Read bura-pabir Jikatuwayeri 1 Bible Online

Jikatuwayeri 1 - bura-pabir bible

Jikatuwayeri 1

¹Bərni Urushalima na ka mji hang waci, kulini ku ndzi kula mji akwa. Tsa na ku ndzi ola akwa nca tsəɗiyayeri waci, kulini tsa ku ndzi shini apa mwala kughung. Tsa na ku ndzi apa kwatam, kulini ku ngka apa mwala mafa.

²Parang tsa akwa tuwa ka duna aviraviri, ka shimwi akwa hwi ata pukəmari. Pazhirni aɗi na ndzi alari ka jirkur wala duku wa, mda aɗi wala pal akwa nca ɗa na mbil kamnyar shiktə ni wa, shanga ɗa ku ndzi dawayeri arni

³Dawayeri ku kədləmta mjir Yahuda kazhar tsəɗiyir ɗa, da ku na ɗa bwani ka kəthlər na mwavər. Da ku ra ndzi akwa nca durayeri damwa zum, da aɗi ka vəi tə hangkala ɗa ata ndzi pwipwiyari wa. Dawayeri arɗa ku kədlə ɗa ka ngkəi ɗa, kamnyar laku aɗi tə da amsərəmta akwa wa.

⁴Lakwayeri ar ləhar Sihiyona kulini ku ndzi apa mjir tuwa mshiyir ɗa, mji aɗi ana mwari akwa mbwar vəngkər səli akwa vir vəngkər səli aka Hyel kəra wa. Shanga nyarfayeri arni ku ndzi kula mda, tə pristayeri arni akwa nggyinggya kamnyar bwani. Mdə ku fatə maɗangkwiyirni ka təra ka da, antə Urushalima akwa ɗar bwani ka duna.

⁵Dawayeri arni ku mula alari ka nggyari ni, ku ndzi kasəla aka dawayeri arni ka da nggyari ni, kamnyar MTHLAKU an vu ka tsa ɗar bwani kamnyar bikayeri arni. Dawayeri ku fatə maɗa'ni, ka mwantə ɗa akwa tsəɗi damwa.

⁶Kuthlikur tə Urushalima kəgari ku ndzi su na ku təramta. Mji ol'olərni ku ndzi mtathlaku apa jikəl na ka mi, da aɗi ka dunar hwi ka msəra akəla mji na akwa kədlə ɗa wa.

⁷Kulini bwani ka kadla tə mjir Urushalima akwa ɗarari, ku vu ɗa ɗangtə olkur tə da kəgari waci. Sakatə da ləkwa tsiya dawar ɗa, da aɗi wutə mda wala duku na ata dlar ɗa wa. Dawayeri arɗa ku zhwal ɗa ka kumshi ɗa akwa asar tə da ləkwa.

⁸Mjir Urushalima ku hara biku na ɗimi kamta antə da ku ndzi sur cika. Shanga mji na ana nar səli ala ɗa sakanda, kulini da akwa rutə ɗa. Da ku wutə durakurər ɗa, antə tsa akwa nggyinggya ka ɗuwamta kəmari, kamnyar tsa ku ləkwa sur səli.

⁹Adiyakurərni ku ncantədzi ata pataliyirni, amma wala apani tsa aɗi ncantə damitədzi ata kəra asar na ata wutə ni wa. Apani ndlar Urushalima ku hara ɗimi ka duna, mdər shiktə ni aɗi wa. Dawayeri arni ku səma, antə tsa akwa tuwa abbər ka MTHLAKU dlar ni.

¹⁰Dawayeri arni ku famnya gənarni shang. Mjir Urushalima ku wutə sakatə dawayeri ni akwa ləkwa mbwar vəngkər səli ka ɓzamta, vəi natə MTHLAKU ku ngkatə ləkwari aka dur damwa.

¹¹Mjirni ana nggyinggya kəlara sakatə da akwa bara susəma. Da ana palɓəla gənar ɗa ka susəma natə ka da səma ta da mta. “Dlar yeru bu MTHLAKU, kamnyar yeru akwa ɗar bwani.

¹²Nənga su aɗi damitə giri ka yeru wa ri, giri na akwa təramta adzə yeru! Mji aɗi na ku ɗar bwani apa yeru wa, bwani natə MTHLAKU ku pungkər ala yeru, sakatə ɗəffari ku ɓzi ka duna.”

¹³Tsa ku thlentə u'u na thlata amtazi, u'u na ku mbamta ɗethlərna. Tsa nggəi dərku kamnyar na, ka ngkamta ra ata di. Antə tsa hwi ka zhar ra akwa bwaniyir nggawakur tədəku.

¹⁴Tsa ku wutə shanga bikayeri arna ka mbwahə ɗa shang ata kəma duku. Tsa hahəi ɗa ata wuli, antə duni ku kuri kamnyar kəgəɓkurari. MTHLAKU ku hamta ra aka dawayeri arna, natə su aɗi tə I amzhi hara ala ɗa wa.

¹⁵MTHLAKU ku rutə shanga sojayeri arna na ka duna ka nggəlar ɗa. Tsa kəgangkər ali sojayeri ka da kurəmta sojayeri arna na kusta kusta Tsa dlidlirəmta mjirna apa su tə mda ana hara aka anap akwa vəi ntsarari.

¹⁶An suayeri na hara tə I akwa tuwa ni, su na hara tə nci akwa hwi shimwi ni, Jiri mdər shiktə ra aɗi wa, tsuwa I aɗi ka mdər dunautə ra wa. Dawayeri ku nggyari ra, su aɗi tə mjirna amzhi vəkər kari wa.

¹⁷Urushalima ku ndzi apa mdər kiɗa na ku ndərar tsiyari kamnyar bara dlara, amma mdər dlar ni aɗi wa. MTHLAKU an ɗəmha abbər ka shanga ntəwul tsəɗiyayeri ar Urushalima ndzi dawarni. Da namtə ni apa tsa sur cika akwa nca ɗa.

¹⁸Amma su tə MTHLAKU hara ni an kalkal kamnyar I ku nggəlar ta kələngkər alari. Psi gir thləm ali, shanga giri na akwa bwayeri zumzum ka giri wul mwavərkur bwani tə I akwa. Mdə ku famnya kustayeri arna shili ka mwanki apa mafa, ka mwantə ɗa akwa tsəɗi mafakur.

¹⁹I ku kəga pazhayeri arna, amma təng da pwaktəmta ra. Pristayeri arna ka mji ol'ola ku kurəmtadzi akwa kutadi, sakatə da akwa bara susəma na ata kəsi mpika ɗa.

²⁰“MTHLAKU, wul jili bwani na pungkərdzi ali! Ɗəffi ɓzəɓzari ka duna. Hyali ku nthlə ra kamnyar kər ɓəɓalkur tə I hara ala ga! Mdər tsi mdə ni akwa kurəmta mji aɓəla ata lakwayeri, avəi ma mji akwa kurəmtadzi kamnyar məi na tsa ɗa.

²¹Mji ku nggatə ra akwa nggyinggya amma mdər shiktə ra aɗi wa. Dawayeri arna ku nggatə bwani tə I akwa, antə da ku kucali kamnyar tə ga an sənta asar ni ata kəri. Ka gə səntə vir natə ga ku hara alkawalari nda ka dawayeri arna ɗar bwani apatə I ku ɗari.

²²Wul shanga ɗimikur tə da hara, ka gə ɗi ɗa tsu apatə ga ku ɗi ra kamnyar bikayeri arna. I ku tuwa ka tuwa kamnyar bwani, har tə məyir su ləɓəla akwa kuti.”