Read bura-pabir Irmiya 4 Bible Online

Irmiya 4 - bura-pabir bible

Irmiya 4

¹MTHLAKU akwa pəla aka mjir Israila, “Ma giri ata bara ngka, ngka giri adzə ra. Ma giri ata pumta haptayeri ar giri, ka zhar kadla,

²ma giri ata ka thləmi abbər, ‘MTHLAKU na Hyel’ akwa su na jiri, su na kalkal ka akwa su na dwaɗu. Antə shanga mambila tsəɗiyayeri ata sə bara kəi vədza ala ɗa barka, ka da hara gəna, antə da ata sə gaya ata kəri kamnyar tə da ku səndə ra.”

³MTHLAKU akwa pəla aka Yahuda ka Urushalima, “Ɗəmhə giri fakayeri ar giri kamnyar thləka, tsuwa giri aɗiya thləka akwa mtəhəra wa.

⁴Kəcimta giri ɗəffa giri ka giri si akəmi, I na MTHLAKU. Hamta gir kər giri ali shanga giri na mjir Yahuda ka Urushalima. Ma apani wa, ɗəffi ata ɓzə ka duna ka mba apa u'u tə mdər mzhi tsiyari aɗi wa, kamnyar ɗimikur tə giri hara ni.”

⁵Mbur giri təmbəl akwa shanga tsəɗi ni, Psəmnya gir ka kuraku aka mjir Urushalima ka Yahuda, ka da tsaptədzi ka hwi ləkwa diyayeri na ka katangga.

⁶Nci giri alam na ata ncantə lakur Sihiyona! Hwi giri ka giri msərəmta kula shamta saka! Kamnyar MTHLAKU ata vu ka asar na mwavər, thlata akwa yala ka shamta mji.

⁷Apatə tsəngi ana səɓəla akwa dlədləku, antə sur kurəmta durayeri ku səɓəla. Tsa ku səɓəla kamnyar shamta mjir Yahuda, ka zhar bərniyayeri arɗa tə da ndzi fya kula mda akwa.

⁸Apani ka giri hatə dasa ka giri tuwa ka kuraku, kamnyar ɗəffa MTHLAKU tsu ɓzəɓzari ka duna ata kəra Yahuda.

⁹MTHLAKU akwa pəla, “Vir nda, dza kuthlyayeri kəga kwakunayeri ata sə mta, pristayeri ata sə yakata antə naɓiyayeri ata ndatədzi.”

¹⁰Antə I pəla, “Aiyi, MTHLAKU Hyel na ka duna, kamnyar mə tə gə pwaktəmta mjir Urushalima ri. Ga ku pəla abbər da ata ndzi akwa msərakur, amma nggədza katsakar adzə wulya ɗa.”

¹¹Sakanda MTHLAKU ata sə pəla aka mjir Urushalima abbər, shambar na bwarbwar ata thlata akwa hamada ka si ata kəra ɗa. Tsa aɗi ata ndzi shambar na fyarfyara ar puhə daci wa.

¹²Shambar tə MTHLAKU ata thlentari ni ata təramta ndaga ka duna! MTHLAKU ka kərni an ata thlamta shariya ata kəra ɗa.

¹³MTHLAKU akwa pəla, abbər dawar mjir Urushalima ata sə si apa zhimaru, ka wagənər mpa arɗa apa kəwal, ka takwayeri arɗa ɓəɓatu ta dukwayeri. Asar akwa si diya! An sha mburu!

¹⁴Mjir Urushalima, kəcimta giri ɗimikur na akwa ɗəffa giri, antə giri ata mbantədzi. Tar nawa antə giri ata sə zhar dzamər ɗimikur ri?

¹⁵Mji ku thlata ahar Dan ka Gar Ifrayim akwa psəmnya labar na ɗimi.

¹⁶Da akwa tsaktə tsəɗiyayeri ka pəla aka Urushalima abbər dawayeri na thlata akwa tsəɗi na ciju ni akwa si ka kuraku ata kəra bərniyayeri ar Yahuda.

