Read bura-pabir Jikatuwayeri 5 Bible Online

Jikatuwayeri 5 - bura-pabir bible

Jikatuwayeri 5

¹MTHLAKU, ɗangtə bwani tə yeru ɗari akəla dawayeri bu, Wulhə jili sur səli tə yeru akwa!

²Ga ku dlutsə tsəɗiyir yeru ka hamta aka mjir tsəɗi damwa, antə kəyayeri ar yeru ku ngka akwa tsiya mətəpiyayeri.

³Yeru ku ndzi mutayeri kula baba, mwanki na ya yeru ku ndzi kughungayeri.

⁴Tar ka yeru masə yimi tə ka yeru sa, tar ka yeru masə udzəmər mba u'u.

⁵Mda akwa kədlə yeru apa kwara ka kəla, yeru ku ghəri amma mda hir ka yeru ghərəmtaghəra wa.

⁶Kwabə yeru awutə susəma na ata mzhi yeru, tar ma yeru kiɗa akəla mjir Masar ka Assiriya.

⁷Waci kəkayeri ar yeru ku hara biku amma da ku mti, antə yeru akwa ɗar bwani kamnyar bikər ɗa.

⁸Mafayeri an akwa hara kuthlikur ata kəra yeru amma mda aɗi na ambuli yeru akwa tsiya ɗa wa.

⁹Yeru ana psəmta mpika yeru akwa bara susəmər mnya yeru, kamnyar dəkalayeri aɗi akwa mtakə na ana thla laku.

¹⁰Mi ku pudza ala yeru dzəkdzəku, har tə dza yeru ku təli bwarbwar apa lindi.

¹¹Mji ku ngka mwankir yeru ka pi ka da akwa Sihiyona, da ku pi ka maɗangkwi yeru akwa shanga diyayeri ar Yahuda.

¹²Mdə ku mbwamta kwakunayeri ka hahəi ɗa ata tsiya ɗa, Mda aɗi akwa nar səli aka mji na ol'ola wa.

¹³Mdə ku pu maɗadakwi yeru ka da hadla ka dwali, maɗashili akwa wanggaldzi akira kələr udzəm na kəgəɓu.

¹⁴Mji ol'ola aɗi ana tsaptədzi kamnyar hamta sauri kəra wa, tsuwa maɗadakwi aɗi ana tsa su ka hara ha kəra wa.

¹⁵Yeru aɗi ka su tə yeru akucali ata kər kəra wa, yeru ana ɓathla kamnyar ɗəffa yeru msəra ala yeru, amma kulini yeru akwa tuwa kamnyar ɗəffə ɓzəɓza.

¹⁶Daraja tə Urushalima kəgari ku təri! Yeru ku hara biku antə sha ku wutə yeru.

¹⁷Kamnyar su ngəni ku vu tə dza yeru ku mti, ka vu tə nca yeru ku mbwi kuthlu,

¹⁸kamnyar Gar Sihiyona ku ndzi kula mda, ka ndzi vəi nggwara ar kilamtakayeri.

¹⁹Amma MTHLAKU, ga an kuthli har ba saka madi ga an ata hara kuthlikur har ba saka madi.

²⁰Kamnyar mə tə gə fwari ata kəra yeru turuk ri? Kamnyar mə tə gə zhar yeru ka fəi apani ri?

²¹Ka gə vu ka yeru jaktə ngka adzə nga MTHLAKU, ka gə dlu yeru! Kara jaktə na ala yeru darajar yeru na waci.

²²Ma apani wa tar ma ga an ata hir yeru kəra wa ja, ma ɗəffa ga ku ɓzi kamta ata kəra yeru.