Read bura-pabir Irmiya 44 Bible Online

Irmiya 44 - bura-pabir bible

Irmiya 44

¹MTHLAKU ku gari ali ata kəra mjir Israila na ka ndzi akwa bərniyayeri ar Migdol, ka Tapanhes, ka Memfis na akwa yala ar Masar, ka tsuwa aka mji na abwar anəm.

²MTHLAKU na ka Duna ta Shang, Hyelər Israila pəla, “Giri ku wutə shanga asarayeri tə I sənta ata kəra Urushalima ka shanga bərniyayeri na akwa Yahuda. Antə ba ashina da tsu fyayeri, kula mda akwa

³kamnyar ɗimikur tə mjir ɗa hara. Da ɓzamtə ɗəffi atar mba tulari ɗuza aka haptayeri ka vəngkər səli ala ɗa, haptayeri natə da wala giri wala kəkayeri ar giri aɗi ɗar vəngkər səli akari wa.

⁴Wala apani I ku thlenta ala giri naɓiyayeri natə da an buɗayeri arna ata kər ata kər, ka da tsaktə giri ta giri ahara sur cikə ngəni tə I nggəlar ni.

⁵Amma giri aɗi psi thləm wa, wala vu hangkala giri akwa wa. Giri aɗi zhar ɗimikur ar mba tulari ɗuza aka haptayeri ni wa.

⁶Kamnyar ngəni ɗəffi ku ɓzi ka duna, antə I ku hatə u'u ata bərniyayeri na akwa Yahuda ka lakwayeri na akwa Urushalima ka mbagamta ɗa. Antə kulini da ku ndzi fya, hilhilari ba ashina.

⁷Apani, I na MTHLAKU na ka Duna ta Shang, Hyelər Israila, akwa yu giri kulini abbər, Kamnyar mə tə giri akwa hara su ngəni ɗimi ni aka kəra giri ri? Giri akwa bara sənta asar ata kəra shili ka mwanki, ka maɗangkyar na ol'ola kəga na tsu ata uwa, ka mdə shamta giri shang karkar ya?

⁸Giri akwa thlentə hangkali atar vəngkər səli aka suayeri tə giri nam ka tsiya giri, kəlara sakatə giri akwa hamta saɗaka aka haptayeri ni akwa Masar, vəi tə giri si kamnyar ndzəndzi akwa. Kamnyar mə tə giri akwa hara su apani ri? Atar su apani antə giri ata kurəmta kər giri, ka shanga tsəɗiyayeri sə kumshi giri ka kathləma giri atar su na ɗimi.

⁹Giri ku fwari ɗimikur tə kəkayeri ar giri hara, ka ɗimikur tə kuthlyayeri ar Yahuda, kəga mwankir ɗa, ka ɗimikur tə giri kəga mwankir giri ku hara akwa tsəɗi Yahuda ka ata lakwayeri na akwa Urushalima ya?

¹⁰Amma ba ashina giri aɗi tərghəi kəra giri wa. Giri aɗi thlivər ɗəffi wa, wala kələngkər aka tsawayeri, wala thlipayeri tə I hamta ala giri kəga kəkayeri ar giri wa.

¹¹“Kamnyar ngəni antə I na MTHLAKU na ka Duna ta Shang, Hyelər Israila pəla, ata shinangkərdzi ata kəra giri, kəi shamta shanga giri na mjir Yahuda.

¹²I ata fatə mjir giri na ku mbil raka akwa Yahuda, na pəla tar ma da sə ndzəndzi ahar Masar, kəi tsəgəi ɗa. Shanga ɗa, ol ka ntsaha, ata kurəmtadzi akwa Masar. Da ata mtər bwani akwa mpa wala mtər mi. Da ata ndzi sur thlivəra, sur nggəla, sur səli ka sur kyartəkur.

¹³I ata ɗi shanga mji na akwa tsəɗi Masar apatə I ku ɗi mjir Urushalima atar mpa, ka mi, ka shilku.

¹⁴Mjir Yahuda na mbiləmta ka ra ndzi ahar Masar aɗi na ata msəra ka jaktə ngka akwa Yahuda ka mpikə wa. Da ata mwaɓa abbər ka da jaktə ngka, amma tar mji yiɗauwa daci an ata ngka.”

¹⁵Antə mjir Yahudi na thlata ahar Masar akwa bwar yala ka anəm ku tsaptədzi dlama dlama. Da an shanga mji shili na ku sənda abbər mwankir ɗa ku hamta saɗaka aka haptayeri, ka shanga mwanki na athləthlata anda. Antə da pəla ali abbər,

¹⁶“Yeru aɗi ata ngga labar tə ga akwa pəla ala yeru abbər thlata akəla MTHLAKU ni wa!

