Read bura-pabir Irmiya 50 Bible Online

Irmiya 50 - bura-pabir bible

Irmiya 50

¹Ngəni an labar tə MTHLAKU hamta ali ata kəra Babila ka mjirni.

²“Pəla labar ni aka tsəɗiyayeri! Psəmnya labar ni! Nci seɗa na ata pəlaɓəla labar ni! Ga aɗiya ɗuwar wa! Pəla abbər, ‘Dawayeri ku ngkəi Babila! Haptu Bel ku ləkwa sur səli! Mdə ku ɓəli duna Haptu Merodak! Shanga haptayeri arni ku ləkwa sur səli, ka hadləmta haptayeri na an sur cika.’ ”

³“Tsəɗi laga ata sə thlata abwar yala ka sə dlər Babila, har ka tsa namtə ni mtakəu kula mda akwa. Mji kəga mwaɓi ata sə hwi ka təra kazhar vəi, antə mda aɗi na ata sə ndzi anda wa.”

⁴MTHLAKU akwa pəla, “Ma saka ni ku hara, mjir Israila ka Yahuda ata si ata kəma duku ka tuwa. Da ata sə bara ra I na MTHLAKU na Hyelər ɗa.

⁵Da ata sə yu lakur ləha Sihiyona, ka thlentə kəma ɗa tsək abwa nda. Da ata paktə kəra ɗa ka da hara alkawal ali, alkawal na ata ndzi har ba saka madi, mdər ɓəliyari aɗi wa.”

⁶“Mjirna ku ndzi apa təmayeri natə mdər ɓəla ɗa ku zhar ɗa tə da sha akwa garayeri. Tsa zhar ɗa tə da mwa ɓiya akwa garayeri, antə da ku nu ata gar ata gar, har tə da fwari lakur ngka avəi.

⁷Shanga mji na wutə ɗa ku dlər ɗa. Dawayeri arɗa pəla, ‘Mburu aɗi ka biku kamnyar su tə mburu hara ala ɗa wa. Kamnyar da an hara biku aka MTHLAKU, na ana wulwul ɗa ka hamta ala ɗa kəlara su tə da ana tura, natə shanga kəkayeri arɗa ku vəkər ka tsa.’ ”

⁸“Amma giri na mjir Israila, hwi giri kazhar Babila! Zhar giri tsəɗi ni! Pwa giri akəma apa nciwa, ka giri mwantə mjirna akwa tsəɗiyir ɗa!

⁹I ata thlentə hangkala tsəɗiyayeri laga na ka duna abwar yala ka da dlər Babila. Antə da ata pungkərdzi alari ka ngkəi ni. Da masəku akwa sha antə afər ɗa aɗi ana pəra wa.

¹⁰Mji ata famnya kariyir Babila. Dawayeri ni ata fatə shanga su tə da akwa barari.”

¹¹MTHLAKU akwa pəla, “Mjir Babila, giri akwa kucali, tsuwa ɗəffa giri msəra ala giri kamnyar tə giri ku famnya sur mjirna. Amma wala tə giri akwa fəgəlta kamnyar kucali apa kəna na akwa vəi ɓəla na ɓɗaku, ka nggyinggya apa kədəng,

¹²bərniyir giri na ndzi apa mama' giri ni ata sə ndzi sur kətadza ka sur səli. Babila ata ndzi tsəɗi na aghəlta shang akwa nca shanga tsəɗiyayeri. Tsa ata ndzi dəli mtakər hamada na kula yimi.

¹³Kamnyar ɗəffi ku ɓzi ka duna antə mda aɗi na ata ndzi akwa Babila kəra wa. Tsa ndzi fya, tə kəlara mdə na ata təramta adza ata ndatədzi ka ncaɓwi kamnyar su na wutə ni.”

¹⁴“Ka shanga giri na mjir lali kalaktə Babila. Ka giri shishitə mjir Babila kamnyar da ku hara biku ali, I na MTHLAKU.

¹⁵Haptə gir kurakər mpa akwa kəlara bwa na kalaktə Babila! Kulini tsa ku pwi tsiyari. Mdə ku ndlagamta katangga arni ka ləvəi. Kamnyar I na MTHLAKU akwa ntə dawa tə Babila hara. Antə I ata hara alari apatə tsa ku hara aka mji damwa.

