Read bura-pabir Irmiya 48 Bible Online

Irmiya 48 - bura-pabir bible

Irmiya 48

¹Nggədza su tə MTHLAKU na ka Duna ta Shang, Hyelər Israila, pəla ata kəra Mowab, “Sha ku wutə mjir Nebo, kamnyar di ɗa ku hili ka ndzi mtakəu! Mdə ku ngkəi Kiriyathlayim, ka huzamta diyayeri arni na ka duna ka pu mjirni akwa sur səli.

²Thləma Mowab na tuwa ka tuwa ni aɗi kəra wa. Da ku ɗəmhə ɗimikur akwa Heshbon ata kərari, abbər da ata shamta tsəɗi Mowab! Da ata hara kuzəkər tsəɗi Madmen, tsa aɗi ata ndəkə ka mpa wa.

³Nggatə giri mjir Horonayim akwa tuwa, akwa pəla, ‘Asar ka sha ku si ata kəra yeru!’ ”

⁴“Dawayeri ku huzamta Mowab, antə maɗa'ni akwa tuwa ka kuraku.

⁵Mji akwa hwi ləmta ahar Luhith ka tuwa na mwavər, ka hwi ləghəi akwa Horonayim ka tuwa kamnyar bwani.

⁶Da pəla aka hwada, ‘Hwi giri ka giri msərantə mpika giri! Ka giri ra ɗuwardzi akwa mtakəu apa nfur mtakəu!’ ”

⁷“Mjir Mowab, giri tamata abbər, duna giri ka gənar giri ata mzhi mbuli giri, amma mda ata səm giri akwa mpa. Dawar giri ata kətə haptər giri Kemosh, ka fatə pristayeri kəga mji ol'ola na ata kəra haptu ni, ka mwantə ɗa ciju akwa tsəɗi damwa apa mafayeri.

⁸Da ata huzamta shanga diyayeri, di aɗi wala duku na ata msərəmta wa, wala na akwa mular wala na ata kər gar. I na MTHLAKU an pəla.

⁹Nar giri ɓəɓəku aka Mowab, kamnyar ka tsa fəl ka təra. Kamnyar diyayeri arni ata higəlantədzi, ka ndzi kula mda apa mtakəu.”

¹⁰MTHLAKU ata shuwumta kəlara mdə na ata shishiɓər hara kəthlər tə tsa nari. Tsuwa tsa ata shuwumta kəlara mdə na ku ngka tsi akwa tsəgəi mjir Mowab.

¹¹MTHLAKU ləkəma ka pəla, “Təng akwa ngkyarkur Mowab aɗi ɗar ləkwa bwani wa. Mda aɗi ɗar fatə mjirni ka mwanta akwa mafakur wa. Mowab ndzi apa yimər anap tə mdə zhar ni ka tsa mtathla ka hangkalari akwa tughum. Tsuwa mda aɗi ana shinau ka shinaɓəla ni akwa tughum damwa wa. Nənəmkurərni ka kiskiskurərni aɗi ɗar kur wa, da msəra tsu apa na waci.

¹²“Amma kulini saka akwa si tə I na MTHLAKU ata thlentə mji ka da puɓəla mjir Mowab apatə mda ana puɓəla yimər anap. Da ata puɓəla ni kazhar tughumərni ka pukthləmta tughum ni!

¹³Antə mjir Mowab ata ləkwa səli kamnyar haptər ɗa Kemosh, tsu apatə mjir Israila ku ləkwa səli kamnyar haptər ɗa na ahar Bethlel.

¹⁴“Mjir Mowab, apa madi tə giri akwa pəla abbər giri katsalayeri, ka sojayeri na ka duna nə ri?

¹⁵Dawayeri ku dlər Mowab ka bərniyayeri arni, ka thlagamta wulya maɗadakwi na ka virər ɗa I an kuthli, MTHLAKU na ka Duna ta Shang, antə I ku pəla.

¹⁶Asar abaka si ata kəra Mowab, bwani ata si ata kərari kula shamta saka.

¹⁷Tuwa giri ni, giri na tsəɗiyayeri na kalaktə ni, ka shanga giri na asəndə laku tə thləmari tuwa akwa abbər, ‘Ai, duna kuthlikur ngəni ku ɓəli! Kuthlikurərni na ka duna ni aɗi kəra wa!’

¹⁸Giri na mjir Dibon, səghəi giri kazhar vəi ndzəndzi olkur ar giri, ka giri ndzəndzi ata di akwa bərbər! Kamnyar mdər shamta Mowab ku si, ka huzamta diyayeri ar giri na akwa katangga.

¹⁹Giri na mjir Arower, thləthlatə giri ata mnya laku ka giri səka, yu giri mji na akwa hwi təra yu giri ɗa abbər, ‘Man hara ri?’

²⁰Antə da ata pəla, ‘Mdə ku hadləmta Mowab, tuwa giri ni kamnyar tsa ku ndzi sur kətadza. Psəmnya gir ata mnya Thlyagha Arnon abbər Mowab aɗi kəra wa!’

²¹“MTHLAKU ku ɗi bərniyayeri na ata kəra gar: I ata ɗi Holon ka Yahza ka Mefaath,

²²ka Dibon ka Nebo, ka Beth Diblathlayim,

²³ka Kiriyathlayim, ka Bethgamul, ka Bethmewon,

²⁴ka Keriyoth, ka Bozra. Tsa ata ɗi shanga bərniyayeri ar Mowab na ciju ka kudzəha.

²⁵Mdə ku mirəmta Mowab, tsa aɗi ka duna kəra wa. I na MTHLAKU an pəla.”

²⁶MTHLAKU akwa pəla, “Vu giri Mowab akwa wika, kamnyar tsa namtə kərni apa tsa ku təramta ra. Antə Mowab ata ndla ka takəla akwa tapərərni ka mji kumshi ni.

