Read bura-pabir Irmiya 49 Bible Online

Irmiya 49 - bura-pabir bible

Irmiya 49

¹Nggədza su tə MTHLAKU pəla ata kəra Ammon, “Mjir Israila aɗi mbil na amzhi ndzi mthlakər tsəɗiyir ɗa ni wa ya?” Ma aɗi, kamnyar mə tə da zhar ka mjir nu haptu Molek dlutsə tsəɗi nyarmbwar mjir Gad, har ka da ndzəndzi akwa bərniyayeri arni ri?

²Kamnyar ngəni, saka ata sə si tə I ata hara ka mjir di kuthlikur ar Rabba nggatə kuraku ar mjir dlər ɗa. Antə Rabba ata hila ka ndzi apa mzhiku, tə diyayeri na akwa ata mbagamtadzi tuktukku. Antə mjir Israila ata jaktə dlu tsəɗiyir ɗa akəla mji na dlutsə ni.

³Tuwa giri, giri na mjir Heshbon, kamnyar mdə ku ɓdləmta bərni Ai! Tuwa giri, giri na mwankir Rabba! Hatə giri ləptər tuwa ka giri tuwa, ka tətali kamnyar hangkala giri na ndəndatədzi! Kamnyar mda ata kətə Molek na haptər giri, ka fatə pristayeri arni, ka mji ol'ola na ana kəthlər akwa mbwar haptu ni, ka mwantə ɗa akwa tsəɗi damwa.

⁴Mji kula jiri, giri ana gaya abbər mularayeri ar giri ka su ɓɗakɓɗaku hang. Giri ana vəkər ka gənar giri, ka pəla abbər mdər nggitə tsəkwar giri aɗi wa.

⁵I na MTHLAKU na ka Duna ta Shang ata vu ka suayeri na kalaktə giri ndzi sur thlivərantə giri akwa kəlara bwa. Mji ata sə kədləɓəla giri, antə waskəi ata sə tam lakurni ka hwi, antə mdər jaktə tsaptə sojayeri ar giri ata kəma duku aɗi wa.

⁶Amma aghəla nda I ata hara ka mjir Ammon jaktə ngka akwa tsəɗiyir ɗa. I na MTHLAKU an pəla.

⁷MTHLAKU na ka Duna ta Shang akwa pəla, Mjir Tema na ɗəɗu ni ləma ri? Mjir hamta sauri na kalkal ni aɗi kəra əng? Shanga ɗəɗukurər ɗa ni ku sha ya?

⁸Mjir Dedan, shina giri kəma giri ka giri hwi! Ɗuwar girdzi akwa kuayeri na zurang! Kamnyar saka ku hara tə I ata sənta asar ata kəra Edom.

⁹Kəlara sakatə mji akwa ɗəm anap, da ana zhar laga yiɗauwa ata nfwayerari kamnyar mjir hwilkəmahwilka, tsuwa kəlara sakatə həlayeri ku ɓəl kəyir mda aviri, da ana fatə su tə da akwa barari daci.

¹⁰Amma arna I ku fəi mjir Edom dura, ka kəlar vəi ɗuwardzər ɗa ata bəbal, antə da amzhi ɗuwardzi kəra wa. Maɗa'ɗa, ka maɗama' ɗa, ka ntəwulayeri arɗa ku kurəmtadzi. Mda aɗi na mbila akwa nca ɗa ka mpikə wala duku wa.

¹¹Zhar giri mutayeri ar giri ali, I ata wulwul ɗa. Tsuwa I ata dlar kughungayeri ar giri.

¹²“Kamnyar ma har mdə ku ɗi mji natə aɗi kalkal ka mdə ɗi ɗa wa, giri tamata abbər giri ata msər ya? Ahara wa, tar ka mdə ɗi giri tsuwa!

¹³Kamnyar I ku kahyel ka thləmi na ka səli abbər Bozra ata sə ndzi sur kətadza, tsa ata ndzi fya. Mji ata sə kumshi ni ka sar ni. Antə shanga diyayeri na akirari ata sə huzamtadzi ka ndzi kula ampani ba saka madi. I na MTHLAKU an pəla.”

¹⁴MTHLAKU ku hamta ali labar abbər mdə ku thlentə mdə laga ka tsa ra pəla aka tsəɗiyayeri abbər ka da ɗəmhədzi kamnyar mpa ka da tsaɓəngkərdzi ata kəra giri na mjir Edom ka mpa.

¹⁵MTHLAKU ata hara ka giri ndzi tsəɗi na raka na rutərutari ta shang akwa nca tsəɗiyayeri.

¹⁶Edom, gaya tə ga ana hara abbər mji akwa thlivər ngə ni ku daɓwi nga. Mda aɗi ana thlivər nga apatə gə tamatə ni wa. Ga ku ndzəndzi ata jikwara pela ata kəra gar. Amma wala tə ga ku latə mbwar nga nal apa duku, I ata səghəi ka ga ata di, ndə MTHLAKU.

¹⁷“Asar natə I ata thlentari ata kəra Edom ni ata ndzi ɗimi kamta, natə kəlara mdə na ata təramta adzə ni, hyalari ata nthlə ni har ka tsa ncaɓwi.

¹⁸Su na wutə Sodom ka Gomora an ata wutə bərni Edom. Apatə mdə ku shamta ɗa kəga ntəwul diyayeri arɗa antə mda ata shamta Edom. Mdər jaktə nggitə ndzi anda aɗi kəra wa. I na MTHLAKU an pəla.

