Read bura-pabir Irmiya 34 Bible Online

Irmiya 34 - bura-pabir bible

Irmiya 34

¹Nebukadnezzar na kuthlir Babila ku si ka shanga sojayeri ar kuthlikurayeri na akirari, antə tsa ku dlər Urushalima ka shanga bərniyayeri na akwa Yahuda. Akwa saka ndaga antə MTHLAKU ku gari ali.

²MTHLAKU na Hyelər Israila pəla ali abbər kəi ra pəla aka Zedekiya na kuthlir Yahuda abbər, “I na MTHLAKU ata hamta bərni ngəni akwa tsiya kuthlir Babila, antə tsa ata mbamta ni.

³Ga aɗi ata msər wa. Mda ata ngkəi nga ka mwantə nga aka Nebukadnezzar, antə tsa ata gari ala gə nca ka nca. Aghəla nda mda ata mwantə nga ahar Babila.

⁴Amma wala apani, Zedekiya, MTHLAKU akwa pəla mda aɗi ata tsi nga akwa mpa wa.

⁵Ga ata sə mtər sərpəi. Tsuwa tsu apatə mji ku mba tulari ɗuza kamnyar nar olkur aka kəkayeri na kuthli akəmata ga, antə da ata hara ala ga. Da ata tuwa nga abbər, ‘Aiya, mthlakər mburu ku mti!’ I na MTHLAKU an pəla.”

⁶Antə I mwantə labar ngəni aka Kuthli Zedekiya akwa Urushalima,

⁷akwa sakatə sojayeri ar Babila ku kalaktə Urushalima. Sojayeri ar Babila ni tsuwa akwa dlər Lakish ka Azeka, bərniyayeri na mbil akwa katangga akwa Yahuda.

⁸Kuthli Zedekiya ka shanga mjir Urushalima ku ɗəmhə gari abbər da ata psi

⁹shanga mji mafayeri na mjir Ibrani, shili ka mwanki. Mdə wala duku aɗiya kəsi mdər Yahudi nvwa ni akwa mafakur wa.

¹⁰Antə shanga mji ol'olər di kəga mji na akira ɗa ku kələngkər ka da psi shanga mafayeri arɗa, tsuwa da aɗi ata vu mdər ɗa akwa mafakur kəra wa. Antə da ku psi ɗa.

¹¹Amma aghəla nda raka təng mthlakər mafayeri ni pali dzamər ɗa. Da jaktə fatə mafayeri tə da psi ni ka pu ɗa akwa mafakur ka damwa.

¹²Antə MTHLAKU

¹³na Hyelər Israila pəla ali kəi pəla aka mji abbər, “I ku hara alkawal aka kəkayeri ar giri waci sakatə I fwaɓəla ɗa akwa mafakur ahar Masar. I pəla ala ɗa abbər

¹⁴ka mdə psi kəlara mdər Ibrani na mafa aghəla tə tsa ku hara kəthlər ar məva ngkwa. Amma kəkayeri ar giri aɗi psi thləma ɗa ali wa.

¹⁵Haɗahaɗa ni antə giri tubi ka hara su na ku kəs kəri. Shanga giri ku kələngkər abbər giri ata psi maɗama' giri na mjir Israila. Har giri ku mwari akwa mbwar vəngkər səli ali ka hara ali alkawal abbər giri ata psi ɗa.

¹⁶Amma kulini giri ku ɓzamtə thləmi, kamnyar giri ku ɓəli alkawal ni ka jaktə ngka ka mji tə giri psi ni akwa mafakur.

¹⁷Antə kulini I na MTHLAKU akwa pəla abbər giri ku nggəlar ta kələngkər ali təng tə giri aɗi psi maɗama' giri mjir Israila ni wa. Antə I ata hamta ala giri msərmsərkur, watau msərmsərkur tə wala ka giri mta akwa mpa, wala ka shilku an kurəmta giri, wala ka mi an tsi giri. I ata namtə giri ka giri ndzi sur cika aka shanga mjir duniya.

¹⁸Mjir kuthlikur ar Yahuda ka na akwa Urushalima, ata kəma duku kəga mji na ol'ola akwa kəi kuthlikur, ka pristayeri, ka shanga mjir pwar akwa tsəɗi ni ku kətə alkawal ali atar təramta akwa daɓwa ɓzər gyal tə da thlau ka bwa suɗa. Amma da ku ɓəli alkawal ni ka shanga su tə mdə pəla ata kər. Apani I ata thləthlau ɗa ka bwa suɗa tsu apatə da hara aka ɓzər gyal ni.

²⁰I ata hamta ɗa akwa tsiya dawayeri arɗa, mji na akwa bara kəl mpika ɗa, ka ɗikayeri kəga mwaɓiyayeri ar mtakəu ɓɗəmnya mshiyir ɗa.

²¹Tsuwa I ata hamta Zedekiya na kuthlir Yahuda kəga mji ol'olərni akwa tsiya mji na akwa bara kəl mpika ɗa. I ata hamta ɗa akwa tsiya sojayeri ar Babila. Wala tə sojayeri ar Babila haɗa zhar dlər Urushalima

²²I ata kəgaghəl ɗa. Antə da ata dlərəmta bərni ngəni ka da mbamta ni tuktukku. I ata hara ka bərni Yahuda ndzi apa mtakəu, kula mda. I na MTHLAKU an pəla.”