Read bura-pabir Irmiya 36 Bible Online

Irmiya 36 - bura-pabir bible

Irmiya 36

¹Akwa məva na nfwarkur sakatə Yehoyakim na ɓzər Yosiya an kuthlir Yahuda, antə MTHLAKU pəla ali, I na Irmiya,

²“Paktə kakaɗu kara rəbutə shang su tə I pəla ala ga ata kəra Israila, ka Yahuda, ka shanga tsəɗiyayeri. Rəbutə shanga su tə I pəla ala ga, baɗitə ka su tə I pəla ala gə ntangkəma akwa sakar Kuthli Yosiya ka sənta aka pci na ashina,

³kara karata aka mjir Yahuda. Ma da ku jaktə nggatə jili suayeri na mwavər tə I ɗəmha ata kəra ɗa ni, nuhum da zhar ɗimikur tə da akwa harari ni. Antə ma da ku ngka adzə ra I ata tifəmta ala ɗa bikər ɗa.”

⁴Antə I thlentə ka Baruk na ɓzər Neriya si ka tsa dlar ra akwa rəbutə ni. Antə I pəla ka pəla alari shanga su tə MTHLAKU pəla ali antə Baruk ku rəbuta akwa kakaɗu.

⁵Antə I pəla aka Baruk abbər, “Mdə ku kəsəmta ra akwa pərsəna ka ngkata ali mwari akwa mbwar vəngkər səli.

⁶Amma I ata bara kara mwari anda sakatə mji akwa hara asham. Ka gə karatə kakaɗə ni ka kuraku kamnyar ka shanga ɗa nggatə shanga su tə MTHLAKU pəla akwa kakaɗə ni. Vir nda shanga mjir Yahuda ata tsaptədzi anda.

⁷Ɗəffa MTHLAKU ku ɓzi ka duna, antə ma da ku nggatə mwavərkur laku tə tsa ata ɗi ɗa akwa ni, nuhum da zhar hara ɗimikur ni, ka da kiɗə kəra MTHLAKU ka tsa yafitə ɗa.

⁸Antə Baruk ku hara shanga su kalkal apatə I ku pəla alari. Tsa ku kətə kakaɗə ni ka mwari akwa mbwar vəngkər səli, ka karatə su tə MTHLAKU pəla akwa.”

⁹Akwa thliya na əmdləkur ar məva na ntəfkur sakatə Yehoyakim an kuthlir Yahuda, antə mji ol'olər tsəɗi ku thlamta vir tə shanga mji na akwa Urushalima ka mji na thlata akwa bərniyayeri ar Yahuda ata si kəl asham.

¹⁰Sakatə shanga mji ku psi thləma ɗa, antə Baruk karatə shanga su tə I pəla akwa kakaɗə ni. Tsa karatə kakaɗə ni akwa mbwar vəngkər səli, akwa kutambwar Gemariya na ɓzər Shafan sakatari ar kəi kuthlikur. Kutambwa ngəni ni an akwa bəbal na amta adzə lakur ləvəi akwa Nyarfu Bilən.

¹¹Mikaiya na ɓzər Gemariya ka kəkar Shafan, ku nggatə Baruk akwa karatə su tə MTHLAKU ku pəla akwa kakaɗə ni.

¹²Antə tsa ku təra ka mwari ahar kuthli, ka ləmbwar sakatari, akwa vəi tə shanga mjir kuthlikur na ol'ola akwa tsaptədzi. Mji na ambwa nda an Elishama na sakatari, ka Delaiya na ɓzər Shemaiya, ka Elnathlan na ɓzər Akbor, ka Gemariya na ɓzər Shafan, ka Zedekiya na ɓzər Hananiya, ka shanga mji damwa na ol'ola.

¹³Antə Mikaiya ku pəla ala ɗa shanga labar tə tsa nggatə sakatə Baruk akwa karatə kakaɗə ni aka mji.

¹⁴Antə mji ol'ol ni ku thlentə Yehudi na ɓzər Nethlaniya na ɓzər Shelemiya na ɓzər Kushi ka tsa pəla aka Baruk abbər, “Kətə kakaɗə natə gə karata aka mji ni kara si.” Antə Baruk ku kətə kakaɗə ni ka sənta.

¹⁵Antə mji ol'ol ni pəla alari, “Ndzəndzi kara karata.” Antə Baruk ku karata ala ɗa kakaɗə ni.

¹⁶Sakatə da nggatə shanga ndərayeri ni, antə da thlivər ka pəla aka Baruk, “Tar ma yeru ra pəla gari ngəni aka kuthli!”