¹⁷Yeru ata hara shanga su tə yeru ku kətə alkawal abbər yeru ata harari. Apani yeru ata hamta saɗakayeri aka haptu kuthli mwala na amtazi. Yeru ata hamta alari saɗakar sur sa hang, tsu apatə yeru, ka kəkayeri ar yeru, ka kuthlyayeri ar yeru, kəga mji ol'olər yeru ku hara akwa bərniyayeri ar Yahuda ka lakwayeri na akwa Urushalima. Kamnyar saka nda yeru ka susəma ka gəna, antə yeru aɗi ɗar bwani wa.

¹⁸Amma təng tə yeru zhar mba tulari ɗuza aka Kuthli Mwala na amtazi, ka zhar hamta alari saɗakar sur sa, yeru aɗi jaktə wutə su wa. Antə mjir yeru ku ɗar bwani ka mta akwa mpa, bwaduku məi an kurəmta ɗa.”

¹⁹Antə mwanki jakəngkər ka pəla, “Sakatə yeru ndzi akwa Yahuda, yeru ku vəngkər səli aka haptu Kuthli Mwala na amtazi, ka hamta alari saɗakayeri ar sur sa ka ɓwa kekayeri tə mdə namta akwa dludzərni. Tsuwa shilər yeru ku kələngkər aka su nayeri ni.”

²⁰Antə I pəla aka shanga mji shili ka mwanki na gari ali ni abbər,

²¹“Giri ana wuta apa MTHLAKU aɗi sənda abbər giri kəga kəkayeri ar giri, ka kuthlyayeri, kəga mji ol'olər giri, ka mjir tsəɗi ni, ku thla haptayeri akwa bərniyayeri na akwa Yahuda ka lakwayeri na akwa Urushalima wa ya? Nənga giri ana wuta apa tsa ku fwari ri?

²²MTHLAKU aɗi mzhi mbwi ɗəffari ata kəra jili ɗimikurayeri ka adiyakur tə giri akwa harari ni wa. An su na hara tə tsəɗiyir giri ku ngka kula mda akwa apa mtakəu, ka ndzi kula ampani ni. Tsa ku ndzi sur thlivəra har tə mda ana ka thləmari ka su na ɗimi ba ashina.

²³Asar ngəni wutə giri ni kamnyar tə giri ku hamta saɗakayeri aka haptayeri, ka hara biku aka MTHLAKU. Kamnyar giri ku nggəlar ɓəla tsawurni ka suayeri tə tsa thlipa ala giri.”

²⁴Antə I pəla aka mji shang, apa mwanki ma shang wa, abbər MTHLAKU na ka Duna ta Shang, Hyelər Israila, akwa pəla aka mjir Yahuda na tsu akwa Masar: “Purəma giri kəga mwankir giri ku pəla abbər giri ata kəsi alkawal tə giri kəta aka Kuthli Mwala na amtazi. Giri ku pəla abbər giri ata hamta alari saɗakayeri ka saɗakar sur sa, antə giri ku hara. Ai giri ku hara kalkal! Təng giri ata ləkəma ka kəsi alkawalayeri ar giri alari, ka giri wuta abbər giri ku nghyaɓəla ɗa!”

²⁶“Amma ndzi kəi pəla ala giri su na ata hara. I na MTHLAKU ku kətə alkawal abbər kamnyar olkur səli tə I kəgari, I aɗi ata zhar giri na mjir Yahuda na akwa Masar ka giri jaktə kahyel ka thləmi abbər, ‘Apatə MTHLAKU na ka duna aɗi’ wa.

²⁷Kamnyar I ata wulwul giri kəi sənta asar ata kəra giri, I aɗi ata damitədzi ka lapiyakurər giri kəra wa. Shanga giri ata kurəmtadzi akwa mpa, wala atar mi, har tə wala mdə pal akwa nca giri aɗi ata mbil ka mpikə wa.

²⁸Mji yiɗauwa daci an ata msərəmta mta akwa Masar ka ngka avəi akwa tsəɗi Yahuda. Antə mjirna mbiləmta ka mpikə ni ata sə nggaɓəla mdə na ka jiri akwa nca yeru, wala Iya wala da.

²⁹Antə I na MTHLAKU ata ncaɓəla ala giri abbər I ata ɗi giri akwa vəi ngəni, kamnyar ka giri sənda abbər jirjiri I ata shamta giri.

³⁰I ata hamta Hofra na kuthlir Masar akwa tsiya dawayeri arni ka da tsi ni, tsu apatə I ku hamta Zedekiya na kuthlir Yahuda akwa tsiya dawarni Nebukadnezzar na kuthlir Babila, na ku bara kəl mpikari.”