¹⁶Giri aɗiya zhar ka mdə thləka su wala thli su akwa tsəɗi Babila wa. Wala mji tə mdə fata apa mafa ka səntə ɗa akwa tsəɗi ni, ma sakatə mpa ni ku təli da ata sə thlivər ka hwi, ka ngka avəi akwa tsəɗiyir ɗa.”

¹⁷MTHLAKU akwa pəla, “Mjir Israila ku ndzi apa təmayeri natə tsəngiyayeri ku kədlə ka titiləmta. Ntangkəma kuthlir Assiriya ku pwa ata kəra ɗa ka mpa ka tsarɓəla ɗa. Antə nggədza kulini Nebukadnezzar na kuthlir Babila ku si ka hadləmta ɗa.

¹⁸Antə I na MTHLAKU na ka Duna ta Shang, Hyelər Israila ata ɗi kuthlir Babila ka shanga mjir tsəɗiyirni, tsu apatə I ku ɗi kuthlir Assiriya.

¹⁹I ata ngka ka Israila akwa tsəɗiyir ɗa. Antə da ata səm ka ndla apa təma na ata Gar Karmel ka na akwa mtakər Bashan. Da ata səm su tə da hira akwa shanga su na ptsa akwa tsəɗiyayeri ar Ifrayim ka Gileyad.

²⁰Akwa saka ndaga, mda ata sə bara ka tsa wutə mdər biku akwa Israila, amma tsa aɗi ata wutari wa. Tsuwa mda aɗi ata wutə mdər hara ɗimikur akwa Yahuda wala duku wa. Kamnyar I ata tifəmta bikər mji natə I ku mbilari ka mpika. I na MTHLAKU an pəla.”

²¹MTHLAKU akwa pəla, “Mwari gir ra dlər mjir Merathlayim ka mjir Pekod. Kurəmta gir ɗa ka giri hilantə shanga su tə da mtə kazhari. Ka giri hara shanga su tə I tsawa ala giri. I na MTHLAKU an pəla.

²²Kurakər dləra aɗi akwa tsəɗi ni, asar na ola an akwa hara!

²³Wul giri su nggwa! Babila na ndzi apa gudəma ka pupukthləmta tsəɗiyayeri, an ndlamtadzi kulini ka ndzi su hilhila. Asar na wutə Babila ni akwa thlivərantə shanga tsəɗiyayeri!

²⁴Babila, ga ku mpa ra, antə I ku nggəi ala gə dərku ka ngkəi nga akwa, wala tə ga aɗi sənda abbər mdə ku ngkəi ngə wa.

²⁵Ɗəffi ku ɓzi ka duna antə I ku kəlar mbwar pwi kari mpa arna, ka fwaɓəla kari mpa. Kamnyar I na MTHLAKU na ka Duna ta Shang, I ka kəthlər tə I akwa bara harari akwa tsəɗi Babila!

²⁶Asər giri ka giri pwa ata kərari akwa kəlara bwa, ka giri mburəmta biyayeri arni! Tsaptə giri suayeri tə giri fata ata kəma duku ka tsa ndzi apa yimər mthli tə mdə tsapta. Ɓdləmta giri tsəɗi ni karkar! Giri aɗiya zhar su wala duku wa!

²⁷Kurəmta giri shanga sojayeri arni, thlagamta giri wulya ɗa! Sha an wutə mjir Babila, kamnyar saka ku hara tə mda ata ɗi ɗa.”

²⁸Ngga giri kuraka mjir Yahuda na akwa hwi ləɓəla kazhar tsəɗi Babila. Da akwa ngkər Urushalima apatə MTHLAKU na Hyelər mburu ku ɗi mjir Babila kamnyar asar tə da hara aka mbwar vəngkər səli alari.

²⁹“Thlentə gir kuraku aka shanga mji na masəkur sha ka da ra dlər Babila. Kalaktə giri bərni ni, giri aɗiya zhar ka mdə msər wala duku wa. Ka giri hara alari bwani tsu apatə tsa ku hara aka mji, kamnyar tsa ku namtə kərni apa tsa su laga ka nggəlar ta kələngkər ali, I na MTHLAKU na Hyelər Israila na Ɓɗakkarkara.

³⁰Vir nda dawarni ata sə kurəmta maɗadakwiyirni akwa vəyayeri ar tsaptədzi na akwa kutadi. Tsuwa mda ata kurəmta shanga sojayeri arni. I na MTHLAKU an pəla.”

