Read bura-pabir Irmiya 33 Bible Online

Irmiya 33 - bura-pabir bible

Irmiya 33

¹Sakatə I tsu akwa pərsəna akwa bəbalər kəi kuthlikur, antə MTHLAKU ku jaktə gari ali na suɗkur.

²MTHLAKU na namtə duniya ka vəi ni ku pəla ali abbər thləmari an MTHLAKU.

³Kəga ra kamnyar kəi dlar nga, antə I ata pəla ala gə suayeri na ol'ola na ɗuwarɗuwarari tə ga aɗi səndə su ata kər wa.

⁴Kamnyar I ka suayeri tə I ata pəlari ata kəra kəyayeri na akwa Urushalima ka kəyayeri ar kuthlikur na akwa Yahuda: Giri ku huzamta ɗa abbər ka giri fatə kari ka latə katangga na ata ngkamta sojayeri ar Babila,

⁵ka səɓəla kamnyar dlər mjir Babila. Amma kamnyar tə giri ku ɓzamtə ɗəffi ka duna, I ata vu ka mjir Babila kurəmta giri, ka da nghyantə tsəɗi ni ka mshiyir giri. Su aɗi na ata damitə ra ka giri kəra wa kamnyar giri ku ndzi ɗimi.

⁶Amma wala apani vir laga I ata jaktə ngka ka Urushalima apa na waci, kəi kuri mbəlka ɗa. I ata na ɗa gəna, ka msərakur, antə da ata ndzəndzi lapiya kula thlivəra.

⁷I ata fwaɓəla mjir Yahuda ka Israila akwa mafakur kəi ngka ka da akwa tsəɗiyir ɗa, kəi namtə ɗa ka da ndzi ka duna apa na waci.

⁸I ata kəcimta shanga bikayeri tə da hara ali, I ata yafitə ɗa ata kəra shanga bikər kər ɓəɓalkur tə da hara ali.

⁹Antə bərni Urushalima ata hara kəi ndzi ka kucali ka səli ka olkur ata nca tsəɗiyayeri na akwa duniya, na ata nggatə ɓɗakkur natə I ku hara ala ɗa. Mjir duniya ata nggata ata kəra shanga suayeri na ɓɗakɓɗaku tə I ata hara aka mjir Urushalima, antə da ata thlivər ka yakata, kamnyar mjirna ata hara gəna ka ndzəndzi lapiya.

¹⁰MTHLAKU akwa pəla, “Mji akwa pəla abbər vəi ngəni ku ndzi apa mtakə na kula mda wala mwaɓi. Antə jiri da aɗi sha wa, kamnyar bərniyayeri na akwa Yahuda ka lakwayeri na akwa Urushalima ku ndzi hayang, kula mda kula mwaɓi. Amma vir laga giri ata sə nggatə

¹¹kuraka mji akwa kucali ka kumshi akwa vəi ngənayeri ni. Giri ata nggatə kuraka amaliya ka sala mwala, ka kuraka mjir ha sakatə da akwa səntə saɗakar gwaɗita akwa mbwar vəngkər səli ali. Da ata hara ha abbər, “ ‘Usar gir MTHLAKU na ka Duna ta Shang, kamnyar tsa ana hara ɓɗakkur kamnyar hirkurərni ba saka madi aɗi ana palidzi wa!’ ” “Kamnyar I ata namtə ka tsəɗi ngəni jaktə ndzi ka gəna tsu apa na waci. I na MTHLAKU an pəla.”

¹²MTHLAKU na ka Duna ta Shang akwa pəla, “Urushalima ka shanga bərniyayeri na akwa Yahuda na ku ndzi apa mtakəu, kula mda wala mwaɓi ni, ata jaktə nghyi ka mjir ɓəla na akwa wul ciɓayəri arɗa.

¹³Mji na akwa bərniyayeri na adzə ɗəɗəgəlayeri ka na ata kusar garayeri ar Yahuda, ka na akwa tsəɗi Benjamin, ka na akwa diyayeri na kalaktə Urushalima, ka shanga bərniyayeri na akwa Yahuda ata sə jaktə jika ciɓər ɗa kamnyar hangkurari. I na MTHLAKU an pəla!”

¹⁴MTHLAKU akwa pəla, “Vir laga I ata haratə suayeri na ɓɗakɓɗaku tə I kətə alkawalari aka Israila ka Yahuda.

¹⁵Ata saka ndaga I ata hara ka kuthli na pwa səɓəla akwa nyarmbwar Dauda. Antə kuthli ndaga ata hara su na kalkal ka jirkur akwa shanga tsəɗi ni.

¹⁶Vir nda mda ata msərantə mjir Yahuda, antə mjir Urushalima ata ndzəndzi lapiya kula sur thlivəra. Antə mda ata sə kəga thləma bərni ngəni abbər, ‘MTHLAKU an Mdər Mbantər Yeru.’

¹⁷Kamnyar I na MTHLAKU ku hara alkawal abbər parang kəkar Dauda an ata ndzi kuthlir Israila.

¹⁸Tsuwa parang nyarmbwar Lawi an ata ndzi ka pristayeri na ata hamta saɗaka mbamba, ka saɗakar mthli, ka saɗakayeri damwa ali.”

¹⁹Antə MTHLAKU ku gari ali ka pəla,

²⁰“Irmiya, I ku mbwi alkawal ka pci ka viri abbər da ata si akwa sakatə I thlamta ala ɗa, antə mdər mzhi ɓəli alkawal ndaga aɗi wa.

²¹Apani tsuwa antə I ku mbwi alkawal ka buɗarna Dauda abbər parang pal akwa nca kəkayeri arni an ata ndzi kuthlir Israila, ka tsuwa ka nyarmbwar Lawi abbər parang da an ata hara ali kəthlər. Antə mda aɗi ata ɓəli alkawalayeri ngəni wa.

²²Apatə mda aɗi na amzhi jikatə sasəlkayeri wa, wala mzhi jikatə wuyakər mnya manda wa, antə I ata vu ka nyarmbwa buɗarna Dauda ka pristayeri na akwa nyarmbwar Lawi yatədzi hang tə mdər mzhi jikatə ɗa aɗi wa.”

²³Antə MTHLAKU ku gari ali ka pəla,

²⁴“Irmiya, ga aɗi nggatə su tə mji nayeri ni akwa pəlari wa ya? Da akwa pəla abbər I ku nggəlar kutakəyayeri ar Israila ka Yahuda, kutakəyayeri suɗa natə I carɓəla! Antə har da ku rutə mjirna tə da namtə ɗa apa da aɗi suma wa.

²⁵Amma I na MTHLAKU ku mbwi alkawal ka pci ka viri, ka ɗəmhə tsawayeri na ata pwar duniya ka vəi na amtazi.

²⁶Antə tsu apatə I ku hara ngəni antə I ata kəsi alkawal natə I kəta aka kəkayeri ar Yakub, ka tsuwa ka Dauda na buɗarna. I ata carɓəla pal akwa nca kəkayeri ar Dauda ka tsa hara kuthlikur ata kəra kəkayeri ar Ibrahim, ka Ishaku, ka Yakub. I ata kətadzə mjirna kəi jaktə na ɗa gəna.”