Read bura-pabir Irmiya 32 Bible Online

Irmiya 32 - bura-pabir bible

Irmiya 32

¹MTHLAKU ku gari ali akwa məva na kumkur ar kuthlikur Zedekiya, kuthlir Yahuda. Akwa saka ngəni Nebukadnezzar ka məvari kumnya ncisu akwa kuthlikur ata kəra Babila.

²Tsu akwa saka ngəni tsuwa antə sojayeri ar Babila ku si ka kalaktə Urushalima ka mpa, antə mdə ku kəsi ra akwa mbwar pərsəna laga na akwa bəbalər kəi kuthlikur ar Yahuda.

³Kuthli Zedekiya ku vu ra akwa pərsəna, kamnyar tə I akwa psəmnya su tə MTHLAKU pəla abbər, “I ata zhar ka kuthlir Babila ngkəi bərni ngəni,

⁴antə Kuthli Zedekiya aɗi ata msər wa. Sojayeri ar Babila ata ngkəi ni ka da hamta ni aka kuthlir ɗa, antə da ata wuldzi ka gari nca ka nca.

⁵Mda ata kətə Zedekiya ka mwantə ni ahar Babila ka tsa ndzəndzi anda tar ma I ku ngkərta alari su hara hara. Wala tsa an mpa mjir Babila tsa aɗi ata nggyari ɗa wa. I na MTHLAKU an pəla.”

⁶Antə MTHLAKU pəla ali, I na Irmiya abbər,

⁷“Hanamel na ɓzər Shallum na msəkərna, ata si adzə ra ka tsa pəla ali kəi mastə bəbalərni na ahar Anathloth ni. Kamnyar I an mdə na kalkal kəi masa akwabə mda ahaptə ɗəlari aka mji damwa.”

⁸Antə kalkal apatə MTHLAKU ku pəla, Hanamel ku si adzə ra akwa pərsəna ni ka pəla ali, “Mastə bəbalərna na ahar Anathloth akwa tsəɗi Benjamin ni, kamnyar ar nga kalkal ka gə masa, kamnyar ma gə mastə su ni ata jaktə ndzi tsu akwa nyarmbwar mburu.” Antə təkəma I nggaɓəla abbər ndər ngəni thlata akəla MTHLAKU.

⁹Antə I mastə bəbal na ahar Anathloth ni akəla Hanamel ata kəra liyar adzərfa kumnya murfa.

¹⁰Antə I vu tsi akwa kakaɗər masari ni ka dləɓta, ka bara seɗayeri tə da vu tsiya ɗa, ka ngkərtə kəgəɓkur ar kwaba ni ata səkel ka ntəmta.

¹¹Antə I kətə kakaɗər masa natə I dləɓta ni, kakaɗu na ata ncantə laku tə mdə hara masə ni akwa ka alkawal ar suayeri na ku tsəkwar masər vəi ni, ka kakaɗər masa natə I aɗi dləɓtə wa,

¹²ka hamta ɗa aka Baruk na ɓzər Neriya ɓzər Mahseya. I hamta ɗa alari ata nca Hanamel na ɓzər msəkərna ka seɗayeri na vu tsiya ɗa akwa kakaɗər masə ni, ka ata nca shanga mjir Yahuda na akwa mbwar gadi kəra pərsənayeri ni.

¹³Antə I tsawa aka Baruk ata nca ɗa abbər,

¹⁴“MTHLAKU na ka Duna ta Shang, Hyelər Israila akwa pəla, Ka gə kətə kakaɗər seɗa na dləɓdləɓari ni ka na kəlarkəlarari ni ka ra vu akwa tughum həi kamnyar ta da sə ɓza.

¹⁵Kamnyar apani antə MTHLAKU na ka Duna ta Shang, Hyelər Israila akwa pəla, saka ata sə si tə mji ata sə jaktə ɗəl kəyayeri, ka bəbalayeri, ka fakayeri ar anap akwa tsəɗi ngəni.”

¹⁶Aghəla tə I ku hamta kakaɗər masə ni aka Baruk na ɓzər Neriya, antə I hara adduwa aka MTHLAKU abbər,

¹⁷“MTHLAKU na olta shang! Ga an namtə vəi na amtazi ka duniya ka dunar nga na olta shang. Su aɗi na mwavər ala gə wa.

¹⁸Ga ana ncantə hirkurər nga na ana palidzi wa ni aka mji dəpu, amma ga ana ɗi mji kamnyar bikər mjir yar ɗa. Ga an MTHLAKU na Hyel na ka Duna ta Shang.

¹⁹Ga ana ɗəmhə su ka ɗəɗukur ka hara suayeri na ol'ola. Ga ana wutə shanga su tə mji ana hara ka ntəmta watsəɓər ɗa kalkal ka su tə da hara.

²⁰Ga ku hara surndatayeri ahar Masar, suayeri tə mda ana ɗangtə ba ashina. Antə ga ku ləkəma ka harari ba ashina, akwa Israila, ka akwa nca shanga mjir duniya. Antə ga ku hara thləm atar su nayeri ni apatə tsa aɗi ashina.

²¹Ga ku thlivərantə dawayeri ar yeru atar surndatayeri tə gə hara, ka fwaɓəla mjir nga Israila akwa tsəɗi Masar atar dunar nga.

²²Ga an hamta ala ɗa tsəɗi ngəni na ɓɗaku, na ata ya su, apatə ga ku kətə alkawalari aka kəkayeri arɗa.

