Read bura-pabir Jikatuwayeri 3 Bible Online

Jikatuwayeri 3 - bura-pabir bible

Jikatuwayeri 3

¹I an mdə na akwa rəbutə ni, tsuwa I an asəndə su tə mda ana pəla ɗar bwani ni, kamnyar ɗəffa Hyel ku ɓzi ata kəri.

²Tsa ku kədləɓəla ra ka mwantə ra akwa kuthlə na pələku, vəi tə parakəu aɗi wala raka wa.

³Tsa akwa dlaɓu ra ka tsiyari, ata kər ata kər takulak pci.

⁴Tsa ku vu tə kumərdzi ku thlarəmtadzi, ka vu tə ɗethlərna ku hadləmtadzi.

⁵Tsa ku kalaktə ra ka hartə ra akwa bwaniyayeri ka ɗəffə ɓzəɓza.

⁶Tsa ku vu ra akwa ndzi akwa kuthlu, jili kuthlə natə mji na ku mtə waci andzəndzi akwa.

⁷Tsa ku kalaktə ra ka katangga natə I amzhi fəlɓəlari ka msərəmta wa, Tsa ku mbwi ra ka məsəsal na kəgəɓu.

⁸I ku kəga Hyel ka kuraku abbər ka tsa dlar ra, amma tsa aɗi hir psi thləm ali wa.

⁹Tsa ku dzəɓtə lakurna ka pela na ol'ola, ka namtə lakurna tə tsa ndzi mbalmbalari.

¹⁰Tsa ku ɗuwardzi apatə mwaɓəlu wala tsəngi ana hara, kamnyar ka tsa fələngkər ali ka dəka.

¹¹Tsa kədləmta ra kazhar laku ka thləthləhumta ra raka raka, ka təra kazhar ra shira.

¹²Tsa kətsə yimər laliyirni, ka dinggatə afərni ka iya.

¹³Tsa shi ra akwa ɗəffi ka afər kwajarni.

¹⁴I ku ndzi sur kumshi aka shanga mji takulak pci, da ana ɓukci akwa kyartəkur ata kəri.

¹⁵Tsa ku vu ra akwa ɗar bwani na ku təra kərathli, kəi ɗar bwani apa mdə na ku satə su na ɗəɗahəu.

¹⁶Tsa ku vu ra akwa ɓɗə pela na ku ɓəgələmta thliri, ka dlidlirəmta ra akwa bərbər.

¹⁷I ku ndəkə ka su tə mda ana pəla msərakur, ka fwari su tə mda ana pəla kucali.

¹⁸Antə I pəla, “Darajar na ku mti, tsuwa su aɗi tə I ajaktə wuta akəla MTHLAKU wa.”

¹⁹Kəlara sakatə I ɗangtə bwani tə I ɗari ka ndzəndziyirna na ciju kazhar kəi, ɗangtər ɗa ana ndzi ali ɗəɗahəu apa kwara kuta.

²⁰I ana dzama ata kər tədəku, antə ɗəffi ana ɓzə ka duna.

²¹Amma wala apani kəlara sakatə I ku ɗangtə su ngəni pal ni, I ana ndzi ka vuwur su akwa ɗəffu.

²²Kamnyar MTHLAKU tsu akwa hir mjirni, antə tsa aɗi zhar ka mdə kurəmta shanga yeru wa, kamnyar tsa ana kətadzə mda ba saka madi.

²³Ɗəɗəp ɗəɗəpa da ana ngka apa bilən, Kuta gə duku MTHLAKU, antə shanga mji ana mbərsa ka ga.

²⁴I pəla akwa ɗəffi, “Tar MTHLAKU duku antə I kəgari, antə I ata mbərsa ka tsa.”

²⁵MTHLAKU ana hara ɓɗakkur aka mdə na ana mbərsa ka tsa, ka mji na ana bara ni.

²⁶Antə kuji ka mdə mbwi ɗəffari, ka tsa səka ka MTHLAKU mbantə ni.

²⁷Kalkal ka mdə thliptə ndzi ka kanaɗi, tsu akwa ngkyarkurərni.

²⁸Ma sakatə mda akwa ɗar bwani kuji ka tsa ndzi ɗiɗi, ka tsa dləɓ səri akwa kəlara sakatə MTHLAKU akwa ngkərtə ni.

²⁹Ndzi ka tsa tərghəi kərari ka nggyarghəidzi, nuhum tsu Hyel ata mbantə ni.

³⁰Ma mdə ku tsa ni ata pukəmari na pal, ka tsa nggitə ka shinari alari pukəmari na dukwari, ka tsa dlu rutə ka sur səli.

³¹Kamnyar MTHLAKU aɗi ata nggəlar mjirni ba saka madi wa.