¹⁷Antə da pəla aka Baruk, “Pəla ala yeru, laku madi tə gə rəbutə labar ngəni shang nə ri? Irmiya an akwa pəla ka pəla ala gə ya?”

¹⁸Baruk shinau ala ɗa ka pəla, “Irmiya an akwa pəla ka pəla ali, antə I ku rəbuta.”

¹⁹Antə mji ol'ol ni pəla aka Baruk, “Mwari ra ɗuwardzi japwa giri ka Irmiya. Giri aɗiya hir ka mdə səndə vəi tə giri ata wa.”

²⁰Antə mji ol'ol ni ku vəi kakaɗə ni akwa mbwar Elishama na sakatari, ka mwari ka jikatə ndər ni aka kuthli.

²¹Antə kuthli ni ku thlentə Yehudi ka tsa ra səntə kakaɗə ni. Antə Yehudi ku mwari ka kətə kakaɗə ni akwa mbwar Elishama ka sənta, ka karata aka kuthli ka shanga mji ol'ol na thləthlata adzə kuthli ni.

²²Ngəni an thliya əmdla, sakar vəi mtathlaku, antə kuthli ku ndzəndzi akwa vəi ɓukci ar sakar shambar ka u'u akwa hahəi akəmari.

²³Kəlara sakatə Yehudi ku kuri karatə layi makər wala nfwar təng kuthli ni ata kəɓəla ingdla ka tsa thləthlamta vəi tə mdə kuri karatari ni ka tsa pu akwa u'u na akwa hahəi ni. Tsa ku ləkəma ka harari apani har tə tsa mbamta kakaɗə ni karkar.

²⁴Wala tə kuthli ku kəga mji ol'ol na akirari ka da nggatə labar ngəni, mda aɗi akwa nca ɗa na ku thlivər wala ncanta abbər ɗəffari ku ɓzi wa.

²⁵Wala tə Elnathlan ka Delaiya ka Gemariya ku kiɗə kəra kuthli abbər tsa aɗiya mbamta kakaɗə ni wa, tsa aɗi psi thləm ala ɗa wa.

²⁶Antə kuthli ku tsawa aka ɓzərni Yerameyel, ka Seraiya na ɓzər Aziriyel, ka Shelemiya na ɓzər Abdeyel, ka da ngkəi Baruk na sakatari ka naɓi Irmiya, amma MTHLAKU ku ɗuwar ɗa. Irmiya Ku Jaktə Rəbutə Kakaɗu Damwa

²⁷Aghəla tə Kuthli Yehoyakim ku mbamta kakaɗə na ka ndərayeri tə I pəla ka pəla aka Baruk ka tsa rəbutə ni, antə MTHLAKU jaktə pəla ali

²⁸kəi kətə kakaɗu damwa kəi jaktə rəbutə shanga su tə mdə rəbuta ata kakaɗu na ntangkəma ni.

²⁹MTHLAKU pəla ali kəi pəla aka Yehoyakim na kuthlir Yahuda abbər, “Ga ku mbamta kakaɗə ngəni ka pəla kamnyar mə tə Irmiya rəbuta abbər kuthlir Babila ata si ka tsa shamta tsəɗi ngəni ka shanga mji kəga mwaɓi na akwa ri?

³⁰Antə kulini I na MTHLAKU akwa pəla ala gə Yehoyakim abbər mda aɗi akwa nyarmbwar nga wala duku na ata sə lətə dəkəl kuthlikur ar Dauda ka ndzi kuthlir Yahuda wa. Tsuwa mda ata psəmta mshiyir nga ata pci ata bəbal ka pci mba ni təpci, ma aviri ka kəlangkə tam ni.

³¹I ata ɗi nga, ka ɗi kutakəyir nga, ka mji ol'ola na akira ga kamnyar bikayeri tə giri hara. I ku tsaktə nga ka mjir Yahuda ka mjir Urushalima abbər I ata sənta asar ata kəra giri, amma mda aɗi akwa nca giri na psi thləmari wa. Antə kulini I ata sənta asar tə I pəla nda.”

³²Antə I kətə kakaɗu damwa ka na aka Baruk na sakatariyirna antə tsa ku rəbutə shanga su tə I pəla ka pəla alari. Shanga su na ata kakaɗə natə Yehoyakim mbamta nda antə Baruk rəbuta, har ka jakəngkər ndərayeri damwa hang tsu apa nda.