Read bura-pabir Irmiya 3 Bible Online

Irmiya 3 - bura-pabir bible

Irmiya 3

¹Ma sal ku ndəka ka mwalankiɗa, tə mwala ni ku kəl sal damwa, ma mwala ni ku jaktə ngka adzə salngkiɗa na waci ni, sal ni aɗi ata dlu ni wa. Kamnyar su ngəni ata ɓzamtə tsəɗi ni ka duna. Amma ar nga Israila, ga ku hara karwakur ka mji shili hang, amma wala apani I akwa kəga nga kara ngka adzə ra!

²“Wul kəra garayeri ni, vəi aɗi na kula ga ku hara karwakur ata ya? Ga ku ndzəndzi ata mnya laku ka sək shili apatə mdər Arab ana thla mji akwa mtakəu. Ga ku ɓzamtə tsəɗi ni ka karwakur ngə ni.

³An su na hara tə I na MTHLAKU ku ngkatə yimi akwa tsikəra vəya ka akwa səghəyir vəya. Ga ku ndzi apa karwa kula səli.”

⁴“Amma təng kulini ga ata pəla ali abbər, ‘Ga an baba'na, ga ku hir ra təng akwa ngkyarkurərna.

⁵Ga aɗiya ndzi ka ɗəffə ɓzəɓza ata kəri ba saka madi wa.’ An su tə ga akwa pəlari ni, Israila, aghəla tə ga ku kuri hara shanga ɗimikur tə ga amzha.”

⁶Akwa sakar kuthlikur Yosiya, antə MTHLAKU pəla ali, “Ga ku wutə su tə Israila hara ya? Tsa ku ndzi kula jirkur apa mwala ləka na kula jirkur aka salngkiɗa. Israila ku vəngkər səli aka haptayeri na ata kəra garayeri ka akira nfwayeri na ka thlali mirakəu.

⁷I kəta abbər aghəla tə tsa ku hara shanga suayeri ngəni, tsa ata ngka adzə ra. Amma tsa aɗi ngka wa. Antə ngkwarma'ni Yahuda na kula jirkur, ku wutə shanga su tə tsa hara.

⁸I wuta abbər Yahuda ku wutə shanga karwakur tə Israila ku hara ka laku tə I kədləmta ni kamnyar karwakur. Amma wala apani Yahuda na ngkwarma'ni aɗi thlivər wa, kamnyar tsa ku zhar ra ka ləkwa karwakur tsuwa.

⁹Kamnyar tə Yahuda aɗi ana ngga səliyir hara karwakur wa, tsa ku ɓzamtə tsəɗi ni ka dlimburkur atar vəngkər səli aka pela ka nfwa.

¹⁰Antə ba kulini Yahuda na kula jirkur, na ngkwarma' Israila, aɗi ngka adzə ra ka ɗəffari duku wa. Tsa aɗi ka jirkur wa. I na MTHLAKU an pəla.”

¹¹Antə MTHLAKU pəla ali abbər, wala tə Israila ku ndzi kula jirkur, tsu tsa hərkə ta Yahuda na shimnya.

¹²Tsa pəla ali kəi mwari kəi ra pəla aka mjir Israila na abwar yala abbər, “Israila na kula jirkur, jaktə ngka adzə ra. I mdər kətadza, antə ɗəffi aɗi ata ndzi bwarbwar ata kəra ga ba saka madi wa.

¹³Təng ka gə kələngkər abbər ga ku hara biku, abbər ga ku hara kər ɓəɓalkur aka MTHLAKU na Hyelər nga. Kələngkər abbər ga ku hir haptayeri ar kir nfwa, ka nggəlar ɓəla tsawur na. I na, MTHLAKU an pəla.”

¹⁴MTHLAKU akwa pəla, “Ngka giri adzə ra, shanga giri na kula jirkur. Kamnyar I an mthlakər giri antə I ata kətə mdə pal pal akwa kəlara bərni ka fatə mji suɗsuɗa akwa kəlara dur, kəi səntə giri ata Gar Sihiyona.

¹⁵I ata hamta ala giri mjir pwara na ata kələngkər ali, ka da pwar giri ka ɗəɗukur ka nggaɓəlar su.

¹⁶Antə ma sakatə giri ku hara hang akwa tsəɗi ndaga, mji aɗi ata sə gari ata kəra Akwati Alkawal arna kəra wa. Da aɗi ata dzama ata kərari wala ɗangtə ni kəra wa. Da aɗi ata sə bara ni wala namtə damwa wa.

¹⁷Akwa saka ndaga, mda ata sə kəga Urushalima abbər, ‘Dəkəl Kuthlikur ar MTHLAKU.’ Antə shanga durayeri ata sə tsaptədzi anda ka da vəngkər səli ali. Da aɗi ata sə hara su na ɗimi tə ɗəffa ɗa akwa barari wa.

¹⁸Antə Israila ata sə paktədzi ka Yahuda, antə japwa ɗa ata sə thlata akwa tsəɗi mafakur na abwar yala, ka ngka akwa tsəɗi natə I hamta aka kəkayeri ar giri.”

¹⁹MTHLAKU akwa pəla, “Israila, I ku bara kəi namtə nga apa ɓzərna, kəi na gə tsəɗi na ɓɗakta shang, natə jaktər ɓɗakkurərni aɗi akwa duniya wa. I pəla nuhum giri ata kəga ra Baba, tə giri aɗi ata jaktə zhar nu ra wa.

²⁰Amma ata vəya ndaga təng giri ndzi ali apa mwala na kula jirkur, na hwi kazhar salngkiɗa. I, na MTHLAKU an pəla.”

²¹“Mji ku nggatə kuraku ata kəra garayeri! Mjir Israila an akwa tsa ləlu kamnyar bara dlara, kamnyar da ku nu laku na mbalmbalari ka fwari ata kəri, I na MTHLAKU na Hyelər ɗa.”

²²I ata pəla ala ɗa, “Ngka giri adzə ra shanga giri na kula jirkur, antə I ata namtə giri ka giri ndzi ka jirkur.” Antə da pəla, “Nggədza yeru akwa si, kamnyar ga an MTHLAKU na Hyelər yeru.

²³Jiri təng yeru pwaktə kəra yeru akwa hara kuraku aka haptayeri ata kəra ɗəɗəgəlayeri ka garayeri gapani. Jiri, tar akəla MTHLAKU na Hyelər yeru antə Israila ata wutə mbantədzi.

²⁴Amma nu haptu Baal, na an sur səli, ku vu tə yeru ku ni ka shanga su tə kəkayeri ar yeru tsapta. Tsa ɗəɗuɓəla yeru ka famnya təmar yeru ka thlar yeru, ka fatə maɗa' yeru shili ka mwanki.

²⁵Tar ka yeru ləkwa sur səli ka ndzi sur kətadza, kamnyar təng akwa ngkyarkur yeru kəga kəkayeri ar yeru akwa hara biku aka MTHLAKU na Hyelər yeru. Yeru aɗi ɗar kələngkər alari wa.”