¹⁹Tsu apatə tsəngi ana səɓəla akwa dlədləkur Jodan, ka pwa ata kəra ciɓər təma akwa vəi ɓəla na mirakəu, antə I ata hara su taktar kəi kədləmta mjir Edom kazhar tsəɗiyir ɗa. Antə I ata carɓəla mdə tə I hir ka tsa ndzi ata kəra tsəɗi ni. Kamnyar mda aɗi natə mda agira ka i'i wa. Tsuwa mda aɗi na amzhi yu mnyi wa, kamnyar kuthli aɗi na amzhi ngkatə ra wa.

²⁰Antə psi gir thləma giri ka giri nggatə su tə I ɗəmha ata kəra giri na mjir Edom ka mjir Teman. Wala maɗa' giri na raka raka mda ata fwaɓəla ɗa ka təra ka da, antə kəlara mda ata sə thlivəra.

²¹Kuraka ndlar Edom ata sə kənggərantə duniya, antə mda ata nggatə tuwarni ba ata mnya Manda Akaba.

²²Dawa ata sə pwa ata kəra Bozra ka mpa ka ufti apatə duku ana kəlar ɓəɓəkari ahar hyel ka səghəi ka ufti. Antə vir nda hyala sojayeri ar Edom ata nthlə ɗa apa mwala na akwa kutərya.”

²³Ngəni an su tə MTHLAKU pəla ata kəra Damaska: Tsa pəla, “Wala Mjir Hamath ka Arpad na ntəwul diyayeri arɗa ku ndatədzi kamnyar labar na ɗimi tə da nggatə ni. Hyala ɗa ku nthlə ɗa, antə da ku damitədzi ka duna. Da ku damitədzi apa mji natə shambar yimi akwa bara shamta ɗa ata kəra manda, mda aɗi natə hangkalari pəpəi wa.

²⁴Dza mjir Damaska ku ndzi mtathlaku antə da shinar kəma ɗa ka hwi. Kamnyar thlivəra, ka bwani, ka ɗəffə ɓzəɓza ku pungkərdzi ata kəra ɗa apa mwala na akwa kutərya.

²⁵Mdə ku fwari ata kəra Damaska, bərni natə thləmari ku tuwa waci, di natə I ana nggatə msərakurərni!

²⁶Vir nda dawarni ata sə kurəmta maɗadakwiyirni akwa vəyayeri ar tsaptədzi na akwa kutadi. Tsuwa mda ata kurəmta shanga sojayeri arni.

²⁷I ata hatə u'u ata katangga ar Damaska, kəi mbamta kəi kuthlikur ar Benhadad. I na MTHLAKU na ka Duna ta Shang an pəla.”

²⁸Ngəni an su tə MTHLAKU pəla ata kəra dur Kedar ka diyayeri na akira Hazor, natə Nebukadnezzar na kuthlir Babila dlərəmta ɗa ka mpa. Tsa pəla, “Mwar gir ra dlər mjir Kedar, ka giri kurəmta dur na abwar raghəi ni!

²⁹Ka giri fatə ciɓər ɗa kəga tentayeri arɗa, ka fatə lapəliyayeri arɗa ka shanga suayeri na akwa tentayeri arɗa. Tsuwa ka giri təra ka dləkəmauwayeri arɗa, ka pəla ala ɗa ka kuraku abbər, ‘Sur thlivəra ku kalaktə giri akwa kəlara bwa!’ ”

³⁰Mjir Hazor, I na MTHLAKU akwa tsaktə giri abbər ka giri hwi ka təra ciju, ka giri ra ndzi akwa kuayeri na zurang zurang. I na MTHLAKU an pəla. Kamnyar Nebukadnezzar na kuthlir Babila ku ɗəmhə su na ɗimi ata kəra giri.

³¹“Mwa giri taktar ka giri ra dlərəmta mji na wuta apa da akwa ndzəndzi lapiya ni. Da akwa ndzi akwa mtakəu shiɗa kula katangga kula nyarfu.

³²Ka giri famnya dləkəmauwayeri ka shanga mwaɓi kəi arɗa apa su gapani tə mda ana fata akwa mpa. I ata titiləmta shanga mji na ana pamta kəra ɗa abwa duku kəi mwantə ɗa akwa kəlara bwa. Tsuwa I ata sənta asar ata kəra ɗa akwa kəlara bwa.

³³Hazor ata ndzi fya ba saka madi, ka ndzi vəi ndzəndziyir kilamtaku. Mda aɗi na ata jaktə ndzəndzi anda wa.”

³⁴Təkəma aghəla tə Zedekiya ndzi kuthlir Yahuda, antə MTHLAKU ku gari ali ata kəra tsəɗi Elam.

³⁵Tsa pəla, “I ata tsəgəi shanga mjir lali natə da an dunawakur Elam.

³⁶I ata vu ka dawayeri thlata akwa kəlara bwa ka da pungkərdzi ata kəra Elam, antə I ata titiləmta mjir Elam akwa kəlara bwa. Tsəɗi aɗi kula mda ata mwantə mji ngəni akwa wa.

³⁷I ata hara ka mjir Elam thlivər dawayeri arɗa na akwa bara kəl mpika ɗa. I ata sənta asar ata kəra ɗa, kəi pumta ɗəffi na bwarbwar ni ata kəra ɗa. I ata thlentə sojayeri ata kəra ɗa har kəi kuri ka ɗa karkar.

³⁸I ata kurəmta shanga kuthlyayeri kəga mji ol'olər ɗa kəi nci dəkəl kuthlikurərna anda.

³⁹Amma aghəla nda I ata jaktə ngka ka mjir Elam akwa tsəɗiyir ɗa. I na MTHLAKU an pəla.”