Read bura-pabir Irmiya 9 Bible Online

Irmiya 9 - bura-pabir bible

Irmiya 9

¹Wa ana namta ali kəri ka tsa ndzi apa jiɓər yimi, ka nci ndzi apa kucirkila ka tsa hwi shimwi, kəi mzhi tuwa pci ka viri, kamnyar mjirna tə mdə ku kurəmta ni ri!

²Wa ana ni vəi ndzəndzi akwa mtakəu, vəi tə mdər lənggu awutə ka ndzəndzi, kəi təra ciju kazhar mjirna! Kamnyar da aɗi ka jirkur wa, da an mji na shimnya.

³Antə MTHLAKU shinau aka Irmiya abbər, “Parang kyanggyara mjirna ɗəmhəɗəmhari kamnyar thlandər, apatə mdər sha ana zuzurəmta ka laliyirni. Ata vəya jirkur, shimnyakur an akwa mwa akwa tsəɗi ni, da akwa hara ɗimikur ata kər ata kər, da aɗi damitədzi kamnyar na abbər I an Hyelər ɗa wa.”

⁴Ka waskəi hara hangkal ka nvwani, wala an ɓzərma'ni tsa aɗiya mbərsa ka tsa wa. Kamnyar kəlara ɓzərma ana pwaktə nvwani apa Yakub, kəlara mda ana thlandər ata kəra nvwani.

⁵Shanga ɗa ana pwaktə nvwa ɗa, antə mdər pəla jirkur aɗi wala duku wa. Kyanggyara ɗa ku tsəli ka thlandər, antə da amzhi ndzi kula hara biku wa.

⁶Parang da akwa hara bwani aka mji, ka ləkəma ka pu thlandər ata kəra nvwa ɗa. Da nggəlar ta kələngkər abbər, I an Hyelər ɗa, ndə MTHLAKU.

⁷Kamnyar ngəni MTHLAKU akwa pəla, “I ata kəcimta ɗa kəi ngkərtə ɗa. Nənga man su damwa tə kəi hara ala ɗa ri?

⁸Kyanggyara ɗa ku ndzi apa afayeri na ka gwar, parang da akwa thlandər. Kəlara mda akwa gari na msəra aka ntəwulərni, amma akwa ɗəffari tsa akwa bara thla ni.

⁹Aɗi kalkal kəi ɗi ɗa kamnyar su nayeri ni wa ya? Aɗi kalkal kəi ntə dawa ata kəra jili mji ngəni wa ya? I na MTHLAKU an pəla ngəni.”

¹⁰I ata jikatuwa kamnyar garayeri ka ndzi ka ɗəffə ɓzəɓza kamnyar vəi ɓəla na akwa mtakəu. Kamnyar da ku uləmtadzi, har tə mda aɗi na ana təramta akwa da kəra wa. Mda aɗi ana nggatə tuwar thla abwanda kəra wa, ɗikayeri kəga mwaɓi mtakəu ku hwi ka təra.

¹¹Antə MTHLAKU shinau aka Irmiya abbər, “I ata huzamta Urushalima kəi namtə ni həi zawar, tsa ata ngka vəi ɓukcir kilamtaku. I ata vu ka bərniyayeri na akwa Yahuda ndzi mtakəu, vəi tə wala mda aɗi ana ndzi anda wa.”

¹²Antə I yu su abbər, “MTHLAKU, kamnyar mə tə tsəɗi ni hil ka ndzi ul'ulari apa mtakəu, tə wala mdə duku aɗi ana təramta akwa wa nə ri? Wan amzhi nggaɓəla su ngəni ri? Wan tə ga ata ngkərɓəla alari su ngəni ka tsa pəla aka mji damwa ri?”

¹³Antə MTHLAKU pəla, “I hara apani kamnyar da nggəlar ta ɓəla tsawur na, da aɗi kələngkər ali, wala nu su tə I pəla ala ɗa wa.

¹⁴Ata vəyari, da ku hara kər ɓəɓalkur, ka hara su tə ɗəffa ɗa hira, ka nu haptayeri ar Baal apatə kəkayeri arɗa ku thlipa ala ɗa.

¹⁵Kamnyar ngəni MTHLAKU na ka Duna ta Shang, Hyelər Israila akwa pəla, I ata na ɗa su na ɗəɗahu ka da səma, ka yimər gwar ka da sa.

¹⁶I ata titiləmta ɗa akwa nca durayeri natə da kəga kəkayeri arɗa aɗi ɗar nggatə su ata kəra ɗa wa. Aghəla nda I ata thlentə sojayeri ata kəra ɗa ka da kurəmta ɗa karkar.”

¹⁷MTHLAKU na ka Duna ta Shang pəla, “Dzama ata kəra su na akwa hara ni! Kəga giri mwankir tuwa ka da si mwanki na masəkur jikatuwa ka da si.”

¹⁸Mji ni pəla, “Pəla ala ɗa ka da si taktar ka da jikatuwa ala yeru, tar ma nca yeru ku nghyi ka shimwi ma shishir nca yeru ku hwi yimi kamnyar tuwa.”

¹⁹Kamnyar mjir Urushalima akwa tuwa abbər, “Yeru aɗi kəra wa! Yeru ku ləkwa səli ka duna! Kamnyar da ku huzamta kəyayeri ar yeru, antə ku ndzi dwali ka yeru zhar tsəɗiyir yeru.”

²⁰Antə I pəla, “Mwanki, ngga giri su tə MTHLAKU akwa pəlari, ka giri vədzə hangkal aka su tə tsa pəla. Nggədza giri jikatuwa tə ka giri thlipa aka maɗangkwi, jikatuwa tə ka kəlara mwala thlipa aka ntəwulərni.

²¹Mtə ku həl səvəi ata kəra yeru atar windauwayeri ar yeru, ka ləkwa kəyayeri ar yeru na ar kuthlikur. Tsa thləthlamta maɗangkyar ata lakwayeri ka maɗadakwi na akwa kasukayeri.”

²²MTHLAKU ku jaktə pəla ali abbər, “Mda ata titiləmta mshiyir ɗa apa kuɓa akwa mtakəu, apa kədla mthli tə mdər nthlari ana pumta aghəlari, mda aɗi na ata tsaptə ɗa wa.”

²³MTHLAKU akwa pəla, “Mdə na ɗəɗu aɗiya gayar ɗəɗukurərni wa, mdər duna aɗiya gayar dunari wa, mdər gəna aɗiya gayar gənarni wa.

²⁴Kəlara mdə na ata bara gaya, ka gayarni ndzi abbər tsa ku nggaɓəla ra ka asəndə ra, abbər I an MTHLAKU na ka hirkur na kula vəi data, I an səntə ɓɗakkur ka jirkur akwa duniya. Antə I ana nggatə msərakur mji na ana hara su nayeri ni. I na MTHLAKU an pəla ngəni.”

²⁵MTHLAKU akwa pəla, “Saka ata si tə I ata sə ɗi mji na ka kaciyar dza daci, mji na aɗi thla kaciyar ɗəffa ɗa wa.

²⁶Mji nayeri ni an mjir Masar, ka Yahuda, ka Edom, ka maɗa' Ammon, ka Mowab, ka shanga mji na andzəndzi akwa mtakə na ana pamta shishir kuɗəmar kəra ɗa. Kamnyar wala tə shanga mjir Israila ku hara kaciya, da aɗi thla kaciya aka ɗəffa ɗa wa.”