Read bura-pabir Jikatuwayeri 2 Bible Online

Jikatuwayeri 2 - bura-pabir bible

Jikatuwayeri 2

¹Ɗəffa MTHLAKU ku ɓzi adzə mjir Urushalima, antə tsa pəla tsa ata ɗi ɗa. Wala tə Urushalima an afər gayar mjir Israila, wala tə tsa an vəi tə mda ana vəngkər səli alari ata, vir nda MTHLAKU ata kəli olkur ni ka psəmta akwa bərbər apa su hilhila.

²MTHLAKU ku huzamta shanga kəyir mjir Yahuda kula kətadza, ka ɓəgələmta katanggayeri na kalaktə tsəɗi ni. Tsa ku səntə sur səli ata kəra tsəɗi ni ka shanga kuthlikurayeri arni.

³Ɗəffa MTHLAKU ku ɓzi ka duna antə tsa kurəmta shanga sojayeri ar Israila. Tsa nggəlar dlar ɗa sakatə dawayeri arɗa ku si. Tsa ku ndzi apa u'ur bara na ata mbamta shanga mjir Israila.

⁴Tsa ku dinggatə afərni ata yeru apa yeru dawarni, ka tsəgəi shanga mji natə da an afər gayar yeru, tsa pumta ɗəffari na bwarbwar ni ata kəra Urushalima.

⁵MTHLAKU ku shamta Israila apa tsa dawarni, ka huzamta kəyayeri ar kuthlikur ka ndlagamta katanggayeri arni, ka vu mjir Yahuda akwa tuwa ka shimwi na akurkur wa.

⁶Mbwa natə yeru ana vəngkər səli alari akwa, antə MTHLAKU ka kərari ngkamta dlatu ata di apa kadakar gadina. Tsa hartə shanga vəyayeri ar vəngkər səli, ka tsi virayeri ar kucali ka Vir Ghərəmtaghəra arɗa, ka nggəlar kuthli japu ka pristayeri kamnyar ɗəffari na ɓzə ka duna.

⁷MTHLAKU ku nggəlar bagaɗi arni, ka mbwar vəngkər səli alari. Tsa hamta kəyayeri ar kuthlikur na akwa Urushalima akwa tsiya dawayeri arɗa. Dawayeri ni ku hara yarali akwa mbwar vəngkər səli ni, jili yarali tə yeru ana hara akwa vir vəngkər səli.

⁸MTHLAKU ku ɗəmha abbər tsa ata huzamta katangga ar Urushalima. Apatə mdər həna ana kəthlər ka səwa kamnyar ka hən ni thlatə dwaɗu, antə MTHLAKU ku kəthlər ka səwu kamnyar ka tsa huzamta ni karkar. MTHLAKU ku huzamta katanggayeri na kalaktə Urushalima, antə katanggayeri ni ku ndzi apa mji na akwa tuwa ata kəma duku.

⁹Nyarfayeri arni ku sha akwa həi zawar, tsa ku ɓəgələmta udzəmayerari ka ɓzamtə ɗa. Kuthlir ni kəga mji ol'ola arni ku titiləmtadzi apa mafayeri akwa tsəɗiyayeri damwa. Mda aɗi ana thlipə tsawayeri kəra wa, tsuwa MTHLAKU aɗi ana ncantə su aka naɓiyayeri kəra wa.

¹⁰Mji halhala ar Urushalima ku ndzəndzi ata di ka dləɓ səri, da hatə dasa ka pungkər bərbər ata kəra ɗa. Maɗangkwi Urushalima ku ngkyerghəi kəra ɗa ata di.

¹¹Nci ku ghəri akwa tuwa, məyir su aɗi ata kuti wa. Ɗəffi ɓzəɓzari ka duna kamnyar mjirna tə mdə kurəmta, kamnyar maɗangkyar na raka raka ka na ata hili, na apumta ata lakwayeri akwa daɓwa mta ka mba.

¹²Da akwa tuwa aka mama' ɗa kamnyar mi ka thləli na akwa kətə ɗa. Da akwa ndla ka thləvamtadzi akwa kərathla mama' ɗa ka mta, ata lakwayeri apa mji tə mdə ku dəkəi akwa mpa.

¹³Ai Urushalima, Urushalima na hirhirari, ka man tə I ata mzhi pəlari ri? I amzha ma shiktə ngə ri? Ai mda aɗi na ku ɗar ləkwa jili bwani ngəni apa gə wa. Kamnyar bwaniyir ngə ni ku hara ol kamta, apa manda natə datari aɗi wa. Mdər jaktə ngka ka ga apa na waci aɗi wa.

¹⁴Su aɗi tə naɓiyayeri ar nga ata pela ala gə wa tar thlandər, da aɗi ana hir pəlaɓəla ala gə bikər ngə wa, sakani da ata msərantə nga ta asar ngəni. Da ana ngkər labar na ata kəskəra gə daci, labar na thlandər na ata psu nga akwa sha.

¹⁵Shanga mji na ata təramta adzə nga ata ɓungkir tsi aka asar na wutə nga, Da ata ncaɓwi nga ka kədaɓtə kəra ɗa, da ata kumshi nga ka pəla, “Nggədza laku tə Urushalima akwa nggwa! Bərni na ɓɗakta shang, natə shanga mjir duniya ana kucali kamnyar ni!”

¹⁶Shanga dawayeri ar nga ata ncaɓwi ka nggəl nga, da ata fa thlira ɗa ka kumshi nga. Da ata pəla, “Yeru ku kuri ka tsa! Təng ɗəm antə yeru bara ka yeru shamta ni, antə virari ku si ashina!”

¹⁷MTHLAKU ku haratə su tə tsa ɗəmha, tsa ku nghyaɓəla su tə tsa pəla tsa ata harari. Tsa ku shamta Urushalima kula kətadzə ɗa, tsu apatə tsa ku pəla təng waci. Tsa ku zhar tə dawayeri ku nggyari ni ka hara kucali ata kəra ndlarni.

¹⁸Mjir Urushalima, tuwa giri aka MTHLAKU! Tuwa, gə na katanggar Urushalima! Ka shimwiyir nga hwi akwa nca ga apa yimər zərkəu, pci ka viri, ka gə ləkəma ka tuwa ni tədəku.

¹⁹Thlatə giri aviri, ka giri pi pari akwa tuwa abbər ka MTHLAKU dlar giri! Pəlaɓəla giri su na akwa damitə giri akwa ɗəffa giri alari, Kiɗə giri ni ka tsa kətadzə maɗa' giri, na akwa kurəmtadzi ka məi ata lakwayeri.

²⁰Wul jili bwani tə yeru akwa bu MTHLAKU! Kamnyar mə tə ga akwa ɗi yeru apani ri? Mwanki akwa ɓɗə maɗa' ɗa natə da hirhira! Har mji ata mzhi kurəmta pristayeri ka naɓiyayeri ar MTHLAKU, akwa mbwar vəngkər səli alari tə ncari ata wulari!

²¹Mdə ku pugəmta kustayeri kəga mji halhala ata layi, mdə ku kurəmta maɗadakwi kəga maɗangkwi ka katsakar. Kamnyar vir nda ɗəffa ga ku ɓzi, antə ga ku kurəmta ɗa kula kətadza.

²²Vir nda sakatə ɗəffa ga ku ɓzi, ga ku kəgangkər ala yeru dawayeri akwa kəlara bwa, apatə mda ana tsaptə mji akwa vir kucalər kəldzi. Antə mda aɗi na msərəmta vir nda wala duku wa, dawayeri ku kurəmta maɗangkyar na, maɗa' kuti natə I hirhira ka kəlanta!