Read bura-pabir Irmiya 46 Bible Online

Irmiya 46 - bura-pabir bible

Irmiya 46

¹MTHLAKU ku gari ali ata kəra tsəɗiyayeri na aɓəla.

²Ngəni an labar na ata kəra Masar. Akwa məva na nfwarkur tə Yehoyakim na ɓzər Yosiya akwa kuthlikur ata kəra Yahuda, antə Nebukadnezzar na kuthlir Babila ku dlər sojayeri ar Masar na akira Kuthlir Masar Neko, ka nggyari ɗa. Mpa ngəni hara ahar Karkemish adzə Thlyagha Yufiretis. Ngəni an su tə MTHLAKU pəla ata kəra sojayeri ar Masar,

³“Fatə giri partauwayeri ar giri ka giri mwari akwa mpa!

⁴Mbwatə giri sərɗu aka takwayeri ka giri fəltə ɗa. Ləkwa giri layi ka giri hatə dzakwar mpa ar giri! Tsələmta giri mwasər giri! Hatə giri kari mpa ar giri!”

⁵Antə MTHLAKU pəla, “Amma man tə I akwa wulari nə ri? Sojayeri ar Masar akwa hwi ka thlivəra. Mdə ku nggyari ɗa ka ngkaghəl ɗa. Thlivər ku ngkəi ɗa tə da ku ngka ka hwi ka huva, da aɗi shinaghəl kəma ɗa wa.

⁶Mji na ɓəɓatu da amzhi hwiyimtari wa, wala mjir duna ma da amzhi msər wa. Da ku tsagamta səla ɗa ka ndlagamtadzi, ata mnya Thlyagha Yufiretis abwar yala.

⁷Ngəni wan ata thlata apa Thlyagha Nayil, na akwa si apa pərtu na nghyi akwa puɓəladzi nə ri?

⁸Tsa an Masar na akwa thlata apa Thlyagha Nayil, apa thlyagha na ku nghyi akwa puɓəladzi. Masar ku pəla, ‘I ata thlatə kəi hartə kəra duniya. I ata shamta bərniyayeri kəga mjir ɗa.

⁹Tsawa aka mjir fəl takwayeri ni ka mjir nggur wagənayeri, ka da ləkəma ra mpa! Thlentə sojayeri ni akəma: pukəma giri mjir Ithliyopiya, ka Libiya, ka Lidiya ka partauwayeri ar ɗa ka mjir Lidiya na masəkur sha.

¹⁰Ashina an virər MTHLAKU na ka Duna ta Shang, ashina tsa ata ntə dawa, tsa ata ɗi dawayeri arni. Katsakarərni ata səm ɗa, tsa ata sa mamshir ɗa ka ndlə kəgari. Kamnyar ashina MTHLAKU na ka Duna ta Shang, ata hara saɗaka ka dawayeri arni akwa yala kudzəhə ka Thlyagha Yufiretis.’

¹¹Mjir Masar, mwari giri ahar Gileyad, ka giri ra bara kuzəku! Shanga bara kuzəkər giri ni ku ndzi gapani kuzəku aɗi na ata mbantə giri wa.

¹²Shanga tsəɗiyayeri ku nggata ata kəra sur səli na wutə nga, kəlara mdə ku nggatə nga akwa tuwa. Kəlara soja ar nga akwa ndlangkərdzi aka nvwa ni, antə japwa ɗa akwa pumtadzi ata di.”

¹³MTHLAKU ku gari ali ata kəra səyir Nebukadnezzar na kuthlir Babila kamnyar ka tsa dlər Masar. Tsa pəla,

¹⁴“Psəmnya akwa diyayeri na akwa Masar, psəmnya akwa Migdol, ka Memfis ka Tapanhes. Ɗəmhə girdzi kamnyar mbul kər giri, kamnyar mji ata si ka mpa ka kurəmta mjir giri.