³¹“Babila, ga akwa ncantə kər olkur, antə I na MTHLAKU na Hyel na ka Duna ta Shang ku nggəlar nga. Antə kulini saka ku hara tə I ata ɗi nga.

³²Mjir tsəɗiyir nga na hir gaya ni ata sə tsamta səla ɗa ka ndla, tsuwa mdər sə dlar ɗa ka thlentə ɗa aɗi wa. I ata hatə u'u ata bərniyayeri ar nga, antə tsa ata mbagamta shanga suayeri na kalaktə nga.”

³³MTHLAKU na ka Duna ta Shang akwa pəla, “Mda akwa hara bwani aka mjir Israila, tsuwa mda akwa hara bwani aka mjir Yahuda. Shanga mji na ngkəi ɗa ni ku kəsəmta ɗa ɓəɓal, da aɗi akwa hir psi ɗa ka da təra wa.

³⁴Amma MTHLAKU na ka Duna ta Shang an ata sə mbuli ɗa. Tsa ata gari ata vəya ɗa kamnyar ka mdə psi ɗa. MTHLAKU ata səntə bwani ata kəra mjir Babila, amma tsa ata hamta msərakur aka mambila mji shang na akwa duniya.”

³⁵MTHLAKU akwa pəla, “Mda ata ɓdləmta Babila! Mda ata kurəmta mjirni, kuthlyayeri kəga mjir hamta sauriyirni,

³⁶Mpa ngəni ata ncaɓəla ata bəbal abbər naɓiyayeri ar giri an caku ka mjir thlandəra! Mpa ngəni ata vu ka sojayeri arni na katsala ni yakata!

³⁷Kurəmta giri takwayeri ka wagənayeri arni! Kurəmta giri shanga sojayeri tə tsa təpata akwa tsəɗiyayeri damwa kamnyar da ata ndzi kula duna apa mwanki! Pwa giri ata kəra gəna arni shang, ka giri famnya ɗa.

³⁸I ata vu ka ulta təri akwa Babila ka thlyaghayeri arni shuwumtadzi. Kamnyar tsa ka haptayeri na mwavər hang, tə mjirni hir nuwari apa da ka cicu.”

³⁹Antə shatanayeri kəga mambəl na ɗimi ɗimi an ata sə nghyantə Babila. Mji aɗi ata jaktə ndzi anda kəra wa, tsa ata ndzi mtakəu kula mji ba saka madi.

⁴⁰Su na wutə Sodom ka Gomora an ata wutə bərni Babila. Apatə I ku shamta ɗa kəga ntəwul diyayeri arɗa antə I ata shamta Babila. Mdər jaktə ndzi anda aɗi kəra wa. I na MTHLAKU an pəla.

⁴¹MTHLAKU akwa pəla, “Mjir tsəɗi na akwa yala ata sə thlatə ka si, mji na ka duna ciju akwa ɗəmhədzi kamnyar mpa.

⁴²Da sojayeri na ka lali ka mwasu, mji na kəmanggar kula kətadza. Kur səla takur ɗa ana ndəra apa kuraka manda na akwa pu kərni. Da ku ɗəmhədzi kamnyar dlər nga, Babila.

⁴³Antə kuthlir Babila pəla, ‘I ku nggatə labar ata kəra mji ngəni, antə dzi ku mti kamnyar thlivəra. Dzi akwa kətə ra ka duna apa mwala akwa kutərya.’

⁴⁴Tsu apatə tsəngi ana səɓəla akwa dlədləkur Jodan, ka pwa ata kəra ciɓər təma akwa vəi ɓəla na mirakəu, antə I ata hara su taktar kəi kədləmta mjir Babila kazhar tsəɗiyir ɗa. Antə I ata carɓəla mdə tə I hir ka tsa ndzi ata kəra tsəɗi ni. Kamnyar mda aɗi natə mda agira ka i'i wa. Tsuwa mda aɗi na amzhi yu mnyi wa, kamnyar kuthli aɗi na amzhi ngkatə ra wa.

⁴⁵Antə psi gir thləma giri ka giri nggatə su tə I ɗəmha ata kəra Babila ka mjirni. Wala maɗa' giri na raka raka mda ata fwaɓəla ɗa ka təra ka da, antə kəlara mda ata sə thlivəra.

⁴⁶Kuraka ndlar Babila ata sə kənggərantə duniya, antə mda ata nggatə tuwarni ba akwa tsəɗiyayeri damwa.”