Read bura-pabir Irmiya 30 Bible Online

Irmiya 30 - bura-pabir bible

Irmiya 30

¹MTHLAKU na Hyelər Israila,

²ku pəla ali, “Irmiya, rəbutə shanga su tə I pəla ala ga akwa kakaɗu,

³kamnyar saka akwa si tə I ata ngka ka mjirna Israila ka Yahuda akwa tsəɗiyir ɗa. I ata ngka ka da avəi akwa tsəɗi tə I hamta aka kəkayeri arɗa, abbər ka tsa ndzi ar kəra ɗa.”

⁴Ngəni an labar tə MTHLAKU pəla ata kəra Israila ka Yahuda.

⁵MTHLAKU akwa pəla, “I akwa ngga mji akwa kuraku kurakər thlivəra, aɗi ar msərakur wa.

⁶Kulini ndzi kəi yu su! Mdə sal ana ya ɓzər ya? Kamnyar mə tə I akwa wul kəlara mdə sal kəsi kusarari apa mwala akwa kutərya nə ri? Kamnyar mə tə kəma waskəi hərhərari nə ri?

⁷Kara maɗara! Vir na ɗimi akwa si, tə mda aɗi ɗar wutə jiliyari wa. Tsa ata ndzi vir tə mjirna ata sə ɗar bwani, amma I ata sə msərantə ɗa.”

⁸MTHLAKU na ka Duna ta Shang akwa pəla, “Vir nda I ata ɓəgələmta udzəm na akwa wulya ɗa, kəi nthləgəmta məsəsal na akwa səla ɗa ni. Mətəpi aɗi ata jaktə ndzi mthlakər ɗa wa.

⁹Ata vəya ndaga, mjirna ata hara buɗakur aka MTHLAKU na Hyelər ɗa, ka aka kəkar Dauda natə I ata sə vəi ni ka tsa ndzi kuthlir ɗa.”

¹⁰MTHLAKU akwa pəla, “Mjirna giri aɗiya thlivər wa, mjir Israila giri aɗiya yakatə wa. Kamnyar I ata msərantə giri akwa tsəɗi na ciju, I ata fwaɓəla giri akwa tsəɗi mafakur. Antə giri kəga kəkayeri ar giri ata sə ndzəndzi lapiya akwa msərakur, su aɗi na ata thlivərantə giri wa.

¹¹Kamnyar I ata vəi duku ka giri antə I ata msərantə giri. I ata shamta shanga mjir tsəɗiyayeri tə I titiləmta giri akwa nca ɗa ni, amma I aɗi ata shamta giri wa. I aɗi ata ndzi kula ɗi giri wa, amma I ata ɗi giri kalkal ka vəyari.”

¹²Kamnyar MTHLAKU akwa pəla, “Giri ku dəkəidzi natə mbəlkari akur wa, mbəlka giri ni ku hara mwavər kamta

¹³Mda aɗi na amzhi dlar giri wa, kuzəku aɗi na akuri ala giri mbəlkə ni wa, giri aɗi ata mbə wa.

¹⁴Shanga pazhayeri ar giri ku təra ka zhar giri, da aɗi akwa damitədzi ka giri kəra wa. I ku dəkə giri ka duna apa giri dawarna, ka ɗi giri kula kətadza apa giri dawarna. Kamnyar giri ku hara bikayeri hang, tsuwa giri ku hara su na ɗimi kamta

¹⁵Antə ampaniyir jikamnya ata kəra mbəlka giri ni aɗi wa, kamnyar su na akwa kətə giri ni aɗi ata kur wa. Ku ndzi dwali ali kəi ɗi giri apani, kamnyar giri ku hara bikayeri hang tsuwa giri ku hara su na ɗimi kamta.

¹⁶Amma kulini shanga mji na ata kurəmta giri mda ata kurəmta ɗa, mda ata fatə shanga dawayeri ar giri ka mwantə ɗa akwa mafakur. Shanga mji na ku thla giri mda ata thla ɗa, antə mji na ku famnya kariyir giri mda ata famnya kariyir ɗa.

¹⁷Kamnyar I ata hara ka giri jaktə ndzi lapiya, kəi kuri mbəlka giri. Wala tə dawar giri ana kəga giri abbər giri na mjir Urushalima giri mji taratara, mji tə mda aɗi ana damitədzi ka da wa. I na MTHLAKU an pəla.”

¹⁸MTHLAKU akwa pəla, “I ata ngka ka mjirna akwa tsəɗiyir ɗa, kəi kətadzə kəlara kutakəi Kulini Urushalima huzahuzari apa fya, amma mda ata jaktə hənɓəla ni tsu ata səlari, ka mdə jaktə hənɓəla kəi kuthlikur tsu ata vəyari na waci.

¹⁹Mji na anda ata sə usar Hyel ka hayeri, ka hara kuraku kamnyar kucali. I ata hara ka da yatədzi hang, da aɗi ata kəmtadzi wa, I ata hara ka da ndzi ka daraja, mda aɗi na ata rutə ɗa wa.

²⁰Maɗa' ɗa ata sə ləkəma ka hara thləm apa mji na waci, antə da ata jaktə ndzi mji na ka duna ka vəngkər səli ali. Antə I ata ɗi shanga mji na ku na ɗa bwani.

²¹Mda ata sə carɓəla kuthlir ɗa tsu akwa nca ɗa, tsu mdə na akwa nca ɗa an ata ndzi Olər ɗa. I ata kəga ni antə tsa ata si adzə ra, kamnyar mdər mzhi si adzə ra aɗi wa tar ma I an kəga ni. I na MTHLAKU an pəla.

²²Antə giri ata ndzi mjirna, antə I ata ndzi Hyelər giri.”

²³Antə ɗəffa MTHLAKU ku ɓzi ka duna. Tsa ata si ka ɗəffu apa u'ur bara ka shambar yimi na mwavər, ka pumta ɗəffari ni ata kəra mji na ɗimi.

²⁴Ɗəffa MTHLAKU aɗi ata pəpəi wa, tar ma tsa ku kuri shanga su tə tsa ɗəmha akwa ɗəffari. Aghəla nda antə mjirni ata sə nggaɓəla karapur suayeri ni ata bəbal.