Read bura-pabir Irmiya 40 Bible Online

Irmiya 40 - bura-pabir bible

Irmiya 40

¹Mjir Babila ku pu məsəsal akwa səli ka təra ka iya ata kəma duku kəga mjir Yahuda ka Urushalima tə da fata akwa mwantari apa mafa ahar Babila. Antə sakatə yeru thləthlata ahar Rama, təng MTHLAKU vu ka Nebuzaradan na olər mjir sək kəra kuthli ni msərantə ra.

²Nebuzaradan kəgamta ra ata tenga ka pəla ali, “MTHLAKU na Hyelər nga ku pəla tsa ata sənta asar ata kəra tsəɗi ngəni,

³antə kulini tsa ku səntə ni apatə tsa ku pəla. Kamnyar mjir giri ku hara biku aka MTHLAKU ka nggəlar ta kələngkər alari.

⁴Antə ashina I ata mpəli angkwap na akwa tsiya gə ni kəi psi nga. Ma ga an wuta abbər kalkal ka gə ləhar Babila, mwa ata mzhi mwari ka ga, antə I ata wulwul nga ɓɗaku. Amma ma gə wuta abbər aɗi kalkal wa, ga ata mzhi ndzəndzi azi. Gə msərmsərari ka gə mwari akwa kəlara bwa tə gə hir akwa tsəɗi ni.

⁵Nebukadnezzar ku carɓəla Gedaliya na ɓzər Ahikam, na ɓzər Shafan, ka tsa ndzi kuthlir Yahuda. Ga ata mzhi mwari kara ndzi adzə ni, akwa nca mji tə tsa akwa hara kuthlikur ata kəra ɗa, antə tsa ata hamta ala gə shanga su tə ga ata turari. Amma tar su tə gə cara, ga ata mzhi mwari akwa kəlara vəi tə gə hira.

⁶Antə I təra ka mwari adzə Gedaliya ahar Mizpa ka ndzi anda akwa nca mji na mbila akwa tsəɗi ni.”

⁷Sojayeri ar Yahuda aɗi na ol'ola na hwi ka ɗuwardzi akwa mtakəu kamnyar da aɗi hir hamta kərɗa akwa tsiya mjir Babila wa. Da ku nggata abbər kuthlir Babila ku vətə Gedaliya ka tsa ndzi gwamnar Yahuda, ka tsa hara kuthlikur ata kəra shili ka mwanki na ngguɗi, ka maɗangkyar natə mda aɗi fatə ka mwanta ahar Babila wa.

⁸Antə da ku si ka da kəɓa ka Gedaliya ahar Mizpa. Thləma mji ol'ola na si ni an, Ishmayel na ɓzər Nethlaniya, ka Yahwanan, ka Jonathlan na maɗa' Kareya, ka Seraiya na ɓzər ar Tanhumeth, ka maɗa' Efai na mdər Netofa, ka Yezaniya na mdər Maaka. Antə shanga ɗa kəga mjir ɗa an si.

⁹Antə Gedaliya ku kahyel ala ɗa kəga mjir ɗa abbər, “Ampaniyir thlivər hamta kər giri aka mjir Babila aɗi wa. Ndzəndzi giri akwa tsəɗi ni ka giri nu su tə kuthlir Babila pəla, antə giri ata ndzi lapiya.

¹⁰Arna I ata ndzi ahar Mizpa apa wakilər giri akəma mji ol'olər Babila na ata sə wuli ka wuli mburu. Amma ar giri, mwari giri akwa kəlara di tə giri carɓəla, ka giri ndzəndzi akwa anda. Amma ngka giri akwa diyayeri ar giri ka giri fəi sur fakər giri, apa anap, ka yar nfwayeri tə mda ana ɗəm ɗa afaku, ka mal zaitun, ka giri ɗuwar ɗa akwa kari pwi su ar giri.”

¹¹Mjir Israila na hwi ka ləha Mowab, ka Ammon, ka Edom, ka na akwa tsəɗiyayeri damwa ku nggata abbər kuthlir Babila ku zhar mji yiɗauwa akwa Yahuda, ka tsuwa abbər Gedaliya an gwamna arɗa.

¹²Antə mjir Yahudi na titiləmtadzi akwa tsəɗiyayeri damwa ni ku ngka akwa Yahuda. Sakatə da akwa si antə da thləthlata adzə Gedaliya ka ɗəmhə gariyir ɗa, kambəla da mwari akwa diyayeri arɗa, ka tsapta anap, ka yar nfwayeri tə mda ana ɗəma afaku.

¹³Aghəla nda təkəma təng Yahwanan ka shanga mji ol'olər mpa na akwa mtakə ni fatədzi ka si adzə Gedaliya ahar Mizpa

¹⁴ka pəla alari, “Ga asənda abbər Baalis na kuthlir Ammon ku thlentə Ishmayel ɓzər ar Nethlaniya ka tsa tsi ngə ya?” Amma Gedaliya aɗi mbərsa ka su tə da pəla wa.

¹⁵Antə Yahwanan na ɓzər Kareya ni ku nggwar mwari adzə Gedaliya ka pəla alari, “Ndzi kəi ra tsi Ishmayel na ɓzər Nethlaniya, antə mda aɗi na səndə mdə na hara wa. Kamnyar mə tə mda ata zhar ni ka tsa tsi ngə ri? Kamnyar ma mdə zhar tə tsa tsi nga to shanga mjir Yahudi na ngka adzə nga ka na mbil yiɗauwa akwa Yahuda ni ata titila ka sha.”

¹⁶Amma Gedaliya shinau aka Yahwanan abbər, “Ga aɗiya tsaf wa, kamnyar ga akwa thlandər ata kəra Ishmayel daci.”