Read bura-pabir Jikatuwayeri 4 Bible Online

Jikatuwayeri 4 - bura-pabir bible

Jikatuwayeri 4

¹Dinar ar yeru na ana mbəlmbəla ku ngka gulfəɗəkka, dinar na ɓɗakta shang ku higəlantədzi ka ndzi kula daraja, Pelar mbwar vəngkər səli aka Hyel ku titiləmtadzi ata lakwayeri.

²Maɗadakwi Urushalima na ka daraja waci apa dinar, kulini da ku ndzi apa həi hən tughum na ndzang!

³Wala kilamtaku ana nar uwa aka maɗa'ni ka wulwul ɗa, amma mjirna ku ndzi apa mwala zhimnakayeri na ana təra kazhar maɗa' ɗa.

⁴Da ana zhar ka wulya maɗa' ɗa ula kamnyar thləli, ka maɗa' ɗa ləkwa kiɗə susəma kamnyar mi, amma mdər na ɗa susəm ni aɗi wa.

⁵Mji na səm susəma na msəra ta shang kulini da akwa mtə ka məi ata lakwayeri, mji na kəla akwa kari dəɓa kulini da akwa pi akwa pənju.

⁶Ɗya tə mdə hara aka mjirna ku təramta natə mdə hara aka mjir Sodom natə Hyel ku shamta ɗa ata saka duku, mdər dlar ɗa aɗi wala duku wa.

⁷Waci mji ol'olər Urushalima tə mdə hamta aka Hyel, ku ndzi kəcəkəcari cau mwapu apa mpur puwa, dza ɗa ɓəɓal tsuwa lapiya, akwa mbəlmbəl mamza njau apa liyar dəɓa.

⁸Amma kulini kəma ɗa ku ndzi mənggəl ta tumtum, har mda amzhi nggaɓəla ɗa ata kutadi kəra wa, Kəsəm dza ɗa ku shushurəmnyadzi ata ɗethlər ɗa, ka ndzi ul'ulari apa udzəm.

⁹Kuji mji na mta akwa mpa ta mji na mtər məi, kamnyar mjir mtər mi ana ɗar bwani kamta, da ana thlarəmtadzi kamnyar tur susəma.

¹⁰Asar na si ata kəra mjirna ku ndzi sur thlivəra ka duna, mwanki ka tsiya ɗa sur ɗa ku ɓwamnya maɗa' ɗa tə da hirhira, ka kwasəmnya kamnyar mwavərkur mi na tsa ɗa.

¹¹Ɗəffa MTHLAKU ku ɓzi ka duna antə tsa ku pumta ɗəffə bwarbwarkurərni ata kəra Urushalima, tsa ku hatə u'u ata bərni ni ka mbamta ni tuktukku.

¹²Mda aɗi akwa duniya ni wala duku wa, wala kuthlyayeri ar tsəɗiyayeri damwa ma aɗi wala duku na mbərsa abbər, dawa ata nggitə mwari akwa nyarfayeri ar Urushalima wa.

¹³Amma an su na hara kamnyar bikayeri tə naɓiyayeri ka pristayeri ar Urushalima ku hara, da an vu tə mji na kula biku ku kurəmtadzi ni.

¹⁴Jiri, naɓiyayeri ka pristayeri ni akwa kadla ata lakwayeri apa mdlyangayeri, da ku thləpərtədzi ɗimi ɗimi ka mamshir mji, antə mdər hir tsəkwar ɗa aɗi wa.

¹⁵“Tərar giri azi!” ndə mji ala ɗa. “Giri dlimbur! Giri aɗiya tsəkwar yeru wa!” Apani da ku hwi ka ndzi mji kadlə kadla akwa tsəɗiyayeri zumzum, kula mdər hir dlu ɗa avəyarngkiɗa.

¹⁶MTHLAKU surni an titiləmta ɗa, tsa aɗi akwa damitədzi kamnyar ɗa kəra wa. Tsa aɗi kətə səliyir pristayeri wa wala wutə darajar mji ol'olər ɗa wa.

¹⁷Nca yeru ku ghəri akwa sək dlara akəla pazhir yeru, akəla tsəɗi na amzhi kuri wujir wa.

¹⁸Dawayeri akwa kədlə ghəla yeru tə yeru anggitə mwa ata lakwayeri wa. Sakar yeru abaka kura, mbil vir jika jika, sakar yeru ku kurtə hara.

¹⁹Dawayeri na akwa kədlə yeru ni ɓəɓatu ta dukwayeri na ta kutahyel. Da ana kədlə yeru ba ata garayeri, ka thla yeru ba akwa mtakəu.

²⁰Da ku ngkəi kuthlir yeru akwa dərkur ɗa kuthli natə MTHLAKU an vəta, kuthli natə yeru hirhira apa səwur mpika yeru, natə yeru tamata abbər tsan ata sə mbuli yeru akwa tsiya tsəɗiyayeri na ata dlər yeru.

²¹Giri na mjir Edom ka mjir Uz na ku nggəlar yeru, ləkəma giri ka kucali ka kumshi. Amma kulikulini giri ata ləkwa bwani, giri ata wika ka ntsumta kariyir giri ka mwa dura.

²²Giri na mjir Sihiyona, ɗya tə MTHLAKU akwa hara ala giri kamnyar bikər giri abaka kura, Giri aɗi ata ləkəma ka ndzi aɓəla apa mafayeri wa. Amma giri na mjir Edom, MTHLAKU ata ɗi giri kamnyar bikər giri, tsa ata kəlar bikər giri ata bəbal.