Read bura-pabir Irmiya 42 Bible Online

Irmiya 42 - bura-pabir bible

Irmiya 42

¹Antə Yahwanan na ɓzər Kareya, ka Yezaniya na ɓzər Hoshaiya, ka shanga mambila mji na ol'olər sojayeri, ol ka ntsaha ku si adzə ra

²ka pəla ali, I na Irmiya, “Usa, kiɗa ala yeru kəra MTHLAKU na Hyelər ngə bu. Kamnyar hwatu mjir Yahuda hang, amma kulini yeru mbil yiɗauwa daci apatə ga akwa wulari.

³Antə usa, kiɗa ala yeru kəra MTHLAKU na Hyelər nga ka tsa ncanta ala yeru laku tə ka yeru nuwa ka su tə ka yeru hara.”

⁴Antə I pəla ala ɗa, “I ku nggatə giri. I ata hara adduwa aka MTHLAKU na Hyelər giri apatə giri ku kiɗa, antə kəlara su tə MTHLAKU pəla ata kər, I ata pəla ala giri. Su aɗi tə I aɗi ata ɗuwarari ala giri wa.”

⁵Antə da pəla ali, “Ka MTHLAKU na Hyelər nga, natə mdər kampiku ka tsa aɗi wa ni, ndzi seɗar mburu ma yeru aɗi ɓəla shanga tsawayeri tə tsa hamta ala yeru wa.

⁶Wala su ni ku kəskəra yeru, wala aɗi kəskəra yeru wa, yeru ata kələngkər aka MTHLAKU na Hyelər yeru, natə yeru akwa pəla ka gə kiɗə kərari ala yeru ni. Kamnyar atar apani antə shanga su ata mwa kalkal ala yeru.”

⁷Aghəla vir kuma antə MTHLAKU ku gari ali,

⁸antə I ku kəga Yahwanan ka shanga mji na ol'olər sojayeri na adzə ni, ka shanga mji damwa, ol ka ntsaha.

⁹Antə I pəla ala ɗa, “MTHLAKU na Hyelər Israila tə giri thlentə ra adzə ni ni pəla,

¹⁰‘Ma giri ata hir ndzəndzi tsu akwa tsəɗi ngəni, I ata dunautə giri, I aɗi ata ɓəli səla giri wa. I ata nci giri, I aɗi ata ntsumta giri wa, kamnyar I aɗi nggatə msərakur asar tə I sənta ata kəra giri ni wa.

¹¹Giri aɗiya thlivər kuthlir Babila wa. Kamnyar I adzə giri, antə I ata msərantə giri akwa tsiyari.

¹²I ana kətadzə mda, antə I ata hara ka tsa kətadzə giri, ka zhar giri ka giri ndzəndzi tsu akwa tsəɗiyir giri.’

¹³Amma ma giri ku nggəlar kələngkər aka MTHLAKU na Hyelər giri, ka pəla, ‘Yeru aɗi ata ndzəndzi akwa Yahuda wa,’

¹⁴ka pəla giri ata ra ndzəndzi akwa tsəɗi Masar, vəi tə giri aɗi ata kəɓa ka mpa wa wala nggatə kuraka təmbələr mpa wa, wala ndzi ka mi wa,

¹⁵to nggədza su tə MTHLAKU na Hyelər Israila na ka Duna ta Shang akwa pəla aka mji na mbila akwa Yahuda. Tsa pəla, ‘Ma giri ndzangkir abbər tar ka giri ra ndzi ahar Masar,

¹⁶to mpa ka mə tə giri akwa hwiyari ni ata nu ghəla giri ka ra tsi giri anda akwa Masar.

¹⁷Shanga mji na pəla abbər tar ma da ra ndzi ahar Masar ni ata mta akwa mpa, wala atar mi wala shilku. Mda aɗi na ata mbila wala msər akwa asar tə I ata mwantari ata kəra ɗa ni wa.’ ”

¹⁸MTHLAKU na ka Duna ta Shang, Hyelər Israila pəla, “Apatə I pumta ɗəffi ata kəra mjir Urushalima, antə I ata pumta ɗəffi ata giri ma giri ku ləha Masar. Giri ata ndzi sur cika, ka sur thlivəra, ka mji kyar giri, ka nggənggəl giri. Tsuwa giri aɗi ata jaktə wutə vəi ngəni wa.

¹⁹MTHLAKU pəla, ‘Giri na mbila akwa Yahuda, giri aɗiya ləhar Masar wa.’ Antə I akwa tsaktə giri

²⁰abbər giri aɗiya kar ka gyal ka mpika giri wa. Kamnyar giri ku kiɗə ra kəi kiɗa ala giri kəra MTHLAKU na Hyelər giri, ka kətə alkawal abbər giri ata hara kəlara su tə tsa pəla ala giri.

²¹Antə kulini I ku pəla ala giri, amma giri ku nggəlar kələngkər aka shanga su tə MTHLAKU na Hyelər mburu thlentə ra abbər kəi pəla ala giri.

²²Antə ka giri ɗangta abbər jirjiri giri ata mta akwa mpa, wala atar mi, wala atar shilku akwa tsəɗi tə giri akwa bara ra ndzəndzi akwa ni.”