¹⁷Da akwa kalaktə Urushalima apa mjir sək kəra fakəu, kamnyar mjir MTHLAKU ku hara kər ɓəɓalkur alari. MTHLAKU an pəla.

¹⁸Yahuda, gə sur nga an ndəkərəngkər bwani ngəni aka kəra ga atar suayeri tə gə hara. Bwani ngəni an mwavər ka duna, har tə tsa ku dəkəi ɗəffa ga.

¹⁹Ai Ɗəffi! Ai ɗəffi! Ɗəffi akwa mba ra! Ɗəffi aɗi wa, Ɗəffi akwa ɓathla kəlara kəlara! I amzhi ndzi ɗiɗi wa, I akwa ngga kuraka təmbəlayeri ka kurakayeri ar dləra.

²⁰Asar akwa si ata kəra nvwani, shanga tsəɗi ni ku ndzi fya. Təkəma tentayeri ar yeru ku huzamtadzi, lapəliyayerari ku thləthləhumtadzi akwa saka duku.

²¹Nawa antə I ata msər akwa wul alamər dawayeri, ka ngga kuraka təmbəlayeri ri?

²²Kamnyar MTHLAKU akwa pəla, “Mjirna caku, da asəndə ra wa. Da maɗangkyar na kula hangkal, da aɗi ana nggaɓəla su wa Tar ɗimikur antə da masəku akwa harari, su aɗi na ɓɗaku tə da asəndə harari wa.”

²³I ku wul duniya, ka wuta abbər su aɗi akwa wa, I wul bwa na amtazi ka wuta abbər parakəu aɗi anda wa.

²⁴I ku wul garayeri, ka wutə ɗa akwa kənggəra, ka ɗəɗəgəlayeri akwa kədza bwakəma ka bwahili.

²⁵I pwi nci, amma I aɗi wutə mdə wa tsuwa shanga ɗikayeri ku fəl ka təra.

²⁶I ku wul su, ka wuta abbər mtakə na ana ya su ku ndzi mtakər hamada, tsuwa shanga bərniyayeri arni ku ndzi fya, kamnyar ɗəffa MTHLAKU na ɓzə ka duna an vu tə su ngəni hara ni.

²⁷MTHLAKU akwa pəla abbər shanga duniya ata ndzi kula mda apa fya, amma tsa aɗi ata shamta ni purəm wa.

²⁸Duniya ata sə tuwa ka shimwi, tsuwa vəi na amtazi ata ndzi kuthlu pələku, kamnyar tsa ku ɗəmhə ka pəlaɓəla təng ɗəm, antə tsa aɗi ata paliyari wala zharari wa.

²⁹Sakatə kuraka mjir taku ka mjir lali ku ndəri, shanga mji na akwa bərniyayeri ata sə hwi. Mji laga ata hwi ra ɗuwardzi akwa dlədləkwayeri, bwaduku ata lətə garayeri. Shanga kutadi ata ndzi hayang kula mda akwa.

³⁰Urushalima, mda ata shamta nga diya! Apani, man tə ga akwa jaktə harari ri, tə ga akwa mbwa zhaɓər gəna ni? Kamnyar mə tə ga akwa dəɓamtadzi ka kari dinar, ka fau tozali akwa nca gə ri? Ga akwa dəɓatə kər nga gapani. Maɗadakwiyir nga ku kurtə nggəlar nga, da akwa bara kəl mpika ga.

³¹I ku nggatə tuwa apa tuwar mwala na akwa kutərya, apa mwala na akwa ya yarakəmarni. Ngəni an laku tə Urushalima akwa tuwa, apa ɗəffari ata ləɓəla, tsa akwa haptə tsiyari, ka pəla, “Ya ɗi kəra wa! Mpikəi akwa təra akwa tsiya mjir tsi mda!”