Read bura-pabir Irmiya 29 Bible Online

Irmiya 29 - bura-pabir bible

Irmiya 29

¹Sakatə Nebukadnezzar fatə mjir Urushalima ka Yahuda ka mwantə ɗa ahar Babila ni, da təra kazhar ra ahar Urushalima. Antə I rəbutə wasika aka pristayeri, ka naɓiyayeri, ka shanga mji tə Nebukadnezzar fata akwa Urushalima ni.

²I rəbutə wasika ngəni aghəla tə mdə ku fatə Kuthli Yehoyacin, ka mama'ni, ka mjir kəthlər na ol'ola akwa kəi kuthlikur, ka mji ol'olər Yahuda, ka shanga mji na masəkur kəthlər ka tsi, ka mjir ɓdla na akwa Urushalima ka təra ka da.

³I hamta wasika ni akwa tsiya Eleyasa na ɓzər Shafan ka Gemariya na ɓzər Hilkiya, mji tə Zedekiya na kuthlir Yahuda thlenta apa wakilayeri arni adzə Nebukadnezzar na kuthlir Babila ni. I rəbuta akwa wasika ni abbər,

⁴“MTHLAKU na ka Duna ta Shang, Hyelər Israila, akwa pəla aka shanga mji tə tsa zhar ka Nebukadnezzar fata akwa Urushalima ka mwanta ahar Babila ni, abbər,

⁵‘Latə giri kəyayeri kamnyar ka giri ndzəndzi akwa. Bara gir gadinayeri na ata ya su ka giri ncitə ɗa kamnyar ka giri sə səma.

⁶Kəl giri mwala ka giri ya maɗar. Aghəla nda ka giri kətə mwala aka maɗashilər giri, ka hamta maɗangkwiyir giri aka sal, ka da ya ala giri kəkayeri. Ka giri yatədzi anda, giri aɗiya kəmtadzi wa.

⁷Hara gir kəthlər na ata dlara akwa ləkəmar tsəɗi tə I mwantə giri akwa ni. Ka giri ɗangtə tsəɗi ni akwa adduwar giri aka MTHLAKU, kamnyar lapiyakurər tsəɗi an lapiyakurər giri.

⁸Kamnyar MTHLAKU na ka duna, Hyelər Israila akwa pəla, “Giri aɗiya zhar ka naɓiyayeri ka mjir hakdzi na akwa nca giri anda ni pwaktəmta giri wa. Tsuwa giri aɗiya psi thləm aka suniyayeri arɗa wa.

⁹Kamnyar da akwa thlandər ala giri ka thləmi. I aɗi thlentə ɗa wa. I na MTHLAKU an pəla.” ’ ”

¹⁰Jirkur su an abbər giri ata hara məva murfəkumari akwa Babila! Amma aghəla nda I ata kətadzə giri apatə I ku kətə alkawalari, kəi ngka ka giri avəi akwa Urushalima.

¹¹Kamnyar I asəndə su tə I akwa ɗəmhari kamnyar giri. I akwa ɗəmha ala giri su na ɓɗaku, aɗi su na ɗimi wa. Su tə I ɗəmhər harari ni ata vu ka giri ndzi lapiya ka nggatə msərakur akəmazi.

¹²Antə ma giri ku si adzə ra ka bara dlara akəli, I ata psi thləm ala giri.

¹³Ma giri ku bara ra ka ɗəffu duku, giri ata wutə ra.

¹⁴Jiri, I pəla giri ata wutə ra, antə I ata ngka ka giri akwa tsəɗiyir giri. I ata fwaɓəla giri ka zhar tsəɗiyayeri tə I mwantə giri akwa, kəi jaktə tsaptə giri. I ata jaktə ngka ala giri ka gənar giri apa na hwatu. I na MTHLAKU an pəla.

¹⁵“Giri ata mzhi pəla MTHLAKU ku na ala giri naɓiyayeri akwa Babila.

¹⁶Amma ngga giri su tə MTHLAKU pəla ata kəra kuthli na ata dəkəl kuthlikur ar Dauda, ka shanga mji na akwa Urushalima, maɗama' giri. Da an yangkura giri natə mda aɗi fatə ɗa ka mwantə ɗa akwa mafakur ahar Babila wa.

