Read bura-pabir Irmiya 51 Bible Online

Irmiya 51 - bura-pabir bible

Irmiya 51

¹MTHLAKU akwa pəla, “Apatə shambar na mwavər ana higəlantə su antə I ata mbwantə ɗəffa sojayeri laga na ata higəlantə Babila ka dəkəi mjirni.

²Vir laga I ata sə hara ka sojayeri thlata akwa kəlara bwa ka da hara asar aka tsəɗi Babila. Antə vir nda da ata dlərəmta Babila apatə shambar na mwavər ana famta di, kazhar ni ɗanɗan.

³Giri aɗiya zhar ka mdər sha shə afər ni wa, wala ka tsa hatə kari mpa arni wa. Giri aɗiya zhar maɗadakwi ar Babila ka mpikə wala duku wa. Ka giri kurəmta shanga sojayeri arni!

⁴Da ata dəkəidzi ka mtəgəmtadzi akwa lakwayeri na ol'ola akwa diyayeri ar Babila.

⁵Mjir Israila ka Yahuda ku hara biku ali, I na Hyelər ɗa. Amma wala apani, I na MTHLAKU Hyel na ka Duna ta Shang, I aɗi ata nggəlar ɗa cap wa.

⁶Hwi giri kazhar tsəɗi Babila, giri na mjir Israila ka Yahuda! Ka waskəi hwi kamnyar mpikari. Giri aɗiya hir ka mdə kurəmta giri kəga da kamnyar bikər ɗa wa. Kamnyar kulini I ata ntə dawa ata kəra mjir Babila. I ata ɗi ɗa kalkal ka bikər ɗa.

⁷Babila ku ndzi apa kwapər dinar akwa tsi, natə shanga mjir duniya ku sa su akwa ka wika apa da ka cicu.

⁸Amma təkəma Babila ku ndla ka titiləmtadzi! Tuwa giri ni! Bara gir alari kuzəkər kəta, nuhum tsa ambantədzi.

⁹Mətəpiyayeri na akwa tsəɗi nda pəla, ‘Mburu ku kəɗar ka mburu mbantə ni, amma shilkə ni aɗi akwa ngga su wa. Antə mbura təra kazhar ni, ka waskəi ngka akwa tsəɗiyirni. Kamnyar Hyel ku ɗi Babila ka duna har tə ndərari ku ndlətə duniya. Wala vəi na amtazi ku nggatə kuraka huzamtadzər ni.’ ”

¹⁰MTHLAKU akwa pəla, “Mjirna akwa pəla, ‘MTHLAKU ku ncanta abbər su tə mburu akwa harari ni kalkal. Mbura təra ra psəmnya akwa Urushalima su tə Hyelər mburu ku hara.’ ”

¹¹MTHLAKU mbwantə ɗəffa kuthlyayeri ar Mediya kamnyar tsa akwa bara shamta tsəɗi Babila. An laku tə tsa ata bara ɗi mji na huzamta mbwar vəngkər səli alari. Mji na ol'olər mpa tsawa aka sojayeri abbər, “Tsələmta giri afayeri ar giri! Ɗəmhə giri partauwayeri ar giri!

¹²Haptə gir alam ar mpa aka Babila! Dunautə giri vəi səkə ni! Pwi giri mjir səka! Pwi giri mji na ata thla laku!” Kamnyar MTHLAKU ata haratə su tə tsa pəla tsa ata sə hara aka tsəɗi Babila.

¹³Tsəɗi Babila ka thlyaghayeri hang ka gəna tsuwa, amma sakarni ku hara, antə mda ata thlamta səwur mpikari.

¹⁴MTHLAKU na ka Duna ta Shang ku kahyel ka thləmari na ka səli abbər tsa ata səntə mji hang apa bəri ntsəkwa ka da dlər Babila. Antə da ata səm Babila ka yarali ata kərari.

¹⁵MTHLAKU an namtə duniya ka dunari. Atar ɗəɗukurərni antə tsa ku nci duniya, ka pəbəlar vəyayeri na amtazi atar səndərni.

