Read bura-pabir Irmiya 35 Bible Online

Irmiya 35 - bura-pabir bible

Irmiya 35

¹MTHLAKU ku jaktə gari ali akwa sakatə Yehoyakim na ɓzər Yosiya an kuthlir Yahuda. Tsa pəla abbər,

²“Mwari akwa zarar mjir Rekab, kara pəla ala ɗa ka da si akwa mbwar vəngkər səli ali. Ma da ku si ka gə mwantə ɗa akwa pal akwa nca kutambwayeri na avəivəi ni kara na ala ɗa yimər anap ka da sa.”

³Antə I mwari adzə Yaazaniya ɓzər Irmiya damwa na ɓzər Habazziniya, ka maɗama'ni, ka shanga maɗashilərni, ka shanga mjir nyarmbwar Rekab,

⁴ka səntə ɗa akwa mbwar vəngkər səli. I mwantə ɗa akwa kutambwar ɓzər Hanan na ɓzər Igdaliya na mdər Hyel. Kutambwa ngəni amta kutambwar Maaseya na ɓzər Shallum, mdər sək nyarmbwa. Mbwa ni kudzəhə ka mbwar mji ol'ola na ata kəra kutakəyir kuthlikur.

⁵Antə I pwi kapayeri ka tughumayeri nghyinghyari ka yimər anap akəma ɗa, ka pəla ala ɗa, “Sa giri yimər anap ni!”

⁶Amma da shinau ka pəla, “Yeru aɗi ata sari wa, kamnyar Yonadab ɓzər Rekab na kəkar yeru ku tsawa ala yeru abbər ba saka madi yeru wala maɗa' yeru aɗiya sa yimər anap wa.

⁷Tsuwa tsa ku pəla ala yeru abbər yeru aɗiya tsa kəi wa, wala thləka wa, wala nci fakər anap wa, wala masə fakə wa. Tsa pəla ala yeru ka yeru ndzi akwa tent akwa shanga ndzəndziyir mpika yeru. Ma yeru hara apani far yeru ata fəi akwa tsəɗi ngəni.

⁸Antə yeru ku kələngkər aka shanga tsawayeri tə kəkar yeru Yonadab ku hamta ala yeru. Yeru aɗi ɗar sa yimər anap har ba ashina wa. Antə wala mwankir yeru, wala maɗa' yeru, shili ka mwanki, aɗi na ku ɗar sa yimər anap wa.

⁹Apani yeru aɗi ana la kəi kamnyar ka yeru ndzi akwa wa, tsuwa yeru aɗi ka fakər anap wa, wala bəbal fakəu, wala hwulfə wa.

¹⁰Yeru ana ndzəndzi akwa tent ka ɓəlatə shanga tsawayeri tə Yonadab na kəkar yeru ku hamta ala yeru.

¹¹Amma sakatə Kuthli Nebukadnezzar ku dlərəmta tsəɗi ni antə yeru pəla kuji ka yeru hwi ləhar Urushalima ta sojayeri ar Babila ka Siriya asə dlər yeru. An su na hara tə yeru akwa ndzəndzi akwa Urushalima ni.”

¹²Antə MTHLAKU na ka Duna ta Shang, Hyelər Israila ku pəla ali kəi ra pəla aka mjir Yahuda ka Urushalima abbər, “I na MTHLAKU akwa yu giri abbər man hara tə kəra giri aɗi ana kətə su wa ri? Tsuwa man hara tə giri aɗi ana kələngkər ali wa ri?

¹⁴Yonadab ku tsawa aka durərni abbər da aɗiya sa yimər anap wa, antə da ku kələngkər alari tə har ba ashina mda aɗi wala pal akwa nca kəkayeri arni na ana sa yimər anap wa. Amma ar giri I ku kəɗar gari ala giri, amma giri aɗi akwa kələngkər ali wa.

¹⁵I ku thlenta ala giri naɓiyayeri arna ata kər ata kər ka da pəla ala giri abbər ka waskəi zhar ɗimikurərni, ka tsa hara su na kalkal. Da ku tsaktə giri abbər giri aɗiya nu haptu wa wala kəthlər ala ɗa wa, antə giri ata mzhi ndzəndzi akwa tsəɗi tə I hamta aka kəkayeri ar giri. Amma giri aɗi psi thləma giri ka kələngkər ali wa.

¹⁶Kəkayeri ar Yonadab ku ɓəlatə tsawur kəkar ɗa, amma ar giri, giri aɗi akwa kələngkər ali wa.

¹⁷Antə kulini I na MTHLAKU na Hyelər Israila ata səntə shanga asarayeri natə I ku pəla nda ata kəra giri na mjir Yahuda ka Urushalima. I ata hara ngəni kamnyar I ku gari ala giri amma giri aɗi psi thləm wa, I ku kəga giri amma giri aɗi si wa.”

¹⁸Antə I pəla aka mjir Rekab ni abbər MTHLAKU na ka Duna ta Shang, Hyelər Israila ku pəla, “Giri ku nu shanga su tə kəkar giri Yonadab ku thlipa ala giri, ka ɓəlatə shanga tsawayeri arni.

¹⁹Kamnyar ngəni I na MTHLAKU na ka Duna ta Shang, Hyelər Israila ku kətə alkawal abbər Yonadab na ɓzər Rekab aɗi ata ni ka kəka ɓzər sal na ata hara kəthlər ali wa.”