Read bura-pabir Irmiya 52 Bible Online

Irmiya 52 - bura-pabir bible

Irmiya 52

¹Zedekiya ka məvari sərkumari ka ntang ka yarni sakatə tsa baɗitə ndzi kuthli. Antə tsa ku hara kuthlikur akwa Urushalima ar məva kumkantang. Thləma mama'ni an Hamutal, na ngkwar Irmiya ahar Libna.

²Amma Zedekiya ku hara su na ɗimi ata nca MTHLAKU tsu apatə Yehoyakim ku hara.

³Ɗəffa MTHLAKU ku ɓzi ata kəra mjir Urushalima ka Yahuda antə tsa ku kədləmta ɗa kazhar kəmari. Zedekiya ku nggəlar kələngkər aka Nebukadnezzar kuthlir Babila.

⁴Antə apani Nebukadnezzar ku si kəga shanga sojayeri arni ka pwa ata kəra Urushalima akwa thliya na kuma ka vir kuma, məva na əmdla ar kuthlikur Zedekiya. Da ku kalaktə Urushalima ka katangga tə lakur ləɓəla wala ləvəi aɗi wa.

⁵Da kəsi ɗa avəi tə vəi ləɓəla aɗi wa har məva na kumkantangkur ar kuthlikur Zedekiya.

⁶Akwa vir na əmdləkur ar thliya na nfwarkur tsu akwa məva ngəni, antə mi ku mula aka mji. Su aɗi na mbila ka mji səm wa.

⁷Sojayeri ar Babila ku si ka ɓələmta bwa laga ar katanggar Urushalima. Antə tsu vir nda aviri, Zedekiya ka shanga sojayeri arni ku hwi ləɓəla kazhar bərni ni. Da ləɓəla akwa nyarfu na akwa daɓwa banggwayeri suɗa na abwahila gadinar kuthli, ka thlentə kəma ɗa təbwar Mular Jodan.

⁸Amma sojayeri ar Babila ku nu Kuthli Zedekiya ka kəli ni akwa bəbalər Yariko, antə shanga sojayeri arni ku titila kazhar ni.

⁹Apani da ku ngkəi Kuthli Zedekiya ka mwantə ni aka kuthlir Babila ahar Ribla akwa tsəɗi Hamath, antə tsa ku thlamta shariya ata kərari.

¹⁰Kuthlir Babila ku tsəgəi maɗa' Zedekiya ata ncari, ka tsəgəi shanga mji ol'olər Yahuda.

¹¹Tsa vu tə mdə fwaɓəla nca Zedekiya, ka mbwi ni ka məsəsal, ka mwantə ni ahar Babila, ka hambwa ni akwa pərsəna tar vir tə tsa mta.

¹²Akwa thliya na ntəfkur ka vir kuma natə an məva na kumnya əmdləkur ar kuthlikur Nebukadnezzar ata kəra Babila, antə Nebuzaradan, olər mjir sək kəra kuthlir Babila ku ləkwa Urushalima.

¹³Antə tsa ku mbamta mbwar vəngkər səli aka MTHLAKU, ka kəi kuthlikur, ka shanga kəyayeri na ol'ola akwa Urushalima.

¹⁴Antə shanga sojayeri ar Babila na ata kəma duku ka olər mjir səkə ni ku ɓəgələmta shanga katangga na kalaktə Urushalima.

¹⁵Antə Nebuzaradan, na olər mjir səkə ni ku fatə mji laga na aɗi ka su wa, ka mji na mbila akwa kuta bərni ni, ka mji na hwi ka mwari adzə kuthlir Babila, ka mwantə ɗa shang ahar Babila.

¹⁶Amma tsa ku zhar bwadukwa mjir bwani na kula su akwa Yahuda ka da tsuhwu fakər anap ka fakayeri damwa.

¹⁷Mjir Babila ku ɓəgələmta zhimbwalayeri tə mdə nam ka əmza ar mbwar vəngkər səli aka MTHLAKU, ka gəlamayeri na ol'ola ar əmza, ka amalangkeyayeri, ka fatə shanga əmza ni ka mwanta ahar Babila.

