Read bura-pabir Irmiya 31 Bible Online

Irmiya 31 - bura-pabir bible

Irmiya 31

¹MTHLAKU akwa pəla, “Saka akwa si tə I ata sə ndzi Hyelər shanga nyarmbwayeri ar Israila, antə da ata ndzi mjirna.

²Sakatə mjir Israila akwa dəli mtakəu, sakatə da akwa kucalər ngka avəi ka da ghərəmtaghəra, I ku kətadzə mji na ku msər ta mta.

³Akwa saka na təramta MTHLAKU ku wutədzi ali ka pəla ali kəi pəla aka mjir Israila abbər, ‘Mjir Israila, I ku hir giri ka hirkur na ba saka madi, antə I ku ləkəma ka hir giri ka hirkur na ana palidzə wa.

⁴I ata jaktə namtə giri ka giri ndzi ka duna Antə giri ata sə jaktə fatə kəcaikəcai giri ka giri ɓathla ka hara kucali.

⁵Giri ata jaktə ncitə fakayeri ar anap na ata kəra garayeri ar Samariya, antə mji na nci ni ata səm yar anap ni ka nggatə msərakurari.

⁶Jiri, virari ata si tə mjir səka na akwa tsəɗi garayeri ar Ifrayim ata sə haptə kuraka ɗa ka pəla, “Thlatə giri ka mburu ləmta akwa Sihiyona adzə MTHLAKU na Hyelər mburu.” ’ ”

⁷Kamnyar MTHLAKU akwa pəla, “Hara gir har kucali ka kuraku aka Israila haptə giri kuraka giri kamnyar tsəɗi na olər tsəɗiyayeri Psəmnya gir labar ni! Hu gir ni! Pəla giri, ‘Mbantə mjir ngə, MTHLAKU, mjir Israila na mbil ka mpikə ni.’

⁸I ata fatə mjirna na ahar Babila, ka mji na akwa tsəɗiyayeri na ciju ciju. Mji na mdlyang ka nggurdəkəi ata si ata kəma duku kəga da, mwanki na ka hur kəga na abaka ya ata si kəga da. Da ata si dlama dlama apa tsəɗi na ola.

⁹Shimwi ata sə nghyantə nca mjirna kamnyar hangkur kucali, sakatə I ata ngka ka da avəi. I ata pwar ɗa ata mnya zərkayeri, da ata mwa ata bəbal patərathlu antə da aɗi ata tsamta səla ɗa wa. Kamnyar I an baba' Israila, antə tsa an ɓzər olərna.”

¹⁰MTHLAKU akwa pəla, “Psi gir thləm ali, giri na tsəɗiyayeri, ka giri psəmnya labar ni akwa tsəɗiyayeri, na kudzəhə ka na ciju ata mnya yimi. Pəla giri, ‘Mdə na titiləmta mjir Israila, ata jaktə tsaptə ɗa, tsa ata wulwul ɗa apa mdər ɓəla na akwa sək kəra ciɓərni.’

¹¹Kamnyar tsa ku msərantə mjir Israila, ka mbuli ɗa akwa tsiya dawayeri na ka duna dzau.

¹²Mjirna ata si ata Gar Sihiyona ka da hara kucali, antə kəma ɗa ata nghyi ka kucali kamnyar ɓɗakkur tə I hara ala ɗa, kamnyar mthli, yimər anap, ka mal zaitun tə I na ɗa gapani, kamnyar maɗa' təma ka thla tə I hamta ala ɗa. Da ata ndzi apa gadina natə yimi ku mzhi ni, antə da ata wutə shanga su tə da ata turari.

¹³Antə maɗangkwi ata sə ɓathla ka hara kucali antə mji shili, ol ka ntsaha, ata sə hara kucali. I ata shiktə ɗa kəi namtə ka tuwar ɗa shin ka kucali, kəi namtə ɗəffa ɗa na ɓzə ni ka tsa ndzi mwapu.

¹⁴I ata hamta susəma hang aka pristayeri arna, kəi ndlantə mjirna ka shanga su tə da ata turari. I na MTHLAKU an pəla.”

¹⁵MTHLAKU akwa pəla, “Mdə ku nggatə kuraku ahar Rama, kurakər tuwa na mwavər. Rahila akwa tuwa kamnyar maɗa'ni, ka nggəlar shiktədzi kamnyar maɗa'ni aɗi kəra wa.”

¹⁶Amma kulini MTHLAKU akwa pəla, “Ga aɗiya tuwa kəra wa, famta nca ga! Kamnyar ghərər nga aka maɗa' nga aɗi ata ndzi gapani wa, maɗa' nga ata zhar tsəɗiyir dawa ka da ngka adzə nga.

¹⁷Su aɗi tə ga ata vəkər kari akəmazi, maɗa' nga ata ngka avəi akwa tsəɗiyir ɗa. I na MTHLAKU an pəla.

¹⁸I ku nggatə mjir Israila akwa tuwa ali ka pəla, ‘Hwatu yeru ndzi apa ɓzəra gyal na kula ɗya, amma ga ku thlipta ala yeru kələngkər aka su. Ngka ka yeru, kamnyar yeru ku ɗəmhədzər ngka adzə nga, kamnyar MTHLAKU, ga an Hyelər yeru.

¹⁹Yeru ku shinardzi kazhar nga, amma təkəma yeru ku bara ka yeru jaktə ngka, Aghəla tə ga ku ɗi yeru antə yeru haghəi kəra yeru kamnyar sur səli ka ɗəffə ɓzəɓza tə yeru pu kər yeru. Yeru akwa nggatə səliyir bikayeri tə yeru hara akwa ngkyarkur.’