¹⁶Ma tsa ku ndəri yimayeri na amtazi ana putə kuraku, tsa ana səntə dlambayeri na akwa datər duniya. Tsa ana hara ka wurkə mbəla akwa yimərhyel, ka kəgaɓəla shambar yimi akwa mbwar pwi ɗa.

¹⁷Amma wala apani mdə ku ndzi kəgaɓu kula səndər su, shanga ɗeagha ɓdlə haptu dinar ku ləkwa səli, kamnyar haptayeri antə da namta, aɗi Hyel wa, da aɗi ka mpikə wa.

¹⁸Ampaniyir haptu aɗi wa, da sur pwaktə mdə daci, saka ata sə hara tə MTHLAKU ata shamta ɗa.

¹⁹Hyelər Yakub zum ka haptu nayeri ni, kamnyar tsa an namtə shanga su, ka carɓəla mjir Israila ka da ndzi mjirni. MTHLAKU na ka Duna an thləmari.

²⁰MTHLAKU akwa pəla, “Babila ga an gudəma na, ga an kari mparna. I ana pukthləmta tsəɗiyayeri ka ga, kəi shamta kuthlikurayeri.

²¹Ka ga antə I ata titiləmta shanga sojayeri, takwayeri kəga mjir fəlari, ka wagənayeri kəga mjir nggurari.

²²Ka ga antə I ata titiləmta shili ka mwanki, mji halhala kəga kustayeri, maɗangkwi kəga maɗashili.

²³Ka ga antə I ata titiləmta mjir ɓəla ka ciɓər ɗa, mjir tsuhwa kəga thlar tsuhur ɗa, mjir kuthlikur kəga mji ol'ola.”

²⁴MTHLAKU akwa pəla, “Giri ata wutari ka nca giri laku tə I ata ntə dawa tə mjir Babila hara aka mjirna akwa Urushalima.

²⁵Babila, ga ku ndzi ka duna apa gar, ka hadləmta tsəɗiyayeri, amma I ata mpa nga. I ata tamtə nga, kəi pthlə nga ata di. I ata mbamta nga tuktukku kara ndzi mpur pənju.

²⁶Mda aɗi ata jaktə mzhi kəthlər ka pelar zawar ar nga akwa hən mbwa wa, wala akwa kuɗəma wala akwa nci səla mbwa wa. Ga ata ndzi kula ampani ba saka madi. I na MTHLAKU an pəla.”

²⁷“Haptə gir alam na ata ncanta aka tsəɗiyayeri abbər ka da ɗəmhədzər dlər Babila. Mbur giri təmbəl ala ɗa ka da səndə sakar mwari akwa dlər ni. Pəla aka kuthlikurayeri ar Ararat, ka Minni, ka Ashkenaz, ka da ra dlər Babila. Vəi giri katsalar mpa na ata pwar giri akwa mpa ni. Mwar giri, kəga takwayeri dlama dlama apa bəri ntsəkwa.

²⁸Thlentə giri aka kuthlyayeri, ka gwamnayeri, ka mji na ol'olər mpa, ka sojayeri ar Mediya, ka shanga sojayeri ar tsəɗiyayeri na akirari, ka da ɗəmhədzər dlər Babila.

²⁹Babila ata yakata ka kədza kamnyar bwaniyir kəta. Kamnyar su tə MTHLAKU pəla abbər tsa ata sə hara aka Babila ni ku hara kulini. Tsəɗi Babila ata ndzi kula mda apa mtakəu.

³⁰Sojayeri ar Babila ku zhar mpa ka ra ɗuwardzi akwa kəyayeri arɗa na ka duna. Duna ɗa ku kuri antə da ku ndzi apa mwanki. Mjir dlər ni ku mwari ka ɓəgələmta nyarfayeri ar bərni, ka mbagamta kəyayeri arɗa.

³¹Mjir thlenta ata kər ata kər ku hwi ra jikata aka kuthlir Babila abbər mjir dləra ku ɓəl bərniyirni ka puvidzi akwa kəlara bwa.

³²Dawayeri ku hagartə shanga lakur fəlɓəla zərkayeri antə lakur msərəmta aɗi wa. Da hagatə u'u ata kəyayeri na ka duna, antə sojayeri ar Babila ku yakata ka duna.

