Read bura-pabir Irmiya 7 Bible Online

Irmiya 7 - bura-pabir bible

Irmiya 7

¹MTHLAKU ku jaktə gari aka Irmiya, ka pəla,

²“Mwa ra thləthlata akwa nyarfur mbwar vəngkər səli, ka gə psəmnya aka shanga mjir Yahuda na ana vəngkər səli aka MTHLAKU anda abbər ka da psi thləma ɗa aka su tə MTHLAKU akwa pəlari.

³MTHLAKU na ka Duna ta Shang, Hyelər Israila akwa pəla ka giri namtə ndzəndziyir giri, ka giri pali surharar giri, antə I ata zhar giri ka giri ndzəndzi akwa vəi ngəni.

⁴Giri aɗiya hir ka mji laga zwalitə giri abbər su aɗi na ata wutə giri wa, təng tə mbwar vəngkər səli aka Hyel tsu aɗi azi ni wa. Kamnyar da akwa hara ha abbər, ‘Mbwar vəngkər səli aka MTHLAKU ni azi! Mbwar vəngkər səli aka MTHLAKU ni azi! Mbwar vəngkər səli aka MTHLAKU ni azi.’

⁵Kamnyar ma giri ata namtə ndzəndziyir giri ka jirkur, ka pali harar giri, ka hara su na kalkal aka nvwa giri,

⁶tsuwa ma giri ku zhar nar bwani aka mətəpi, ka mutayeri, ka kughungayeri, ka zhar tsi mda kula suari aɗi, ka tsuwa ma giri ku zhar nu haptayeri na ana kurəmta giri,

⁷I ata zhar giri ka giri ndzəndzi akwa vəi ngəni tə I hamta təng waci aka kəkayeri ar giri ka ndzi arɗa ba saka madi ni.

⁸Amma nggədza giri tsu akwa mbərsa ka ndərayeri na aɗi jiri wa.

⁹Giri ana wuta apa giri ata mzhi həla, ka tsi mda, ka ləka, ka kahyel ata kəra su na aɗi jiri wa, ka hamta saɗakayeri aka Baal, ka vəngkər səli aka haptayeri tə giri aɗi səndə hwatu wa,

¹⁰ka jaktə si adzə ra akwa mbwar vəngkər səli ali, ka pəla, ‘Mdə ku msərantə yeru!’ Antə har kəi zhar giri ka giri ləkəma ka hara suayeri na ɗimi ɗimi ni ya?

¹¹Giri ana wuta apa mbwar vəngkər səli ali an vəi ɗuwardzər mjir həla ka thla laku ya? I akwa wul su tə giri akwa harari, ndə MTHLAKU.”

¹²“Mwar giri akwa Shilo, vəi na ntangkəma tə I carɓəla kamnyar vəngkər səli ali, ka giri wutə su tə I hara alari kamnyar ɗimikur tə mjirna Israila ku hara.

¹³Sakatə giri akwa hara ɗimikur nayeri ni I ku mnya ala giri, amma giri aɗi psi thləm wa. I ku kəga giri, amma giri aɗi si wa.

¹⁴I an pəla aka kəkayeri ar giri waci abbər ka da həntə mbwar vəngkər səli ali azi. Amma kulini su tə I hara aka Shilo antə I ata harari aka mbwar vəngkər səli ngəni, mbwa tə giri mbərsa tsa ata msərantə giri ni.

¹⁵Antə I ata kədləɓəla giri kazhar tsəɗi ni tsu apatə I kədləɓəla maɗama' giri, mjir Israila.”

¹⁶Antə MTHLAKU pəla, “Irmiya ga aɗiya tuwa wala hara adduwa kamnyar mji ngəni wa. Kamnyar wala gan kiɗə kəri I aɗi ata ngga ngə wa.

¹⁷Ga aɗi wutə su tə da akwa harari akwa bərniyayeri ar Yahuda ka lakwayeri ar Urushalima wa ya?

¹⁸Maɗangkyar akwa tsaptə udzəm mba, mji shili akwa mba u'u, antə mwanki akwa hər mpur nam kek aka haptu mwala tə da ana kəga abbər Kuthli Mwala ar Vəi na Amtazi. Tsuwa da ana hamta saɗakar sur sa aka haptayeri kamnyar ka da ɓzamtə ɗəffi.

