Read bura-pabir Irmiya 8 Bible Online

Irmiya 8 - bura-pabir bible

Irmiya 8

¹MTHLAKU akwa pəla, “Vir nda dawayeri ata fwaɓəla kulayeri ar kuthlyayeri kəga ar kwakunayeri ar Yahuda, ka laɓəla kulayeri ar pristayeri kəga ar naɓiyayeri, ka na ar mambila mjir Urushalima.

²Da ata fwaɓəla ɗethlayeri arɗa ka titiləmta ɗa ata di apa kuɓa, ka zhar ɗa ka pci, ka thliya, ka sasəlkayeri mbəla ata kəra ɗa.

³Antə shanga mjir tsəɗi ngəni ɗimi ni na ku mbil ka mpika, na akwa ndzi akwa vəyayeri tə I titiləmta ɗa akwa, da ata sə pəla kuji mta ta ndzi ka mpika. I na MTHLAKU na Hyel na ka Duna ta Shang an pəla.”

⁴“Antə MTHLAKU ku pəla aka Irmiya ka tsa pəla ala ɗa abbər, ‘Ma mdə ndla, tsa aɗi ana jaktə thlatə wa ya? Ma mdə sha ata laku, tsa aɗi ana jaktə ngka wa ya?

⁵Kaha, kamnyar mə tə giri na mjirna akwa ngka ka bwahili parang nə ri? Giri ku bartə haptayeri ar giri ka nggəlar ngka adzə ra.

⁶I ku psi thləm, amma giri aɗi gari na jirari wa. Mda aɗi akwa nca giri na tubi ata kəra ɗimikur tə tsa hara, ka pəla, “Kamnyar mə tə I hara su apani ri wa?” Kəlara mdə ku nciu kərari akwa hara biku apa taku na vəi kərathlari kamnyar mpa.

⁷Wala shaduwar ana səndə sakar ngkar ɗa, bukəl wala shambarkəɗa ana ɗangtə sakar ɗəwur ɗa, amma ar giri, giri asəndə tsawurna wa.

⁸Apa madi tə giri ata mzhi pəla abbər giri ɗəɗu, ka tsuwa abbər giri asəndə tsawurna ri? Kamnyar mji natə kalkal ka da thlipa ala giri tsawurna da an akwa thlandər ala giri!

⁹Maləmayeri ni ata sə ləkwa sur səli. Da ata sə yakata ka mdə ngkəgəi ɗa. Kamnyar da ku nggəlar ndərərna, antə da aɗi ɗəɗu kəra wa.

¹⁰Apani I ata hamta mwankir ɗa kəga fakayeri arɗa aka mji damwa. Kamnyar kəlara mda, ol ka ntsaha, akwa fəva gənar dlərpəkur. Har wala naɓiyayeri kəga pristayeri ku ləkwa ndzi kula jirkur.

¹¹Da ana wul mbəlkər mjirna apa su na hilara, ka pəla, “Shanga su lapiya”, amma lapiyakur aɗi jiri wa.

¹²Kalkal ka sur səli ngkəi ɗa kamnyar sur cika tə da hara, amma səli aɗi ana ngka ɗa wala raka wa. Da səndə su na sur səli ni ma shang wa! Kamnyar ngəni da ata mta tsu apa bwadukwa mjir Israila. Ma sakatə I ku baɗitə ɗi ɗa I ata kurəmta ɗa. I na MTHLAKU an pəla ni.’ ”

¹³“ ‘I ku bara tsaptə mjirna apatə mdər fakəu ana tsaptə sur fakərni, amma da ku ndzi apa nfur anap na kula ya, ka apa nfur kamndə na kula ya, natə wala thlaliyari ku tətəɓumtadzi. Kamnyar ngəni I ku zhar ka mətəpiyayeri dlutsə tsəɗiyir ɗa. I na MTHLAKU an pəla!’ ”

¹⁴“Antə mjir Yahuda ata sə pəla aka nvwa ɗa, ‘Mburu akwa sək mi azi ri? Kuji ka mburu hwi ləkwa di na ka katangga, ka mburu ra kurəmtadzi anda. MTHLAKU na Hyelər mburu ku thlamta ala mburu shariyar mta, ka hamta ala mburu yimər gwar ka mburu sa, kamnyar tə mburu ku hara biku alari.

¹⁵Yeru akwa dzama abbər tsu su ata hara ɓɗaku, amma shang hərkə aɗi wa. Yeru tamata abbər yeru ata wutə mbantədzi, amma təng sur thlivərantə mda ana akwa wutə yeru.

¹⁶Dawayeri ar yeru ku kurtə si akwa bərni Dan, yeru akwa ngga tuwar takur ɗa. Shanga tsəɗi ata kədza ma sakatə takwayeri arɗa ku nggyinggya. Dawayeri ar yeru ku si ka da kurəmta yeru ka shamta shanga su na akwa tsəɗiyir yeru, bərni yeru ka shanga mji na akwa.’ ”

¹⁷“Wul giri, I ata thlenta ala giri pwapwayeri na ka gwarər ɗa mwavər tə kuzəkər ɗa aɗi wa ka da ɓɗəɓɗətə giri”, ndə MTHLAKU.

¹⁸Ɗəffi ku ɓzi kamta tə sur mtathliyari aɗi wa, ɗəffi ku ɓzi har tə I ku ndzi nggawa.

¹⁹Psi gir thləma giri, shanga giri na akwa tsəɗi ni! Nggatə giri kuraka mjirna akwa tuwa abbər, “Jiri, MTHLAKU aɗi akwa bərni Urushalima kəra wa ya? Kuthlir mburu aɗi adzə mburu kəra wa ya?” MTHLAKU shinau abbər, “Kamnyar mə tə giri ɓzamtə ɗəffi atar vəngkər səli aka suayeri tə mdə marəmta, ka aka haptayeri natə da su gapani ri?”

²⁰Mji ni shinau alari abbər, “Nggədza vəya ku kuri, tsuwa mdə ku fəi sur fakəu, amma ba kulini MTHLAKU aɗi mbuli mburu wa.”

²¹Ɗəffi ku ɓzi kamnyar mdə ku dəkəi mjirna, I akwa tuwa kamnyar thlivər ku ngkəi ra.

²²Kuzəkər kəta aɗi akwa Gileyad wa ya? Likta aɗi anda wa ya? Kamnyar mə tə mjirna aɗi mbantədzi wa ri?