¹⁸Tsuwa da ku fatə tughumayeri, ka tebər famta su, ka sur nam u'u, ka tasa na ola, ka tasayeri ar mba tulari ɗuza, ka shanga kari natə mdə nam ka əmza, tə mda ana kəthlər kəgari akwa mbwar vəngkər səli aka MTHLAKU, ka təra ka da.

¹⁹Da fatə shanga su tə mdə nam ka adzərfa, apa tasayeri na raka raka, ka tasar kəl u'u, ka tasa na ola, ka tughumayeri, ka sur vətə pitəla, ka tasayeri ar mba tulari ɗuza, ka tasayeri ar pshingkər su, ka təra kəgari.

²⁰Suayeri natə Kuthli Solaman namtə ka əmza kamnyar kutambwar vəngkər səli aka MTHLAKU, an zhimbwalayeri suɗa, ka wagən, ka gəlam na ola, ka gyal na kumnya suɗa na akwa kəsi gəlam ni, ku hara kəgəɓu kamta tə mda amzhi səndə kəgəɓkurari wa.

²¹Zhimbwalayeri na suɗə ni dludludzi: Antə kəlara pal nalkurari an dzartsi kumnya ncisu, baukurari dzartsi kumnya suɗa, ka kəkəskurari kuleng tsi nfwar, tsuwa gula akwa kutari. Mdə kalaktə kəra kəlara zhimbwal pal ka kuɓashu ar əmza natə nalkurari dzartsi ntəfu. Mdə dəɓatə kəlara kuɓashu ni ka ɗahər dludzər yar rumman tə mdə pau akwa layi.

²³Shanga dludzər yar rumman na kalaktə kəra zhimbwal ni an aru pal. Amma natə mda ata wutari təbwakəma mda an əmdləkumari ka ngkwa.

²⁴Ata kəra ngəni, Nebuzaradan na olər mjir səkə ni ku kətə Seraiya na olər prist, ka Zafaniya na akwa nu Seraiya ka olkur, ka fatə mjir sək nyarmbwar vəngkər səli makər.

²⁵Tsuwa akwa nca mji na ɗuwardzi akwa kutadi, tsa kətə olər sojayeri, ka fatə mji murfa na ana hamta sauri aka kuthli, ka sakatari ar olər sojayeri, natə tsa mdər kəl sojayeri ar tsəɗi, ka mji ol'ol damwa ngkwakumari.

²⁶Antə Nebuzaradan ku fatə ɗa ka mwanta aka kuthlir Babila ahar Ribla

²⁷akwa tsəɗi Hamath. Anda antə kuthli ni ku dlaɓu ɗa ka tsi ɗa. Apani antə mdə ku fatə mjir Yahuda ka təra ka da.

²⁸Nggədza hangkur mji natə Nebukadnezzar fatə ɗa apa mafar mpa ka təra ka da: akwa məva na murfəkur ar kuthlikurərni tsa fatə mjir Yahudi dəpu makər ka sərkumari ka makər.

²⁹Akwa məva na kumnya nciskur, tsa fatə mjir Urushalima aru ncisu ka makkumari ka suɗa.

³⁰Akwa məva na sərkumari ka makərkur, Nebuzaradan fata aru murfa ka nfwarkumari ka ntəfu. Antə shanga mji tə mdə fata an dəpu nfwar ka aru ngkwa.

³¹Akwa məva na makkumari ka murfəkur aghəla tə mdə ngkəi Yehoyacin na kuthlir Yahuda, antə Evilmerodak baɗitə ndzi kuthlir Babila. Tsu akwa məva nda akwa vira thliya sərkumari ka ntəfu ar thliya na kumnya suɗa, antə tsa hara mdəkur aka Yehoyacin, ka kəɓəla ni akwa pərsəna, ka psi ni.

³²Evilmerodak ku wulwul Yehoyacin ka na alari olkur na təramta olkurayeri tə tsa nar aka kuthlyayeri damwa tə mdə fatə ka mwanta ahar Babila ata vəi duku ka tsa.

³³Apani Yehoyacin ku ntsui ləptər pərsəna arni ka hatə ləptu na ɓɗaku. Tsuwa mdə ku zhar ni ka tsa səm susəma ata vəi səm susəmər kuthli har kurər mpikari.

³⁴Tsuwa parang viri akwa shanga ndzəndziyirni kuthlir Babila akwa hamta alari cauta.