva suɗa I ata ngka ka shanga kari kutambwar vəngkər səli natə Nebukadnezzar fatə ka mwanta ahar Babila ni.

⁴Tsuwa I ata ngka ka Yehoyacin na ɓzər Yehoyakim kuthlir Yahuda ka shanga mji natə mdə ku ngkəi ka mwanta ahar Babila. Kamnyar jiri, I ata kəli bwani tə kuthlir Babila vəngkər ala giri ni. I na MTHLAKU an pəla!”

⁵Antə I na Irmiya ku shinau aka naɓi Hananiya tsu ata nca pristayeri ka shanga mji na athləthlata akwa mbwar vəngkər səli ni abbər,

⁶Amin! Ka Hyel hara ka su tə gə pəla ni ndzi jiri! I mbərsa MTHLAKU ata ngka ka shanga kari kutambwar vəngkər səli tə mjir Babila fatə ni, tsuwa ka shanga mjir mburu tə mjir Babila fatə ni jaktə ngka avəi.

⁷Amma kulini psi giri thləm aka su tə I ata pəla ala giri kəga mjir giri.

⁸Naɓiyayeri na ngkər ndərər Hyel waci akəmata shanga mburu ngəni, ku pəla mpa, ka mi, ka shilku ata sə wutə tsəɗiyayeri ka kuthlikurayeri.

⁹Antə kəlara naɓi na ku psəmnya lapiyakur tar ka tsa wuta abbər su tə tsa pəla ni ku ndzi jiri. Apani antə mda ata sənda abbər MTHLAKU an thlentə ni jiri.

¹⁰Antə naɓi Hananiya kəli udzəm na ata wulya naɓi Irmiya ni ka ɓəgəlwa,

¹¹ka jaktə pəla aka mji na tsaptədzi ni abbər, “MTHLAKU pəla, ‘Apatə mdə ɓəgəlwa udzəm ni, antə akwa kuta məva suɗa, I ata ɓəgələmta kələr bwani na ata wulya shanga mji na akira Nebukadnezzar na kuthlir Babila.’ ” Antə Irmiya ku təra kazhar bəbalər mbwar vəngkər səli.

¹²Aghəla sakatə Hananiya ku ɓəgələmta udzəm na ata wulyi ni, antə MTHLAKU pəla ali abbər,

¹³“Mwari ka ra pəla aka Hananiya, ‘MTHLAKU pəla, “Ga ku ɓəgələmta kələr udzəm, amma I ata namtə damwa ka liya mənggəl ata vəyari.

¹⁴Kamnyar MTHLAKU na ka Duna ta Shang, Hyelər Israila akwa pəla, I ku vətə kələr liya mənggəl na kəgəɓu ata wulya shanga tsəɗiyayeri abbər ka da hara mafakur akira Nebukadnezzar kuthlir Babila. Kamnyar wala mwaɓiyayeri na akwa mtakəu I ku hamta ɗa ka da kəthlər alari.” ’ ”

¹⁵Antə I na Irmiya pəla aka naɓi Hananiya, “Psi thləma ga Hananiya, MTHLAKU aɗi thlentə ngə jiri wa, amma ga ku vu tə mji ngəni ku mbərsa ka thlandər ar ngə ni.

¹⁶Antə MTHLAKU pəla I ata shamta nga ata kəra duniya. Tsu akwa məva ngəni antə ga ata mta, kamnyar ga ku vu tə mji ku hara kər ɓəɓalkur aka MTHLAKU.”

¹⁷Antə Hananiya ku mti tsu akwa məva nda akwa thliya na murfəkur.