¹⁹Amma jirkurari ɗəffi antə da ɓzamtari ya? Awa, da an akwa ɓzamtə ɗəffa ɗa ka kərɗa ka vu kərɗa akwa sur səli.”

²⁰“Antə apani, I na MTHLAKU na ka Duna ta Shang, ata pumta ɗəffi na ɓzi ni ata mbwar vəngkər səli ngəni. I ata pumta ɗəffi ata kəra mji kəga mwaɓiyayeri, ka ata kəra nfwayeri ka yar sur faku. Ɗəffi ku ɓzi ka duna apa u'u natə mda amzhi tsiyari wa.”

²¹MTHLAKU na ka Duna ta Shang, Hyelər Israila akwa pəla, “Təra giri ka saɗaka mbamba ka shanga saɗakayeri ar giri, ka giri ɓɗəmnya sur giri!

²²Sakatə I fwaɓəla kəkayeri ar giri akwa Masar, I aɗi tsawa ala ɗa ka da hamta ali saɗakayeri wa.

²³Su tə I pəla ala ɗa an, ‘Ma giri ata kələngkər ali ka hara shanga suayeri tə I pəla, I ata ndzi Hyelər giri, antə giri ata ndzi mjirna, antə shanga su ata mwa ala giri apatə giri ata barari.’

²⁴Amma da aɗi kələngkər wala psi thləm ali wa. Təng da hara kər ɓəɓalkur, ka ləkəma akwa hara suayeri na ɗimi ɗimi tə ɗəffa ɗa pəla ala ɗa. Antə da ku ndzi ɗimi kamta.

²⁵Baɗitə ka vir tə kəkayeri ar giri səɓəla kazhar Masar ka vədza aka ashina, I ku ləkəma ka thlenta ala giri naɓiyayeri arna ata kər ata kər.

²⁶Amma wala apani mda aɗi na psi thləm wa. Təng giri akwa ləkəma ka nggyarɗəkur, ka hara suayeri na ɗimi ta su tə kəkayeri ar giri ku hara.”

²⁷“Antə Irmiya, kara jikatə suayeri ngəni aka mjirna, wala tə da aɗi ata psi thləm ala gə wa. Ga ata kəga ɗa amma da aɗi ata ndər wa.

²⁸Ka gə pəla ala ɗa abbər, ‘Giri an mji na kula kələngkər aka MTHLAKU na Hyelər giri. Mda amzhi ɗiɓəla giri wa. Jirkur ku mti, giri aɗi ana gariyari ma kəra wa.

²⁹“ ‘Ai mjir Urushalima, tuwa giri, shimta giri kəra giri ka giri pumta shishari. Ka giri ɗəm jikatuwa ata kəra garayeri, kamnyar giri ku ɓzamtə ɗəffi antə I ku nggəlar giri.’ ”

³⁰“ ‘Kamnyar mjir Yahuda ku hara suayeri na ɗimi ɗimi: da ku pwi haptayeri arɗa akwa mbwar vəngkər səli ali, ka diɓərantə ali mbwa.

³¹Da ku latə mashiɗayeri aka haptu Tofeth akwa Mular Hinnom, ka həntə bagaɗiyir saɗaka mbamba aka haptayeri kamnyar ka da hamta saɗakar maɗa' ɗa shili ka mwanki akwa u'u ni. I aɗi ɗar pəla ka da hara ali su apani wa, tsuwa su aɗi ɗar səkwa ɗəffi apani wa.

³²Kamnyar ngəni saka ata sə si tə mda aɗi ata jaktə kəga vəi ni Tofeth, wala Mular Hinnom kəra wa, amma thləmari ata ndzi Mular Tsi Mda. Da ata harəmta mji anda kamnyar vəi harəmta ɗa damwa aɗi wa.

³³Mshiyayeri ar mji ngəni ata ndzi susəmər ɗikayeri kəga mwaɓi mtakəu, antə mdər kədləmta ɗa aɗi wa.

³⁴Tsəɗi ni ata ndzi dəliyir hamada. I ata vu ka kurakər msərakur ka kurakər kucali sha akwa bərniyayeri ar Yahuda ka akwa lakwayeri na akwa Urushalima. Tsuwa mda aɗi ata jaktə nggatə kuraku ar kucalər kəldzi kəra wa.’ ”