²³Amma aghəla tə da ku səkwa ka ndzi mthlakari, da nggəlar ta kələngkər ala gə wala nu tsawur nga. Da aɗi hara su tə gə pəla ka da hara wa, antə ga ku sənta asar nayeri ni shang ata kəra ɗa.”

²⁴“Antə wul kulini mjir Babila ku si ka kalaktə katanggar Urushalima ka bagaɗiyayeri ar mpa! Antə kamnyar mpa, ka mi, ka shilku na ata wutə mji, mjir Babila ata mzhi ngkəi bərni ni. Antə shanga su tə gə pəla ni ku hara.

²⁵Amma MTHLAKU, Hyel na ka Səli ta Shang, tsu ga an pəla kəi bara kwaba kamnyar kəi mastə bəbal ni ka mji ndzi seɗari, amma ga ku sənda abbər aɗi ata fəi wa mjir Babila ata sə ngkəi Urushalima.”

²⁶Antə MTHLAKU pəla ali,

²⁷“I an MTHLAKU na Hyelər shanga mjir duniya. Su aɗi na mwavər ali wa.

²⁸Jiri, I ata hamta bərni ngəni aka Kuthli Nebukadnezzar ar Babila ka sojayeri arni, antə da ata ngkəi ni.

²⁹Antə mjir Babila na aɓəla katangga ni ata səkwa bərni ni ka da hatə u'u. Da ata mbamta shanga mbwayeri tə mji ana mba tulari ɗuza aka haptu Baal ata kəra ɗa, ka hamta saɗakar yimər anap aka haptayeri damwa ata kəra mbwayeri ni. Kamnyar su ngəni ana thlentə hangkali ka duna.

³⁰Mjir Israila ka Yahuda aɗi ana hara su na ɓɗaku wa, tar su na ɗimi təng akwa ngkyarkurər ɗa. Su aɗi tə mjir Israila haratə wa, tar sur ɓzamtə ɗəffi.

³¹Mjir bərni ngəni ku ɓzamtə ɗəffi ka duna, təng akwa sakatə mdə nthlə di ni har ka vədza aka pci na ashina. Antə I ata shamta ni.

³²Kuthlyayeri kəga mji ol'ola, ka pristayeri kəga naɓiyayeri, ka shanga mjir Israila ka Yahuda, har kəga mji na akwa Urushalima ku hara su na ɗimi kamnyar ka da thlentə hangkali.

³³Da ku shinadzə bwahili ali. Antə wala tə I ku ləkəma ka thlipa ala ɗa, da aɗi psi thləma ɗa ka thliptə su wa.

³⁴Har da pwi haptayeri arɗa na ata hara cika aka mdə ni akwa mbwar vəngkər səli ali, ka hilantə vəi ni.

³⁵Da ku həntə bagaɗiyayeri ar hamta saɗaka aka Baal akwa Mular ɓzər Hinnon ka da hamta saɗakar maɗa' ɗa, shili ka mwanki aka haptu Molek. Amma I aɗi ɗar tsawa ala ɗa su apani wa, wala ka su laga səkwa kəri abbər ka da hara dlimburkur ngəni, har ka vu mjir Yahuda akwa hara biku ola apani wa.”

³⁶MTHLAKU na Hyelər Israila ku pəla ali, “Irmiya, shanga giri akwa pəla abbər mpa, ka mi, ka shilku ata vu ka kuthlir Babila ka sojayeri arni mzhi ngkəi bərni ngəni. Kulini psi thləma ga aka su damwa tə I ata pəlari.

³⁷I ata fwaɓəla ɗa akwa shanga tsəɗiyayeri tə I titiləmta ɗa akwa sakatə ɗəffi ɓza adzə ɗa ka duna. I ata ngka ka da akwa vəi ngəni ka da ndzəndzi lapiya.

³⁸Da ata ndzi mjirna, antə I ata ndzi Hyelər ɗa.

³⁹I ata hara ka da ndzi ka dzam duku ɗəffu duku, kamnyar ka da thlivər ɗəffi ba saka madi, kamnyar lapiyakurər ɗa ka lapiyakurər kəkayeri arɗa.

⁴⁰I ata mbwi alkawal na ba saka madi kəga da, abbər I aɗi ata zhar hara ɓɗakkur ala ɗa wa. Tsuwa I ata vu ka da thlivər ɗəffi, antə da aɗi ata shinardzi kazhar ra wa.

⁴¹I ata nggatə msərakur hara ɓɗakkur ala ɗa. I ku kətə alkawal abbər I ata hara su ka duni shang, ka ɗəffi duku, kəi jaktə nci ɗa gyang akwa tsəɗi ngəni.”

⁴²“Wala tə I ku sənta asar na mwavər ata kəra mji ngəni, vir laga I ata hara shanga su na ɓɗakɓɗaku tə I kətə alkawalari ala ɗa ni.

⁴³Mji akwa pəla tsəɗi ngəni ata sə ndzi apa mtakə tə mji wala mwaɓi aɗi ata mzhi ndzi akwa wa, ka tsuwa abbər tsəɗi ni ata ndzi akira mjir Babila. Amma mda ata sə jaktə ɗəl fakayeri akwa tsəɗi ngəni.

⁴⁴Jiri, mji ata sə mastə bəbal ka kwaba, ka da vu tsiya ɗa akwa kakaɗər masa, ka hartə ka dləɓta, ka bara mji na ata ndzi seɗar gari masə ni. Mda ata masə bəbal akwa tsəɗi Benjamin, ka azi akwa Urushalima, ka akwa bərniyayeri ar Yahuda ka akwa Negev tsuwa. Kamnyar vir laga I ata sə ngka ka gənar ɗa ala ɗa. I na MTHLAKU an pəla.”