³³Mjir Babila ndzi apa laliyir dəkə mthli. Kəlara sakatə mdə ku lətə lali ni aɗi ata fəi wa mda ata baɗitə dəkə mthli ata. Apani, mdə ku ntsari Babila, antə aɗi ata fəi wa dawayeri ata fəi ni.”

³⁴Mjir Urushalima pəla, “Kuthli Nebukadnezzar ku kurəmta mjir yeru, ka ndəndatə hangkala yeru. Tsa ku titiləmta yeru ka namtə di yeru fya, ka ndasəmnya yeru apatə jang ana hara. Tsa fatə sur yeru na msəramsəra ka nghyantə kutari kəgari, ka kədləɓəla yeru kazhar tsəɗi yeru.

³⁵Ka ɗimikur tə Babila hara ala yeru kəga yangkura yeru ni ngka tsu ata kərari. Ka mjir Babila ɗar bwani ka duna kamnyar bwani tə da hara ala yeru ni.”

³⁶Antə MTHLAKU pəla aka mjir Urushalima, “I ata mbwa ala giri kir, kəi vu ka dawayeri ar giri ɗar bwani kamnyar ɗimikur tə da hara ala giri. I ata shuwumta mandar ni, kəi ulantə vəi kucirkila arni.

³⁷Antə Babila ata ndzi həi zawar tsaptsaɓa, ka vəi ɓukcir ufwayeri. Tsa ata ndzi sur thlivəra ka sur ɓzamtə ɗəffu. Mda aɗi wala duku na ata ndzi anda wa.

³⁸Mjir Babila shang akwa tuwa ka kurakər mpa apa maɗa' tsəngi.

³⁹Sakatə mi ku tsa ɗa ka duna, I ata ɗəmha ala ɗa susəma, ka da sa ka wika, har ka da hara sur kumshi aka mji. Ma da ku heni da amzhi thlatə kəra wa.

⁴⁰I ata mwantə ɗa aka mdər thla wulya mwaɓi, ka mdə thlamta wulya ɗa apa təmayeri, ka kwiyayeri, ka gamayeri. I na MTHLAKU an pəla.”

⁴¹MTHLAKU akwa pəla, “Babila an bərni na ola natə duniya ana huwa, amma nggədza ni kulini tsa ku ndla ka ndzi surndata aka mji!

⁴²Dawayeri ar Babila ata sə si ka kuraku ka duna ata kəma duku apa pərtu na thlata akwa manda, ka da hartə tsəɗi ni.

⁴³Asar na wutə bərniyayeri ni ata thlivərantə mda. Da ata ndzi kula mda apa dəli hamada, natə wala təramta ndzang, mda aɗi na ata sə təramta akwa wa.

⁴⁴I ata ɗi Bel na haptər mjir Babila, kəi vu ni ka tsa haɓəla suayeri tə tsa həgəlta. Mji aɗi ata jaktə fadzi akwa tsəɗiyayeri ka sə vəngkər səli alari kəra wa. “Katangga ar Babila ku ndla.

⁴⁵Mjir Israila, səɓəla giri, ka giri hwi kazhar Babila! Ka waskəi hwi tə mpikari kwabə I apumta ɗəffi na bwarbwar ni ata kəra Babila.

⁴⁶Hyala giri aɗiya nthlə giri wa, wala ka dza giri mtə kamnyar su tə mji akwa pəlari wa. Kamnyar parang məva giri ata nggatə su bilən tə mji ata ngkərari. Mji ata sə ngkərari abbər mji akwa mpa akwa tsəɗi, abbər kuthli akwa mpa ka kuthli nvwani.

⁴⁷Kamnyar saka akwa si tə I ata sə lətə kəra haptayeri ar Babila. Shanga tsəɗi ni ata ləkwa sur səli kamnyar mda ata kurəmta mjirni shang ka pumta mshiyir ɗa akwa kutadi.

⁴⁸Antə vəi na amtazi, ka duniya, ka shanga suayeri na akwa ata hara har kucali ata kəra Babila sakatə mji na abwar yala ku si ka dlərəmta ni.

⁴⁹Mjir Babila ku kurəmta mjir Israila ka mji damwa hang akwa duniya, antə kulini mda ata kurəmta mjir Babila tsuwa. I na MTHLAKU an pəla.”

