Read bura-pabir Irmiya 37 Bible Online

Irmiya 37 - bura-pabir bible

Irmiya 37

¹Nebukadnezzar na kuthlir Babila ku vəi Zedekiya na ɓzər Yosiya tə tsa ndzi kuthli ata vəya Yehoyacin na ɓzər Yahoyakim.

²Amma ta tsa ya, ta mji ol'ola na akirari ya, mda aɗi akwa nca ɗa na kələngkər aka labar tə MTHLAKU pəla ali ni wa.

³Antə Kuthli Zedekiya ku thlentə Yehukal na ɓzər Shelemiya ka prist Zafaniya na ɓzər Maaseya ka da sə kiɗə ra kəi hara adduwa aka MTHLAKU ka tsa dlar yeru.

⁴Mda aɗi vu ra akwa pərsəna katagu wa, antə I tsu ana ləɓəla akwa nca mji.

⁵Ata saka ngəni sojayeri ar Babila akwa dlər Urushalima, amma sakatə da nggata abbər sojayeri ar Masar ku səɓəla kazhar tsəɗiyir ɗa akwa si təbwar ɗa akwa Yahuda, antə da zhar dlər Urushalima ka hwi.

⁶Antə MTHLAKU na Hyelər Israila pəla ali

⁷abbər, “Kuthli Zedekiya ku thlenta abbər ka gə hara ali adduwa kamnyar ka gə nggaɓəla alari su na ata hara. Antə pəla alari ‘Sojayeri ar Masar akwa si kamnyar dlar nga, amma da ata ngka akwa tsəɗi ɗa.

⁸Antə mjir Babila ata jaktə ngka ka dlər bərni ni, ka ngkəi ni, ka mbamta ni tuktukku.

⁹I na MTHLAKU ku tsaktə giri abbər giri aɗiya pwaktə kər giri ka kəta abbər mjir Babila ku təra jiri wa. Kamnyar da ata jaktə ngka.

¹⁰Kamnyar wala ma giri an ɓdləmta shanga sojayeri ar Babila na akwa dlər giri ni, ma mjir ɗa ku mbili na aɗi mtə wa akwa tentayeri arɗa, da ata thlatə ka da mbamta bərni ni.’ ”

¹¹Sojayeri ar Babila ku hwi kazhar Urushalima kamnyar tə da wutə sojayeri ar Masar akwa si.

¹²Antə I baɗitə zhar Urushalima ka mwari akwa tsəɗi Benjamin kamnyar kəi dlu bwarna akwa bəbal tə mdə hamta aka nyarmbwar yeru.

¹³Amma sakatə I mzhitə Nyarfur Benjamin, təng olər mjir səka na ka thləmari Irija na ɓzər Shelemiya na ɓzər Hananiya, thləthlatə ka iya ka ngkəi ra, ka pəla, “Ga akwa hwi ra paktə kər ka mjir Babila!”

¹⁴Antə I pəla, “Awa! I aɗi akwa ra wutə mjir Babila wa.” Amma Irija aɗi psə thləm ali wa. Antə tsa ku ngkəi ra ka mwantə ra akəma mji ol'olər tsəɗi.

¹⁵Apani ɗəffa mji ol'ol ni ku ɓzi adzə ra antə da ku vu tə mdə dlaɓu ra ka hambwa ra akwa pərsəna akwa mbwar Jonathlan na sakatari. Mdə namtə mbwar Jonathlan ni ka mbwar pərsəna.

¹⁶Mdə ku vu ra akwa mbwa na akira di antə I ku fəi anda.

¹⁷Aghəla nda antə Kuthli Zedekiya ku thlenta abbər kəi mwari. Sakatə I si akəmari antə tsa yu ra akwa ɗuwari abbər, “Su aɗi tə MTHLAKU pəla ya?” Antə I pəla, “Aɗi. Mda ata hamta nga akwa tsiya kuthlir Babila.”

¹⁸Antə I pəla, “Ka barkar nga, man tə I ɓzamta ala gə wala aka mjir nga na ol'ola, wala aka mji ngəni, natə har ka mdə vu ra akwa pərsəna ri?

¹⁹Naɓiyayeri ar ngə ni ama ri, na pəla ala ga abbər kuthlir Babila aɗi ata si dlər nga, wala tsəɗi ngə ni wa ni?

²⁰Kulini, psi thləm ali bu, ka barkar nga. I akwa kiɗa abbər usa ga aɗiya jaktə mwantə mafar nga akwa pərsəna na akwa mbwar Jonathlan ni wa. Kamnyar jiri ma I ku jaktə ngka anda I ata mta.”

²¹Antə Kuthli Zedekiya ku tsawa abbər ka mdə hartə ra akwa mbwar mjir səka na akwa kəi kuthlikur ni. Antə tədək viri mda akwa sənta ali buradi kər pal natə mda ana thlatə kəgari akwa layir ɗəl buradi, tar tə buradi kura akwa kuta bərni ni. Antə I ɗarndzi anda.