Read bura-pabir Irmiya 41 Bible Online

Irmiya 41 - bura-pabir bible

Irmiya 41

¹Tsu məva nda akwa thliya na murfəkur antə Ishmayel na ɓzər Nethlaniya, na ɓzər Elishama ku si adzə Gedaliya ahar Mizpa ka sojayeri kuma. Tsa akwa nyarmbwar kuthlikur ar Yahuda, antə tsa ku ɗar ndzi pal akwa nca mji na ol'ola akwa sakar kuthli Zedekiya. Gedaliya ku kəga Ishmayel ka mjirni ka sə səm susəmər kucali aharngkiɗa. Antə sakatə da akwa səm susəm ni,

²təng Ishmayel ka mjirni na kum ni ntsuɓəla katsakarayeri arɗa ka tsi Gedaliya.

³Da tsəgəi shanga mjir Yahudi na ol'ola adzə ni ka sojayeri ar Babila na anda.

⁴Səɓəla ɗəpari, akəmata mji anggata ata kəra mtər Gedaliya,

⁵mji nciskumari ku thlata ahar Shekam, ka Shilo, ka Samariya ka si. Da shimta kumiya ɗa ka kukwahəmta ləptər ɗa, ka thləthlatə dza ɗa kamnyar ncanta abbər ɗəffa ɗa ɓzəɓzari. Da akwa səntə mthli ka tulari ɗuza akwa mbwar vəngkər səli aka MTHLAKU.

⁶Antə Ishmayel ku ləɓəla akwa nyarfur di Mizpa kamnyar ka tsa kəɓa ka da. Tsa namtə kərni apa tsa akwa tuwa, antə sakatə da kəɓa tsa pəla ala ɗa, “Sər giri ka giri wutə su na hara aka Gedaliya bu!”

⁷Səvəyir ɗa akwa kutadi, təng Ishmayel ka mjirni tsəgəi ɗa ka pumta mshiyir ɗa akwa jiɓa.

⁸Amma mji laga aɗi kuma akwa nca ɗa na pəla aka Ishmayel, “Ga aɗiya tsi yeru wa kamnyar yeru ata sənta ala ga alkama, ka barli, ka mal, ka məma tə yeru ɗuwari akwa mtakəu.” Antə tsa ku zhar tsi ɗa.

⁹Jiɓə natə Ishmayel nghyantə ka mshiyir mji tə tsa tsəgəi ni an jiɓə na ola tə Asa na kuthlir Yahuda la aka mjirni sakatə Baasha na kuthlir Israila si ka kalaktə ni ka mpa.

¹⁰Antə Ishmayel ku fatə maɗa' kuthli na maɗangkwi, ka shanga mji na mbila akwa Mizpa, mji natə Nebuzaradan olər mjir səka ku zhari akwa tsiya Gedaliya. Tsa fatə ɗa apa mafayeri ka təra ka da təbwar tsəɗi Ammon.

¹¹Yahwanan ka shanga mji na ol'olər sojayeri na ku nggatə ɗimikur tə Ishmayel harata.

¹²Antə da fatə shanga sojayeri arɗa ka nu ni, ka kəli ni adzə kufa na ola akwa Gibeyon.

¹³Sakatə mji tə Ishmayel fata apa mafayeri ni wutə Yahwanan ka mji na ol'olər mpa adzə ni, təng ɗəffa ɗa ndzi msəra ala ɗa,

¹⁴antə da shinardzi ka hwi ra wutə ɗa.

¹⁵Amma Ishmayel ka mjirni ncisu ku hwi ka msəra aka Yahwanan, ka mwari akwa tsəɗi Ammon.

¹⁶Antə Yahwanan ka mji na ol'olər mpa na adzə ni ku fatə mambila mji tə Ishmayel fata apa mafayeri ahar Mizpa aghəla tə tsa tsi Gedaliya ni ka təra ka da. Mji nayeri ni an sojayeri, ka mwanki, ka maɗangkyar, ka mji na ol'ola akwa kəi kuthlikur.

¹⁷Da akwa thlivər mjir Babila kamnyar tə Ishmayel ku tsi Gedaliya, mdə tə kuthlir Babila vətə ni gwamnar tsəɗi ni. Antə da akwa kətə lakur Masar kamnyar ka da msərəmta mjir Babila. Akwa mwar ɗa da ku thləthlata ahar Geruth Kimham kudzəhə ka Bethlelehem.