Read bura-pabir Irmiya 6 Bible Online

Irmiya 6 - bura-pabir bible

Irmiya 6

¹Mjir Benjamin, hwi giri ra bara vəi ɗuwardzi! Hwi giri kazhar Urushalima! Mbur giri təmbəl akwa Tekowa, ka giri nci alamər dləra akwa Beth Hakkerem. Kamnyar asar ka dləra akwa səɓəla akwa yala.

²Bərni Urushalima ndzi apa ɓzərngkwa na dakwi tə mdə ku wulwul ni ka duna, amma I ata ɓzamtə ni.

³Kuthlyayeri ata sə si kəga sojayeri arɗa ka da dlər ni, apatə mjir ɓəla ana si kəga ciɓər ɗa. Da ata kalaktə bərni ni ka tentayeri arɗa. Antə kəlara kuthli ata fəli kəga mjirni akwa vəi tə tsa carɓəla.

⁴Da ata pəla, “Ɗəmhə girdzi ɓɗaku kamnyar mpa! Ka giri ɗəmhədzi ka mburu pwa ata kəra Urushalima ka mpa tsu ka kərathlər pci ni!” Amma da ata pəla, “Haba mara, ai saka aɗi mbil ol kəra wa! Kulikulini pci ata təri!

⁵Mbura pwa ata kəra ɗa aviri, antə mburu ata huzamta vəyayeri na ka duna akwa bərni ni.”

⁶Kamnyar ngəni, MTHLAKU na ka Duna ta Shang akwa pəla, “Nthlətsə giri udzəmayeri, ka giri ncigəi ɗa ka həndza ala ɗa su apa katangga, har ka kalaktə Urushalima kəgari. Ku ndzi dwali kəi ɗi bərni ngəni kamnyar kəlara mda akwa hara ɗimikur.

⁷Ɗimikur akwa hara hang kamta akwa bərni ni apa yimi na ana hwi səɓəla akwa kucirkila. Parang I akwa ngga kurakər mpa ka asar akwa kutadi ni. I akwa wul mji na nggawa nggawa ka mji na ku dədəkəidzi hang bamama akwa kutadi.

⁸Mjir Urushalima, ləkwa giri hangkala giri, ma apani wa I ata təra kazhar giri, ka namtə tsəɗiyir giri ka tsa ndzi fya, kula mda akwa.”

⁹MTHLAKU na ka Duna ta Shang akwa pəla, “I ata pəla aka dawayeri ar giri ka da famnya su na akwa tsəɗi ngəni cipu, apatə mthlakər fakər anap ana dlarhə fakərni ka tsa mtiri shanga yar anap na mbiləmta ata tsiyayerari.”

¹⁰Antə I shinau alari abbər, “Wala ma I an gari ala ɗa ka tsaktə ɗa, kəga wan ata psi thləm ali ri? Kamnyar gula aɗi ata thləma ɗa wa, da ana nggatə su wa. Da ana rutə ndərər nga, ka namta apa sur kyartəkur, ka sur ɓzamtə ɗəffa ɗa.

¹¹Antə MTHLAKU I ma ɗəffi ku ɓzi adzə ɗa ka duna, har tə I amzhi mbwi ɗəffi kəra wa.” Antə MTHLAKU pəla ali, “Pumta ɗəffi na bwarbwar ni ata kəra maɗangkyar na ata layi, ka ata kəra maɗadakwi na tsaptədzi, ka ata kəra shili ka mwanki, kəga mji halhala.

¹²I ata hamta kəyayeri arɗa, ka fakayeri, ka mwankir ɗa aka mji. I ata ɗi mjir tsəɗi ni.

¹³Kamnyar shanga mji, ol ka ntsaha akwa hara mbulamkur ata kəra gəna dlərpəkur. Wala naɓiyayeri kəga pristayeri arna akwa zambatə mji.

¹⁴Da ana wul mbəlkər mjirna apa su na hilara, ka pəla, ‘Shanga su lapiya,’ amma lapiyakur aɗi jiri wa.