⁵⁰MTHLAKU akwa pəla aka mjirni na akwa Babila, “Giri ku msərəmta mta! Antə mwa giri ka giri təra, giri aɗiya shamta saka wa! Wala tə giri ciju ka di giri, ka giri ɗangtə thləmi, I na MTHLAKU ar giri, ka dzama ata kəra Urushalima.”

⁵¹Giri akwa pəla, “Mji ku hara kyartəkur ala yeru ka kəli səliyir yeru. Mətəpiyayeri ku si ka dlutsə mbwar vəngkər səli aka MTHLAKU, ka tsi duna yeru.

⁵²Antə jiri saka akwa si tə I ata lətə kəra haptayeri ar Babila, antə mji tə I dəkəi ɗa akwa kəlara bwa akwa tsəɗi ata sə tuwa.

⁵³Wala ma Babila an ləmta aharhyel, ka həntə kəi na ka duna anda, tsu I ata thlentə dawayeri alari ka da ra huzamta ni. I na MTHLAKU an pəla.”

⁵⁴MTHLAKU akwa pəla, Ngga kuraka mjir Babila akwa tuwa, da akwa tuwa asar na wutə tsəɗiyir ɗa.

⁵⁵I akwa hilantə bərni Babila, kəi hartə mnya mjir bərni ni. Sojayeri akwa puvidzi ka kuraku apa kərathla yimi, ka kətə kutadi ka kurakər dləra.

⁵⁶Sojayeri ni ku si kamnyar dlər Babila, da ku ngkəgəi sojayeri arni, ka ɓəgələmta kari mpa arɗa. I an Hyel na ana ɗi mdər hara ɗimikur, antə I ata ɗi Babila kalkal ka ɗimikur tə tsa hara.

⁵⁷I ata hara ka mji ol'olərni wika, watau kuthlyayeri, ka mjir hamta sauri, ka mji na ol'olər mpa, kəga sojayeri. Da ata ləkwa heni na zurang kula jaktə thlata, I na kuthli an pəla ngəni, I an MTHLAKU na ka Duna ta Shang.

⁵⁸Mda ata huzamta katangga ar Babila na bau ni ka titiləmta ni ata di, ka mbamta tapərar nyarfayeri na nal nal ni tuktukku. Shanga su tə mjir tsəɗi ni ghəra akwa tsaɓari ata sə mbamtadzi tuktukku ka shin ka hwashim. I na MTHLAKU na ka Duna ta Shang an pəla.

⁵⁹Mdər thlenta ar Kuthli Zedekiya an Seraiya, na ɓzər Neriya. Tsa an kəkar Maseyiya. Akwa məva na nfwarkur ar Zedekiya na kuthlir Yahuda, sakatə tsa akwa ləhar Babila ata kəma duku ka Seraiya antə I na Irmiya ku hamta tsawayeri laga aka Seraiya.

⁶⁰Irmiya ku rəbuta akwa kakaɗu shanga asarayeri na ata sə wutə tsəɗi Babila, ka shanga su tə mdə pəla ata kəra Babila.

⁶¹I pəla aka Seraiya, “Ma sakatə ga ku mzhitə Babila, ka gə wuta abbər ga ku karatə shanga labar nayeri ni ka kuraku.

⁶²Ka gə hara adduwa abbər, ‘MTHLAKU, ga ku pəla abbər ga ata shamta Babila, har tə su aɗi na ka mpikə wala mda wala mwaɓi na ata ndzi akwa wa. Tsa ata ndzi kula mda apa mtakəu ba saka madi.’

⁶³Antə Seraiya, ma sakatə ga ku kuri karatə kakaɗə ni aka mji, ka ra mbwatə kakaɗə ni ata pela, kara psu ni akwa Thlyagha Yufiretis.

⁶⁴Antə kara pəla, ‘Ngəni an su na ata wutə Babila ma sakatə MTHLAKU ata ɗi ni, kərari ata sha. Shanga mji na akwa bərni ni ata kurəmtadzi, mda aɗi na ata mbə wa.’ ” Azi antə Irmiya tsikəra rəbutərni.