¹⁵Kamnyar mə tə Haptu Apis ar giri na ka duna ni hwi ri? Kamnyar mə tə tsa aɗi nggitə thləthlatə wa ri? Tsa amzhi wa, kamnyar MTHLAKU ku ngkamta ni.

¹⁶Sojayeri ar nga ku tsamta səla ɗa ka ndlagamtadzi, antə da pəla aka nvwa ɗa, ‘Mburu angka adzə mjir mburu, akwa tsəɗi tə mdə ya mburu, ka mburu msərəmta katsakar ar dawa!’

¹⁷Hamta gir thləm gyali aka kuthlir Masar abbər, ‘Mdər mnya gapangapani har ka sakarni təramta.’

¹⁸I na MTHLAKU na ka Duna ta Shang, I an kuthli, I an Hyel na ka mpika Apatə Gar Tabor ku təramta shanga garayeri, ka apatə Gar Karmel na adzə manda an nal ta shang, antə mdə laga ata sə si natə dunari ku təramta ar mji shang.

¹⁹Ɗəmhə giri kər giri kamnyar mwari akwa mafakur, giri na mjir Masar! Kamnyar Memfis ata sə ndzi mtakəu kula mji tsa ata hila ka ndzi kula mda.

²⁰Masar ndzi apa mbəkəl thla na ɓɗaku, amma cirthla ata thlata abwar yala ka pungkərdzi alari.

²¹Wala sojayeri ar haya na akwa nca ɗa, ku ndzi apa kənayeri na təksətəksari. Shanga ɗa ku shinardzi ka hwi, mda aɗi na nggitə thləthlatə wa. Kamnyar an vir tə asar si ata kəra mjir Masar, vir tə MTHLAKU ata ɗi ɗa.

²²Masar ku nggwar ka hwi təra akwa ncaɓwi apa pwapu, sakatə dawayeri arni pungkərdzi alari ka mpa. Da pungkərdzi alari ka kəmayeri apa mjir ra jaɓ nfwa,

²³ka kurəmta ɗa apatə mda ana tadərəmta kuɓər nfwa. Wala tə da hang apa kuɓər nfwa na giring, tə mda amzhi ləkwa nca ɗa wa, mda ata kurəmta ɗa. Kamnyar dawayeri na ata si ni hang ta ntsəkwa, mda amzhi jikatə ɗa wa

²⁴Mjir Masar ata ləkwa sur səli, dawayeri na akwa yala ata ngkəi ɗa ka fatə ɗa. I na MTHLAKU an pəla.”

²⁵MTHLAKU na ka Duna ta Shang, Hyelər Israila akwa pəla, “I ata ɗi Ammon na haptər mjir Thlebes, kəi ɗi Masar, ka haptayeri kəga kuthlyayeri arni. Jiri, I ata ɗi kuthli ka shanga mji na ku mbərsa ka tsa.

²⁶I ata hamta ɗa akwa tsiya mji na akwa bara kəl mpika ɗa, akwa tsiya Nebukadnezzar na kuthlir Babila kəga sojayeri arni. Amma aghəla nda Masar ata sə jaktə nghyi ka mji apa na waci. I na MTHLAKU an pəla.”

²⁷“Amma giri na mjirna giri aɗiya thlivər wa, mjir Israila giri aɗiya yakatə wa. Kamnyar I ata fatə giri akwa tsəɗi na ciju kəi ngka ka giri avəi, I ata fwaɓəla kəkayeri ar giri akwa tsəɗi tə da akwa hara mafakur. Antə giri kəga kəkayeri ar giri ata sə ndzəndzi lapiya akwa msərakur, su aɗi na ata thlivərantə giri wa.

²⁸Antə giri aɗiya thlivər wa, kamnyar I ata vəi duku ka giri. I ata shamta shanga mjir tsəɗiyayeri tə I mwantə giri akwa nca ɗa, amma I aɗi ata shamta giri wa. I aɗi ata ndzi kula ɗi giri wa, amma I ata ɗi giri kalkal ka vəyari. I na MTHLAKU an pəla”