Read bura-pabir Irmiya 38 Bible Online

Irmiya 38 - bura-pabir bible

Irmiya 38

¹Vir laga Shafatiya na ɓzər Mattan, ka Gedaliya na ɓzər Pashhur, ka Yehukal na ɓzər Shelemiya, ka Pashhur na ɓzər Malkiya ku nggatə su tə I akwa pəlari aka mji abbər

²MTHLAKU ku pəla, “Kəlara mdə na ata ndzi akwa Urushalima tsa ata mta akwa mpa, wala atar mi wala shilku. Amma mdə na ku mwari ka hamta kərni aka mjir Babila, mda aɗi ata tsi ni wa. Mda ata zhar ni ka mpikari.”

³Tsuwa MTHLAKU pəla, “Jiri I ata hamta bərni ngəni akwa tsiya sojayeri ar Babila ka da ngkəi ni.”

⁴Antə mji ol'ol ni mwari adzə kuthli ni ka pəla alari, “Zhari ka mdə tsi mdə ngəni! Kamnyar atar jili gari apani tsa akwa fəi shaha sojayeri na mbila akwa di ni, tsa akwa tsi dza shanga mji. Tsa aɗi akwa bara lapiyakur ar mji wa, amma tar su na ata dəkəi ɗa.”

⁵Antə Kuthli Zedekiya pəla, “To, I ku nggati, hara gir su tə giri hir ka tsa, I amzhi ngkatə giri wa.”

⁶Antə da kətə ra ka haghəi ra akwa jiɓər Malkiya na ɓzər kuthli. Jiɓə ni akwa bəbalər mjir səka. Da haghəi ra aghəi ka səwa. Yimi aɗi akwa jiɓə ni wa tar maɓu daci, antə I ku ləghəi akwa maɓə ni.

⁷Amma Ebedmelek na mdər Ithliyopiya, natə tsa mdə ola akwa kəi kuthlikur ku nggata abbər mdə ku vu ra akwa jiɓa. Ata saka ndaga kuthli akwa hara shariya akwa Nyarfur Benjamin.

⁸Antə Ebedmelek ku hwi mwari adzə kuthli ka pəla alari,

⁹“Bundi, su tə mji ngəni hara ni aɗi ɓɗaku wa. Da psu Irmiya akwa jiɓa, vəi tə tsa ata mta kamnyar mi təng tə abaka susəma aɗi akwa kutadi kəra wa.

¹⁰Antə kuthli ku tsawa aka Ebedmelek abbər ka tsa fatə mji makər adzə ni ka da ra kəɓəla Irmiya akwa jiɓə ni akəmata tsa sə mta.”

¹¹Antə Ebedmelek ku fatə mji ni ka mwari ka da akwa kəi kuthlikur. Tsa ləkwa mbwar pwi kari ka fatə dasar ləptayeri ka mwari ata mnya jiɓə ni ka haghəi ɗa ali akwa jiɓə ni.

¹²Antə tsa pəla ali kəi pu dasar ləptu ni akwa kəjikəji ta səwa adəkəi ra. Sakatə I ku hara apatə tsa pəla ni

¹³antə da ndəkərɓəla ra akwa jiɓə ni. Antə da ngka ka iya ka vu ra akwa mbwar gadi.

¹⁴Vir laga Kuthli Zedekiya pəla abbər kəi mwari, antə tsa ku dlu ra akwa nyarfu na makərkur ar ləkwa mbwar vəngkər səli aka MTHLAKU. Antə tsa pəla, “I ata yu ngə su. Tsuwa I ata bara ka gə pəla ali jirkur.”

¹⁵Antə I shinau alari abbər, “Ma I pəla ala gə jirkur, ga ata tsi ra. Tsuwa wala I an na gə sauri, ga aɗi ata nggatari wa.”

¹⁶Antə Kuthli Zedekiya kəta ali alkawal abbər, “I akwa kahyel akwa thləma Hyel na ka mpika, Hyel na həntə mburu abbər, I aɗi ata tsi ngə wa, wala hamta nga aka mji na akwa bara kəl mpika gə wa.”

¹⁷Antə I pəla aka Zedekiya abbər MTHLAKU na Hyel na ka Duna ta Shang, Hyelər Israila akwa pəla, “Ma ga ata hamta kər nga aka mji ol'ola na akira Nebukadnezzar, mda aɗi ata tsəkwar mpika ga wala mjir kutakəyir ngə wa. Tsuwa mda aɗi ata mbamta Urushalima wa.

¹⁸Amma ma gə nggəlar hamta kər nga, mjir Babila ata ngkəi di ni ka mbamta ni tuktukku. Antə ga aɗi ata msəra ala ɗa wa.”

¹⁹Amma kuthli ni shinau ali abbər, “Ai I akwa thlivər mjir mburu na ngka adzə mjir Babila ni. Nuhum mda asə hamta ra ala ɗa ka da sə hara bwani ali.”

²⁰Antə I pəla, “Mda aɗi ata hamta nga ala ɗa wa. Ma gə kələngkər aka su tə MTHLAKU pəla, mjir Babila aɗi ata hamta nga aka mjir giri na anda wa. Shanga su ata mwa ala gə kalkal, antə su aɗi na ata tsəkwar mpika gə wa.

²¹Amma ma gə nggəlar hamta kər nga, nggədza su tə MTHLAKU ncanta ali abbər ata wutə nga:

²²Sojayeri ar Babila ata fwaɓəla shanga mwanki na mbila akwa kəi kuthlikurər nga ka da mwantə ɗa aka sojayeri na ol'ola ar Babila. Antə ma sakatə mwanki ni ata təra da ata pəla ala ga, “ ‘Pazhayeri ar kuthli tə tsa mbərsa ka da ku shamta ni akwa laku, da ku mula alari. Antə kulini səlari ku nggəla akwa maɓu, pazhayeri arni ku hwi kazhar ni.’ ”

²³“Mda ata fwaɓəla shanga mwankir nga kəga maɗa' nga ka mdə mwantə ɗa aka mjir Babila, antə wala gə ma ga aɗi ata msər wa. Kuthlir Babila ata ngkəi nga ka təra ka ga, antə mda ata mbamta di ngəni.”

²⁴Antə Zedekiya shinau ali abbər, “Ma ga ata bara mpika ga, ga aɗiya ngkər gari ngəni aka mdə damwa wala duku wa!

²⁵Nuhum kwakunayeri arna ata nggata abbər mwa ku gari, ka da yu nga ata kəra su tə mwa pəla. Da ata mzhi thlivərantə nga ka pəla abbər ma ga aɗi pəla ala ɗa su tə mwa pəla wa da ata tsi nga.

²⁶Antə təng kara pəla ala ɗa abbər ga akwa kiɗə kəri ta I jaktə ngka ka ga akwa pərsəna ka gə ra mta anda.”

²⁷Antə shanga kwakunayeri ni ku si adzə ra ka yu ra, antə I shinau ala ɗa tsu apatə kuthli ku tsawa ali. Antə da aɗi jaktə gari ali kəra wa, kamnyar mda aɗi akwa nca ɗa na nggatə su tə yeru ngkər ka kuthli ni wa.

²⁸Antə I ləkəma ka ndzəndzi akwa pərsəna ni ka vədza aka vir tə mdə dlər Urushalima ka ngkəi ni.