³²Tsa ata hara ka ɗəffa mdə ɓza, amma tsa ata jaktə kətadzə mda, kamnyar hirkurərni na aɗi ana palidzə wa an ola.

³³Kamnyar MTHLAKU aɗi ana nggatə msərakur nar bwani aka mdə wa, wala nggatə msərakur ɓzamtə ɗəffa mji wa.

³⁴Mda aɗiya nar bwani na ɗimi kamta aka pərsənayeri wa,

³⁵wala ngkatə ta mda ahara su na kalkal aka mji wa, kamnyar Hyel na ka Səli ta Shang akwa wul shanga su.

³⁶MTHLAKU aɗi ana hir ka mdə mbaləmta jirkur, tə mdə kəgari akwa mbwar shariya wa.

³⁷Mda aɗi na amzhi hara su wa, tar ma MTHLAKU ku kələngkər alari.

³⁸Tar MTHLAKU an ka dunar vu ka su na ɓɗaku wala asar hara.

³⁹Kamnyar mə tə mburu ana nggungguni kəlara sakatə mdə ku ɗi mburu ata kəra bikər mburu ri?

⁴⁰Ai kuji ka mburu dzama, ka wul suayeri na ɗimi ɗimi tə mburu ana hara, ka mburu ngka adzə MTHLAKU ka tubi alari.

⁴¹Kuji ka mburu hara adduwa ka ɗəffa mburu duku, ka haptu tsiya mburu aka Hyel na amtazi, ka pəla,

⁴²“Yeru ku hara biku ka nggəlar ta kələngkər ala ga, antə MTHLAKU, ga aɗi tifəmta ala yeru wa.”

⁴³Ɗəffa ga ku ɓzə ka duna adzə yeru, antə ga ku nu yeru ka kurəmta yeru kula kətadza.

⁴⁴Ga ku ɗuwar kər nga akwa dlamba antə adduwar yeru amzhi təramta akwa ka mzhitə ngə wa.

⁴⁵Ga ku namtə yeru apa mji na kula ampani akwa nca mjir duniya apa mzhiku tə mdə famta ka pumta.

⁴⁶Shanga dawayeri ar yeru akwa nggənggəl yeru.

⁴⁷Thlivər ku pungkərdzi ata kəra yeru, kamnyar dawayeri ku ɓdləmta tsəɗi yeru ka huzamta, da kurəmta mjir yeru ka higəlantə shanga sur yeru.

⁴⁸Nci ku nghyi ka shimwi apa yimi akwa thlyagha, kamnyar mjirna na ku kurəmtadzi.

⁴⁹Nci akwa hwi shimwi kula thləthlata, hərkə aɗi wa.

⁵⁰Tar ma MTHLAKU na amtazi ku haghəi kəmari ka wutə su tə yeru akwa ɗarari.

⁵¹Ɗəffi ku ɓzi sakatə I wutə su na hara aka mwanki na akwa bərni ni.

⁵²Dawayeri arna ku nggəlar ra kula suari aɗi, da nggəi dərku ali apatə mda ana hara aka ɗika.

⁵³Da ndzəhəuwa ra ka mpika akwa ku, ka ɗəməngkər ali pela.

⁵⁴Yimi ku shamta kəri, antə I kəta abbər an mtərna.

⁵⁵Akwa kuta ku na zurang ni antə I ku hara adduwa ala ga, MTHLAKU.

⁵⁶I ku kiɗə nga ka gə nggatə tuwarna kara dlar ra, antə ga ku nggatə ra.

⁵⁷Ga ku nggatə ra ka si kudzəha adzə ra, ka pəla ali, “Ga aɗiya thlivər wa!”

⁵⁸Ga ku si ka msərantə ra, MTHLAKU, ga ku mbantə mpikəi.

⁵⁹Ga ku wutə ɗimikur tə mdə hara ali, antə MTHLAKU, ndzi alkaliyirna, ka gə hara ali shariyar jirkur.

⁶⁰Ga ku wutə laku tə dawayeri arna shang, akwa ɗəmhə suayeri na ɗimi ɗimi ata kəri.

⁶¹MTHLAKU, ga ku nggatə jili nggənggəla tə da hara ali. Ai ga səndə shanga ɗimikur tə da ɗəmha ata kəri.

⁶²Da ana gha ra ka gari na ɗimi ata kəri takulak pci.

⁶³Ɗəɗəpa ka tahaku da akwa ngkər ra ka kumshi ra.

⁶⁴Ɗi ɗa kamnyar ɗimikur tə da hara ni MTHLAKU.

⁶⁵Ka gə shuwumta ɗa, MTHLAKU, ka da ndzi ka ɗəffu na ɗimi, kula barka.

⁶⁶Ka gə nu ɗa ka kurəmta ɗa kamnyar ɗəffa gə na ɓza, ka gə shamta ɗa ata kəra duniya, MTHLAKU!