Read bura-pabir Irmiya 5 Bible Online

Irmiya 5 - bura-pabir bible

Irmiya 5

¹MTHLAKU akwa pəla aka mjir Urushalima, “Dlarhə giri kutadi Urushalima ka hwi! Wul giri ba akwa kasukwayeri. Giri ata mzhi wutə mdə wala duku na kalkal ya, na ka mwaɓər ndzi ka jirkur aka Hyel? Ma aɗi I aɗi ata shamta bərni ni wa, I ata tifəmta alari.

²Wala tə giri ana ka thləmi akwa su, abbər, ‘Apatə MTHLAKU na Hyel aɗi,’ giri aɗi ana pəla jirkur wa.

³Jiri, MTHLAKU ana bara jirkur. Tsa ku ɓwara giri, amma giri ncanta abbər su aɗi damitə giri wa, tsa abaka shamta giri karkar, amma shang giri athliptə su wa. Giri ku namtə ɗəffa giri ɓəɓal apa pela, ka zhar ta tubi alari.”

⁴Antə I pəla akwa ɗəffi abbər, “Mji ngəni da ngguɗi, da səndə su wa. Da asəndə su tə MTHLAKU, na Hyelər ɗa akwa bara ka da hara wa, da asəndə tsawur Hyelər ɗa wa.

⁵I ata mwari adzə mji ol'ola, kəi gari ka da. Kamnyar arɗa da asəndə su tə MTHLAKU, na Hyelər ɗa akwa barari, da asəndə tsawayeri arni. Amma shanga ɗa ku nggəlar kələngkər aka MTHLAKU na Hyel, ka ɓələmta tsawayeri arni.

⁶An su na hara tə tsəngiyayeri na akwa kuɓər nfwa ata tsəgəi ɗa, mwaɓəlu na akwa mtakəu ata ɓɗəmnya ɗa. Tənvwa akwa wul kəra bərni ɗa, kəlara mdə na ku səɓəla akwa ka tsa thləthləhumta ni. Kamnyar bikər ɗa hang kamta, tədək saka da akwa hara kər ɓəɓalkur.”

⁷MTHLAKU akwa pəla, “Apa madi tə I ata mzhi tifəmta bikər mjirna nə ri? Da ku fwari ata kəri, ka baɗitə kathləma haptayeri apa da hyel. I ku ndlantə ɗa ka shanga su tə da ku bara, amma ba kulini da ku ləka, ka hwi ra tsaptədzi akwa mbwar karwayeri.

⁸Da ndzi apa kədəngayeri na ku ndli, na akwa bara mwala apa cicu, waskəi akwa bara mwala' ntəwulərni.

⁹Aɗi kalkal kəi ɗi ɗa kamnyar suayeri ngəni wa ya, kəi ntə dawa ata kəra jili tsəɗi ngəni?”

¹⁰I ata pəla aka dawayeri arɗa, “Mwar giri akwa fakər anap arɗa ka giri hilanta, amma giri aɗiya ɓzamtə purəm wa. Ka giri nthləgəmta tsiya anapayeri ni, kamnyar tsiyayerari ndaga aɗi arna wa.”

¹¹MTHLAKU akwa pəla, “Kamnyar mjir Israila ka mjir Yahuda ku ndzi kula jirkur ka ɓəli ra.”

¹²Da ku thlandər ata kəri akwa pəla, “Tsa aɗi ata hir zhar ka su ɗimi wutə mburu wa, asar aɗi na ata wutə mburu wa. Mpa aɗi ata wutə mburu wa, tsuwa mi aɗi ata təri wa.

¹³Da pəla abbər naɓiyayeri ni akwa mnya ɓuwa apa shambar, da aɗi akwa ngkər ndərər Hyel wa. Apani ka shanga asar tə da pəla ni ngka ata kəra ɗa sur ɗa.”

¹⁴Antə MTHLAKU Hyel na ka Duna ta Shang akwa pəla ali abbər, “Irmiya, kamnyar tə mji ngəni ku pəla su apani, I ata namtə ka ndərərna na akwa mnya ga ndzi apa u'u. Mji ni ata ndzi apa udzəm, antə u'u ni ata mbamta ɗa.”

