Read bura-pabir Irmiya 39 Bible Online

Irmiya 39 - bura-pabir bible

Irmiya 39

¹Akwa thliya na kumkur ar məva na əmdləkur ar Kuthli Zedekiya ata kəra Yahuda antə Nebukadnezzar na kuthlir Babila kəga sojayeri arni ku si ka kalaktə Urushalima ka mpa.

²Akwa məva na kumkantangkur ar Zedekiya, akwa thliya na nfwar ka virari əmdla, antə sojayeri ar Babila ku si ka baɗitə dlər Urushalima. Da ntuləmta gula ata katanggar bərni ni.

³Sakatə da ku ngkəi Urushalima, antə shanga kwakunayeri ar kuthlir Babila ku si ka ndzəndzi akwa Nyarfu na ata Ɗəffu. Mji ngəni an Nergalsharezer, ka Samgar Nebo, ka Sarsekim na olər mjir kəthlər, ka Nergalsharezer na mdər hamta sauri aka kuthli, ka mji ol'ola damwa.

⁴Sakatə Kuthli Zedekiya ka shanga sojayeri ar Yahuda ku wuta abbər mdə ku kurtə ngkəi Urushalima, antə da bara lakur hwi aviri. Da nu lakur mwari akwa gadinar kuthli, ka nggwar ləɓəla akwa nyarfu na akwa daɓwa katanggayeri suɗa na kalaktə bərni Urushalima. Antə da hwi mwari təbwar Mular Jodan.

⁵Amma sojayeri ar Babila ku nu ɗa ka kəli Zedekiya akwa bəbalər Yariko. Antə da ku ngkəi ni ka səntə ni aka Kuthli Nebukadnezzar ahar Ribla akwa tsəɗi Hamath. Anda antə kuthlir Babila ku thlamta shariya ata kərari.

⁶Antə anda ahar Ribla ni kuthlir Babila tsəgəi maɗa' Zedekiya ata ncari, ka kurəmta shanga mji ol'olər Yahuda.

⁷Aghəla nda antə tsa fwaɓəla nca Zedekiya ka mbwi ni ka məsəsal kamnyar ka mdə mwantə ni ahar Babila.

⁸Tsu akwa saka ngəni antə mjir Babila ku mbamta kəi kuthlikur, ka kəyayeri ar mji, ka ɓəgələmta katanggayeri ar Urushalima.

⁹Aghəla nda antə Nebuzaradan na olər mjir sək kəra kuthlir Babila ku fatə mji na mbili akwa bərni ni ka mwantə ɗa akwa mafakur ahar Babila.

¹⁰Tar mji na ngguɗi kula fakəu antə tsa zhari akwa Yahuda. Antə tsa na ɗa fakayeri ar anap ka fakayeri damwa tsu akwa saka ndaga.

¹¹Nebukadnezzar ku tsawa aka Nebuzaradan na olər mjir sək kərari abbər,

¹²“Mwari ra paktə Irmiya, kara wulwul ni ɓɗaku. Ga aɗiya hara su na mwavər alari wa, amma ka gə hara kəlara su tə tsa pəla ala ga.”

¹³Apani Nebuzaradan, ka Nebushazban na olər mjir kəthlər, ka Nergalsharezer na mdər hamta sauri aka kuthli, ka mjir kəthlər damwa na ol'ola akira kuthlir Babila,

¹⁴ku thlentə mji ka da ra kəɓəla ra akwa pərsəna. Da vu ra akwa tsiya Gedaliya na ɓzər Ahikam, na ɓzər Shafan abbər ka tsa mwantə ra avəyarngkəya. Apani antə I ku ndzəndzi akwa Yahuda akwa nca mjirna.

¹⁵Sakatə I tsu akwa pərsəna ni MTHLAKU ku pəla ali

¹⁶kəi ra pəla aka Ebedmelek na mdər Ithliyopiya, abbər MTHLAKU na ka Duna ta Shang, Hyelər Israila pəla, “I ata thlentə bwani aka mjir bərni ngəni tsu apatə I ku pəla. I aɗi ata thlenta ala ɗa su na ɓɗaku wa. Antə I ata haratari, ka gə wutə ka nca ga.

¹⁷Amma I, na MTHLAKU ata ɓəlatə nga, antə mda aɗi ata hamta nga akwa tsiya mji tə ga akwa thlivərari ni wa.

¹⁸Jiri, I ata ɓəlatə nga, antə mda aɗi ata tsi ngə wa. Ga ata msəra kamnyar tə ga ku mbərsa ka iya. I, na MTHLAKU an pəla!”