²⁰“Israila, ga an ɓzərna na hirhirari, ɓzər natə I hir ta shang. Wala tə kəlara saka I akwa mpa ala ga, tsu I ana bara abbər kuji ka ga adzə ra, Hangkali ku nutə nga, antə jiri I ata kətadzə nga. I na MTHLAKU an pəla,

²¹Ka gə pwi ka pwi pela tsaptsaɓa ka ncimta udzəmayeri ata mnya laku, kara vədzə hangkal aka lambatə tə gə təra ata, ka gə ngka tsu ata laku na ndaga. Shanga giri na mjir Israila, ngka giri avəi akwa tsəɗiyir giri.

²²“Mjir Israila, nawa antə giri ata sə zhar kəkalukur ka hamta jiri ri? Kamnyar I na MTHLAKU ata vu ka su laga bilən hara akwa duniya, mwala an ata bara sal ka tsa kəla.”

²³MTHLAKU na ka Duna ta Shang, Hyelər Israila akwa pəla, “Ma sakatə I ku ngka ka mji ni akwa tsəɗiyir ɗa, mjir Yahuda ka bərniyayeri arni ata sə jaktə pəla, “ ‘Ka MTHLAKU vədzə barka aka Garər Hyel na akwa Urushalima, vəi tə mbwar vəngkər səli aka Hyel ata.’ ”

²⁴“Antə mji ata sə ndzəndzi ata kəma duku akwa Urushalima ka shanga bərniyayeri na akwa Yahuda. Mji bwaduku ata sə ndzi mjir tsuhwa, bwadukwa ɗa ata ndzi mjir ɓəla kəga ciɓər ɗa.

²⁵I ata nar duna bilən aka mji ghərghəra, kəi ndlantə shanga mji ka susəma, mji na kula duna kamnyar mi.”

²⁶Antə mji ata sə pəla, “I pəpəi naha ka thlatə ɓəɓal ashina ka duna bilən.”

²⁷I na MTHLAKU akwa pəla, “Saka ata sə si tə I ata nghyantə tsəɗi Yahuda ka Israila ka mji ka mwaɓiyayeri.

²⁸Akwa saka na təramta I ku ntsumta ɗa ka hangkal ka ndlamta ɗa. I ku titiləmta ɗa ka hilantə ɗa, ka sənta asar ata kəra ɗa. Amma vir nda I ata nci ɗa ka hangkal, kəi kəlantə ɗa.

²⁹Vir nda mda aɗi na ata jaktə pəla karapu ngəni wa, na pəla, “ ‘Mjir ya an sa anap na mumwasu, amma maɗa' ɗa antə thlira ɗa fəidzi.’ ”

³⁰“Amma kəlara mdə na ku sa anap na mumwasu antə thlirari ata fəidzi, waskəi ata mtə kamnyar bikər kərari.”

³¹MTHLAKU akwa pəla, “Saka ata si tə I ata sə mbwi alkawal bilən ka mjir Israila ka tsuwa mjir Yahuda.

³²Tsa aɗi ata ndzi apa alkawal na fəifəi tə I hara ka kəkayeri arɗa sakatə I kəsi tsiya ɗa ka fwaɓəla ɗa akwa Masar wa. Wala tə I ku ndzi ala ɗa apa salər ɗa, da aɗi ɓəlata alkawal ni wa.

³³Alkawal bilən tə I ata mbwiyari ka mjir Israila ni an apani: I ata vu tsawurna akwa kəra ɗa ka ata ɗəffa ɗa. I ata ndzi Hyelər ɗa antə da ata ndzi mjirna.

³⁴Antə aɗi tar ka waskəi thlipa aka nvwani abbər ka tsa səndə MTHLAKU wa, kamnyar shanga ɗa ata səndə ra, baɗitə ka na raka ta shang ka mwanta aka na olta shang. Kamnyar I ata tifəmta bikər ɗa, antə I aɗi ata ɗangtə ɗimikur tə da hara ali kəra wa. I na MTHLAKU an pəla.”

³⁵MTHLAKU na ka Duna ta Shang akwa pəla, tsa na ana hamta pci ka tsa mbəla təpci, ka tsawa aka thliya ka sasəlkayeri ka da hamta parakəu aviri. Tsa na ana kənggərantə manda har ka tsa hara kuraku na ola.

³⁶Apatə su aɗi tə tsa namtə na ata mzhi ɓəli tsawurni wa, antə saka aɗi tə Israila ata sə sha wa.

³⁷Apatə aɗi ata hara ka mdə mzhi ngkərtə baukur kutahyel wala mzhi pakɓəla nggilanga duniya wa, apani tsuwa aɗi ata hara kəi nggəlar mjir Israila ba saka madi kamnyar bikər ɗa wa. I na MTHLAKU an pəla.

³⁸“Saka ata sə si tə mda ata jaktə hənta ali shanga bərni Urushalima, baɗita adzə Hən na nal ar Hanamel ka mwanta aka Nyarfur Kuɗəma.

³⁹Kəl ni ata baɗita anda tsuwa ka pudza aka ɗəɗəgəl Gareb na akwa ramta, ka bari ka mwari ahar Gowa.

⁴⁰Antə shanga mular tə mda ana har mshiyayeri akwa ka vəi tə mda ana pumta pənju akwa, ka shanga mtakə na amta zərkər Kidron, har ka vədza aka Nyarfur Taku na abwar raghəi ata ndzi zum kamnyar na. Mda aɗi ata mbultsə bərni ni wala huzamta ni wa.”