¹⁵“Antə mjir Israila, MTHLAKU akwa səntə mjir tsəɗi laga na ciju ka da dlər giri. Tsa an tsəɗi na ka duna, tsəɗi na ku fi. Da mji tə giri anggatə mnyar ɗa wa, wala mzhi nggaɓəla su tə da akwa pəlari wa.

¹⁶Shanga ɗa sojayeri na mulmulari, kwajar ɗa nghyinghyari ka afə kuzəku na ata tsi mda.

¹⁷Da ata ɓɗəmnya sur fakər giri ka səməmnya susəmər giri, ka kurəmta maɗa' giri shili ka mwanki. Da ata ɓɗəmnya təmayeri ka thlayeri ar giri, ka thlarəmta yar nfur anap kəga kamnda ar giri. Da ata huzamta bərniyayeri ar giri na akwa katangga tə giri ana vəkər kari ni.”

¹⁸“Amma wala apani, akwa saka na ndaga”, MTHLAKU akwa pəla, “I aɗi ata shamta mjirna karkar wa,

¹⁹Ma da ku yuwa abbər, ‘Kamnyar mə tə MTHLAKU, na Hyelər yeru ku hara ala yeru su apani ri?’ Ka gə pəla ala ɗa abbər, ‘Tsu apatə giri fwari ata kəra MTHLAKU ka nu haptayeri na akwa tsəɗiyir giri, antə giri ata hara mafakur aka mətəpiyayeri akwa tsəɗi na aɓəla.’ ”

²⁰MTHLAKU akwa pəla, “Pəla aka kəkayeri ar Yakub, aka shanga mjir Yahuda:

²¹Psi gir thləma giri, kəgaɓwayeri! Giri ka nca, amma giri awutə su wa. Giri ka thləm, amma giri ana nggatə su wa.

²²Kamnyar mə tə giri athlivər ɗəffi wa ri? Kamnyar mə tə su aɗi na ana vu giri ka giri yakata akəmi wa ri? I pwi wuyaku kamnyar thlamta kəma manda na ola, wuyaku na ata ngkata alari vəi təramta ba saka madi. Wala ma yimi ni an ata pu kərni, tsa amzhi nggyariyari wa. Wala ma kərathla yimi ni bwarbwar akwa tuwa, tsa amzhi fəlɓəlari wa.

²³Amma ar giri kəra giri ɓəɓal! Giri hir thlentə hangkala mda. Giri ku nggəlar ra ka təra kazhar ra.

²⁴Giri aɗi ana thlivər ɗəffi wala raka wa, wala tə I andər na giri yimi akwa sakar səghəi vəya, ka akwa kurər vəya, ka wuta abbər giri ku wutə susəma akwa sakar fəi sur fakə tədəku.

²⁵Amma ɗimikurər giri ku ngkata ala giri suayeri ngəni ɓɗakɓɗaku ni.”

²⁶Kamnyar mji na ɗimi ɗimi aɗi akwa nca mjirna, da ana thla mji apa mjir pwi shiwa aka ɗikayeri. Da ana nggəi dərkwayeri arɗa ka ngkəi mji.

²⁷Tsu apatə mdər ngga ɗika ana nghyantə thlambəl ka ɗikayeri, antə da ku nghyantə kəyayeri arɗa ka sur zambakur. An su na hara tə da ndzi mji ol'ola ka mjir gəna ni,

²⁸tə da ndzi təksətəksari ka dza ɗa akwa mbəlmbəla ɓɗaku. Jili ɗimikur aɗiyama kula da ana hara wa. Da aɗi ana hara shariyar jirkur aka mutayeri wa, tar su na ata fəi ɗa, tsuwa da aɗi ana dlar mjir bwani ka mbuli ɗa wa.

²⁹“Antə I na MTHLAKU, kəi zhar ɗi mji ngəni ata kəra suayeri ngəni ya? Awa, I ata ntə dawa tə da hara.

³⁰Sur thlivəra na ɗimi ka duna ku hara akwa tsəɗi ni:

³¹naɓiyayeri aɗi akwa ngkər su na jirari wa, tsuwa pristayeri ana hara su tə kəra ɗa kari aka mji. Tsuwa mjirna ku wuta abbər apani ni an təramta ala ɗa. Amma da ata sə tsikərari məmə ri?”