²⁷Giri na mjir Mowab aɗi kumshi mjirna Israila wa ya? Kaha, giri fatə ɗa akwa nca həlayeri ya tə giri hara alari apani ni?”

²⁸“Giri na mjir Mowab, təra giri kazhar diyayeri ar giri! Mwar giri, akwa mnya garayeri ka giri ndzi akwa kuayeri apa bukəlayeri na ana la mbwar ɗa ata mnya mular.

²⁹Mjir Mowab hir kərɗa kamta! I ku nggatə laku tə da hir haptə kəra ɗa akwa, ka namta apa da an mji na səndə su ta shang. I asəndə laku tə da bəlkəu akwa ka hir olkur.

³⁰I na MTHLAKU asəndə laku tə mjir Mowab hir ncanta abbər da asəndə su ta shang. Hwavərni ni shang gapani, antə shanga su tə da akwa harari ni aɗi ata fəi wa.

³¹Antə I akwa tuwa kamnyar shanga mjir Mowab, ka mjir Kir Heres.

³²Mjir Sibma, I akwa tuwa giri təramta laku tə I tuwa mjir Yazer! Bərni Sibma ndzi apa nfur anap natə tsiyayerari ku ndərardzi ka təramta ata kəra Manda Mtəmta, har ka mzhitə Yazer. Amma dawar giri ku thlarəmta yar kamnda ka yar anap ar giri.”

³³“Mdə ku kələmta msərakur ka kucali kazhar tsəɗi Mowab na ana ya su ka duna. I ku vu ka yimər anap zhar səɓəla akwa vəi dlərari. Mda aɗi na ata kucali ka hara kuraku akwa sakar dlərari wa. Kuraku tə mda akwa harari ni aɗi kurakər kucali wa.”

³⁴“Mjir Heshbon akwa tuwa ka kuraku tə mda akwa nggatari ba ahar Eleyale ka Yahaz. Mda akwa nggatə kurakə ni ba ahar Zowar, ka Horonayim, ka Eglath Shelishiya. Wala yimər Nimrim ku shuwi.

³⁵I ata ngkatə mjir Mowab hamta saɗaka mbamba ka tulari ɗuza aka haptayeri arɗa ata kəra garayeri. I na MTHLAKU an pəla.”

³⁶“I akwa tuwa ka duna kamnyar mjir Mowab ka mjir Kir Heres kamnyar tə shanga gənar ɗa ku kuri.

³⁷Kamnyar shanga ɗa ku shimta kəra ɗa ka pamta kumiya ɗa kamnyar ɗəffa ɗa na ɓza. Shanga ɗa ku thləthluhtə tsiya ɗa tə mamshi akwa hwi, tsuwa shanga ɗa ku hatə dasa.

³⁸Su damwa aɗi tə mda akwa harari ata kəra shanga mbwayeri tə mji ana tsaptədzi akwa wa, wala akwa vəi tsaptədzi na akwa kuta Mowab wa, tar tuwa daci. Kamnyar I ku hadləmta Mowab apa maɗiya tughum na kula ampani tə mdə jaɓumta ka hadləmta.

³⁹Mdə ku huzamta Mowab! Nggatə giri mjir Mowab ni akwa tuwa! Da ku ləkwa səli! Su na wutə Mowab ni ku nthlə hyala mjir tsəɗiyayeri na kalaktə ni, wala tə tsu da akwa kumshi asar na wutə ni!”

⁴⁰Kamnyar MTHLAKU ku kətə alkawal abbər dawayeri ata sə faghəidzi ata kəra Mowab ka dlər ni kula səndərni apatə duku ana pəbəlar ɓəɓəkari ka thləl kərni ata kəra mtəka.

⁴¹Mda ata dlutsə bərniyayeri kəga diyayeri na ka duna. Vir nda wala sojayeri ar Mowab na katsala ata yakata apa mwala na akwa kutərya.

⁴²Mda ata ɓdləmta Mowab antə tsa aɗi ata ndzi tsəɗi kəra wa, kamnyar tə tsa ku namtə kərni apa tsa təramta ra.

⁴³Thlivəra, ka ku, ka dərkwayeri an ata ndzi watsəɓər mjir Mowab. I na MTHLAKU an pəla.

⁴⁴Kəlara mdə na pəla tsa ata hwi sur thlivərantə mdə ni tsa ata tərkwa ku ni, antə mdə na ku səɓəla akwa ku ni, dərku ata ngkəi ni. MTHLAKU ku thlamta sakar shamta Mowab.

⁴⁵Mjir hwi kamnyar msərantə mpika ɗa ni ku ghəri ka thləthlata ahar Heshbon, abbər ka da ɗuwardzi. Amma aɗi hara wa kamnyar u'u ku səɓəla akwa bərni Heshbon ka dlutə tsəɗi Mowab shang. U'u ndaga thlata ahar Kuthli Sihon na kuthlir Heshbon, bərni tə Sihon ɗar hara kuthlikur akwa waci. Antə u'u ni ku mbagamta shanga tsəɗi ni ka shanga mjir Mowab na hir thlentə hangkala mda ka kurakər mpa ni.

⁴⁶“Sha ku wutə giri mjir Mowab! Mdə ku kuri ka giri, giri na ana vəngkər səli aka haptu Kemosh, ka fatə maɗa' giri shili ka mwanki apa mafayeri ka təra ka da.

⁴⁷Amma vir laga I ata sə fatə mjir giri kəi ngka ka da akwa tsəɗiyir ɗa. I na MTHLAKU an pəla.” Ngəni an tsikəra labar natə MTHLAKU ku pəla ata kəra Mowab.