Read bura-pabir Irmiya 43 Bible Online

Irmiya 43 - bura-pabir bible

Irmiya 43

¹I ku kuri pəla shanga su tə MTHLAKU ku pəla ali kəi pəla ala ɗa.

²Antə Azariya na ɓzər Hoshaiya, ka Yuhanan na ɓzər Kareya, ka shanga mji na suwasuwari pəla ali, “Ga akwa thlandər. MTHLAKU na Hyelər mburu aɗi thlentə nga kara pəla ala yeru abbər ka yeru zhar ra ndzi ahar Masar wa.

³Ata ndzi Baruk na ɓzər Neriya ni an vu nga akwa gari ngəni ala yeru. Kamnyar arni tsa akwa bara ka mjir Babila ngkəi yeru, ka da tsəgəi yeru, wala ka da mwantə yeru akwa mafakur ahar Babila.”

⁴Antə Yahwanan, ka mji na ol'olər sojayeri, ka shanga mambila mji, ku nggəlar tsawur MTHLAKU na abbər ka da ndzi tsu akwa Yahuda ni.

⁵Apani Yahwanan ka shanga mji na ol'olər sojayeri ku fatə shanga mji na mbili akwa Yahuda ka mwantə ɗa ahar Masar. Mji na zhar Yahuda ni ku təra ata kəma duku kəga mji na thlata akwa tsəɗiyayeri tə da hwi ra ɗuwardzi akwa.

⁶Dlamar mji ngəni an mji shili, ka mwanki, ka maɗangkyar kəga maɗa' kuthli na maɗangkwi. Da fatə shanga mji tə Nebuzaradan na olər mjir səka zhari akwa tsiya Gedaliya, ka Baruk ka Iya.

⁷Antə da ku nggəlar ta kələngkər aka tsawur MTHLAKU, ka təra mwari ahar Masar, ka ra ndzəndzi ahar Tapanhes.

⁸Antə anda ahar Tapanhes, MTHLAKU pəla ali abbər,

⁹“Fatə pela na ol'ola akwa tsiya ga, ka gə ra nggwar ɗuwari akwa nyarfur ləvəi akwa kəi kuthlir Tapanhes ata nca mjir Yahudi.

¹⁰Kara pəla ala ɗa abbər I na MTHLAKU na ka Duna ta Shang, Hyelər Israila, I ata səntə buɗarna Nebukadnezzar na kuthlir Babila akwa vəi ngəni. I ata nci dəkəl kuthlikurərni ata kəra pelayeri ngəni tə gə ɗuwarni. Antə tsa ata pəbəlar tentər kuthlikurərni ata kəra ɗa.

¹¹Nebukadnezzar ata sə dlər Masar. Antə mji natə kalkal ka shilku tsi ɗa shilku ata tsi ɗa, mji natə kalkal ka mdə fata apa mafar mpa ka təra ka da, antə mda ata təra ka da, tsuwa mji natə kalkal ka mdə tsi ɗa akwa mpa, mda ata tsi ɗa akwa mpa.

¹²I ata vu ka tsa hatə u'u ata mashiɗayeri ar haptayeri na akwa Masar, antə tsa ata mbamta ɗa, ka fatə mjir ɗa ka təra ka da. Apatə mdər ɓəla ana ɗəməmta jangkar ata ləptərni, antə kuthlir Babila ata tsarəmta shanga su na akwa Masar karkar, ka ngka akwa tsəɗiyirni ka hangkalari.”

¹³Tsa ata pukthləmta haptu pela na ka thləmari Or tə mdə vəi akwa mbwar haptu ahar Heliyopolis akwa tsəɗi Masar. Tsa ata mbagamta mashiɗayeri ar haptayeri na akwa Masar.