¹⁷MTHLAKU na ka Duna ta Shang akwa pəla, ‘I ata thlentə mpa, ka mi, ka asar ata kəra ɗa, kəi namtə ɗa apa kamndə hiɗahiɗa na ɗimi kamta, tə mda amzhi kwasari wa.

¹⁸I ata kədlə ɗa ka katsakar, ka mi, ka shilku, kəi titiləmta ɗa akwa nca durayeri ata kəra duniya. Antə da ata ndzi sur thlivəra, ka sur nggənggəla, ka sur ruta, ka sur səli akwa shanga tsəɗi tə I ata mwantə ɗa akwa.

¹⁹Su ngəni ata wutə ɗa kamnyar tə I ku kəɗar thlenta ala ɗa naɓiyayeri ka da tsaktə ɗa, amma da aɗi psi thləm wa.

²⁰Antə shanga giri na akwa mafakur akwa Babila, psi giri thləm aka su tə I na MTHLAKU ata pəlari.’ ”

²¹MTHLAKU na ka Duna ta Shang, Hyelər Israila akwa pəla tsa ata hamta Ahab na ɓzər Kolaiya, ka Zedekiya na ɓzər Maaseya na akwa thlandər ala giri ka thləmi akwa tsiya Kuthli Nebukadnezzar. Antə tsa ata tsəgəi ɗa ata nca giri.

²²Bwani ngəni mwavər ni ata ndzi sur ngkəra. Antə kəlara sakatə mdər Israila na akwa mafakur ata bara shuwumta mda, tsa ata pəla, “Ka MTHLAKU ngkərta alari bwani apatə tsa ngkərta aka Zedekiya ka Ahab, mji tə kuthlir Babila ptsamnya ɗa ka mpika.

²³Kamnyar mji nayeri ni ku hara su na ɗimi akwa nca mjirna. Da ku ləkə mwankir ntəwulər ɗa ka thlandər ka thləma MTHLAKU, akwa pəla suayeri tə tsa aɗi pəla ala ɗa wa. Tsa səndə bikayeri tə da hara ni, kamnyar tsa ku wutə ɗa ka ncari. I na MTHLAKU an pəla.”

²⁴Ka ra pəla aka Shemaiya na mdər Nehelam,

²⁵“Ngəni an su tə MTHLAKU na ka Duna ta Shang Hyelər Israila pəla ali kəi pəla aka Shemaiya na mdər Nehelam. Tsa pəla, ‘Ga ku rəbutə wasika ka kəra gə daci aka Zafaniya na ɓzər Maaseya na prist, ka thlentə kwapiyari aka shanga pristayeri, ka shanga mji na akwa Urushalima abbər,

²⁶“MTHLAKU ku namtə giri pristayeri ata vəya Yehoyada na prist ka giri kəthlər akwa mbwar vəngkər səli. Giri ata ngkəi kəlara mdə na namtə kərni apa tsa naɓi, na akwa hara su apa cicu, ka giri tsau ni akwa məsəsal ka wulyari akwa gang.

²⁷Ai sakani ga ku ɗi Irmiya na ahar Anathloth, mdə na akwa gari aka mji apa tsa naɓi ni.

²⁸Har tsa ku rəbutə wasika aka mji na akwa mafakur akwa Babila abbər da ata fəi anda, antə kuji ka da həntə kəi tə da ata ndzi akwa, ka da bara gadina ka ncita kamnyar ka da wutə su tə da ata səmari.” ’ ”

²⁹Sakatə Zafaniya na prist wutə wasikar Shemaiya ni, antə tsa si ka karata ali.

³⁰Antə MTHLAKU pəla ali

³¹kəi thlentə ndər aka mjir Yahuda na akwa mafakur ahar Babila. Tsa pəla kəi pəla ala ɗa abbər, “I na MTHLAKU aɗi kiɗə Shemaiya ka tsa ndzi naɓi wa, amma tsa ku gari ala giri apa tsa naɓi ka pwaktəmta giri

³²Antə I ata ɗi Shemaiya na mdər Nehelam ka kutakəyirni. Mda aɗi ata mbil wala pal akwa nca mjirni wa. Tsuwa tsa aɗi ata wutə su na ɓɗaku tə I ata hara aka mjirna wa, kamnyar tsa ku hara kər ɓəɓalkur ali. I na MTHLAKU an pəla.”