¹⁵Kalkal ka sur səli ngkəi ɗa kamnyar sur cika tə da hara, amma səli aɗi ana ngka ɗa wala raka wa, da səndə su na sur səli ni ma shang wa. Kamnyar ngəni da ata mta tsu apa bwadukwa mjir Israila. Ma sakatə I ku baɗitə ɗi ɗa I ata kurəmta ɗa. I na MTHLAKU an pəla gari ni.”

¹⁶MTHLAKU akwa pəla aka mjirni, “Thləthlatə giri akwa matəngndla ka giri pwi nca giri. Yu giri ka mdə ncanta ala giri lakwayeri na ɓɗakɓɗaku waci ka giri nuwa, antə giri ata wutə msərakur.” Amma giri pəla, “Awa!”

¹⁷Tsuwa I ku thlentə naɓiyayeri ka da tsaktə giri ata kəra asar na akwa si, amma giri aɗi psi thləma giri wa.

¹⁸Antə ka shanga durayeri nggatə ka səndə jili su na ata sə wutə mjirna.

¹⁹Psi gir thləm mjir duniya, abbər I akwa sənta asar ata kəra mji ngəni, asar ni ata ndzi watsəɓər ɗimikur tə da hara. Kamnyar da aɗi vədzə hangkala ɗa aka su tə I pəla wa, wala ɓəlatə tsawurna wa.

²⁰Man damitə ra ka tulari ɗuza ar giri na thlata ahar Sheba ri, wala yaji na thlata akwa tsəɗi na aɓəla? I aɗi ata dlu sur hamta ar giri wa, wala hir saɗakar giri wa.

²¹Antə apani I ata pwi sur tsamta səl akəma ɗa ka da tsamta səla ɗa ka ndla ata. Antə shanga ɗa ata sə ndla ata ka mta: mjir ya, maɗangkyar, ntəwulayeri, ka pazhayeri.

²²MTHLAKU akwa pəla, “Mjir tsəɗi na akwa yala ata sə thlatə ka si, mji na ka duna ciju akwa ɗəmhədzi kamnyar mpa.

²³Da sojayeri na ka lali ka mwasu, mji na kəmanggar kula kətadza. Kur səla takur ɗa ana ndəra apa kuraka manda na akwa pu kərni. Da ku ɗəmhədzi kamnyar dlər nga, Urushalima.”

²⁴Antə mjir Urushalima pəla, “Yeru ku nggatə labar ata kəra mji ngəni, antə dza yeru ku mti kamnyar thlivəra. Dza yeru akwa kətə yeru ka duna apa mwala akwa kutərya.”

²⁵Antə da pəla aka nvwa ɗa, “Mburu aɗiya ləkwa mtakəu wa, wala ləɓəla ata lambatə wa, kamnyar dawayeri ar mburu ka katsakar akwa thlimbəla ɗa. Antə bwa aɗi na lapiyari wa.”

²⁶MTHLAKU akwa pəla aka mjirni, “Hatə giri dasa, ka giri takəla akwa pənju. Ka giri tuwa ka shimwi apa giri akwa tuwa mtər ɓzər giri na duku ni. Kamnyar dawar giri ata si təkəma kula səndər giri, ka kurəmta giri.”

²⁷Antə MTHLAKU pəla ali, “Ka gə ngkərtə mjirna apatə mda ana ngkərtə ɓɗakkur liya, ka gə nggaɓəla laku tə da akwa.

²⁸Shanga ɗa ka kəra ɗa ɓəɓal apa əmza ka liya mənggəl, da hir thlentə hangkala mda. Da ana cikthlə mnya ka hara dlərpəkur.

²⁹Fuvu ana fatə su ka duna ka kəthla təl bwarbwar kamnyar mbaɓəla dalma, amma dalma aɗi ata juwa ka ləghəi wa, antə ampaniyir ləkəma ka juwari aɗi wa. Apani ampaniyir ləkəma ka nam mjirna aɗi wa, kamnyar mji na ɗimi akwa nca ɗa ni aɗi ata ləɓəla wa.

³⁰Da ku ndzi apa civəkəthla kula ampani, antə I na MTHLAKU ku nggəlar ɗa.”