Read bura-pabir Ezekiyel 1 Bible Online

Ezekiyel 1 - bura-pabir bible

Ezekiyel 1

¹Vir laga akwa vir na ntəfkur ar thliya na nfwarkur akwa məva na makkumarkur, sakatə I ata mnya Thlyagha Kebar ata kəma duku kəga mjir Yahudi tə mdə fatə ɗa ka mwantə ɗa akwa mafakur ahar Babila ni, antə vəi na amtazi kəlardzi antə I wutə suayeri laga tə Hyel ncanta ali.

²Akwa vir na ntəfkur ar thliya ni, akwa məva na ntəfkur aghəla tə mdə ngkəi Kuthli Yehoyacin ka mwantə ni akwa mafakur,

³antə MTHLAKU gari aka Ezekiyel na prist, na ɓzər Buzi, akwa tsəɗi Babila, kudzəhə ka Thlyagha Kebar. Anda antə Ezekiyel nggatə dunar Hyel si ata kərari.

⁴Antə I na Ezekiyel ku wula amta. Antə I wutə shambar laga na mwavər thlata akwa bwar yala, ka zhimaru na ola, ka parakəu na kalaktə ni akwa mbəla, ka u'u na akwa mbəlmbəla apa wurka akwa kutari. Tsuwa ata ɗəffa u'u ni, su laga aɗi na akwa mbəlmbəla apa əmza tə mdə fwavumta.

⁵Tsuwa akwa kuta zhimaru ni suayeri laga aɗi nfwar na dludzər su na ka mpika. Tsuwa ma ga ata wul ɗa apa da dludzi ka mda,

⁶amma kəlara pal akwa nca ɗa ka kəmari nfwar nfwar, ka ɓəɓəku nfwar nfwar tsuwa.

⁷Səla ɗa dwaɗ dwaɗu, tsuwa kutar səla ɗa apa kutar səla ɓzər gyal. Tsuwa da akwa mbəlmbəla wutsəl wutsəl apa liyar əmza tə mdə fwavumta.

⁸Tsuwa da ka tsi apa mda akira ɓəɓəka ɗa na ata thlimbəla ɗa na nfwar ni. Nggədza laku tə kəma suayeri ngəni nfwar ni akwa, ka laku tə ɓəɓəka ɗa ni akwa.

⁹Ɓəɓəka kəlara pal akwa nca ɗa akwa tsəkwar ɓəɓəka nvwa ni, tsuwa da akwa mwa ata kəma duku akwa bwa duku, kula shinar dza ɗa.

¹⁰Kəlara pal akwa nca su na ka mpikə ni ka kəmari zumzum nfwar, dludzər kəma mda təbwakəma, ka dludzər kəma tsəngi təbwa mazəm, ka dludzər kəma gyal təbwa matsəkar, ka dludzər kəmari na duku təbwa hili.

¹¹An jili laku tə kəma ɗa akwa. Tsuwa ɓəɓəka ɗa na suɗsuɗə ni pəbəlpəbəlari amta, kəlara ɓəɓəku akwa tsəkwar ar nvwani. Mambila ɓəɓəkayeri na suɗsuɗə ni tsuwa da hartə dza ɗa kəgari.

¹²Antə kəlara pal akwa nca suayeri ngəni nfwar na ka mpikə ni ku təra dwaɗu ka bwakəmari, ka mwari akwa vəi tə mambəl ku mwantə ni, kula shinar kəmari abwa damwa.

¹³Tsuwa akwa nca suayeri na ka mpikə ni, su laga aɗi apa hakthlir u'u, wala apa parakər u'ur zafu, akwa mwari ka ngka ka bwahili tədəku akwa daɓwa ɗa, akwa hamta parakəu apa wurka an akwa səɓəla.

¹⁴Tsuwa suayeri na ka mpikə ni akwa hwi ka mwari ka ngka ka ufti apa parakər wurka.

¹⁵I tsu akwa wul suayeri na ka mpikə ni, təng I wutə su laga apa garegare ata di adzə kəlara pal akwa nca ɗa nfwar ni.

¹⁶Nggədza laku tə garegareyeri ni akwa, ka laku tə mdə namtə ɗa akwa. Shanga ɗa akwa mbəlmbəla apa pelar dəɓa laga, tsuwa səla ɗa shang jili duku, tə mdə pagalɓəla ɗa akwa nvwa ɗa.

¹⁷Kəlara sakatə da akwa mwa, da ata mzhi mwa akwa kəlara bwar kuɗəma nfwar ni, kula shinardzi.

¹⁸Tenga garegareyeri na nfwar ni shang ol'ola akwa thlivərantə mda, tsuwa nca ɗa an kalaktə mnya garegareyeri ni.

¹⁹Antə kəlara sakatə suayeri na ka mpikə ni ku mwa, garegareyeri ni ata mwa adzə ɗa, tsuwa kəlara sakatə da ku fəla, garegareyeri ni ata fəla ka ləmta ata kəma duku kəga da.

²⁰Kəlara bwa tə mambəl ni ku mwantə ɗa, suayeri na ka mpikə ni ata mwari, tsuwa garegareyeri ni ata mwari kəga da. Kamnyar mambələr suayeri na ka mpikə ni an akwa garegareyeri ni.

²¹Antə kəlara sakatə suayeri na ka mpikə ni ku mwa, garegareyeri ni ata mwa. Kəlara sakatə suayeri na ka mpikə ni ku thləthlata, garegareyeri ni ata thləthlata. Tsuwa kəlara sakatə suayeri na ka mpikə ni ku fəla, garegareyeri ni ata fəla ata kəma duku kəga da.

²²Tsuwa su laga aɗi tawarwar apa dludzər kəra mbwa ata kəra suayeri na ka mpikə ni. Tsuwa suari akwa mbəlmbəla apa pelar dəɓa, tsa su na ata ndatə mda.

²³Tsuwa akira su na apa kəra mbwa ni, ɓəɓəka suayeri na ka mpikə ni ku ndəraɓəladzi, tə kəlara ɓəɓəku pal akwa tsəkwar ar nvwa ni, ka hartə dza ɗa ka mambila ɓəɓəka ɗa na suɗsuɗə ni.

²⁴Tsuwa kəlara sakatə suayeri na ka mpikə ni akwa mwa, I ana nggatə kuraka ɓəɓəka ɗa apa kuraka yimayeri an akwa hwi, apa kuraka dlərər Hyel na ka Duna ta Shang, apa kuraka sojayeri na dlama dlama na ka hangkala ɗa haptəhaptari. Kəlara sakatə suayeri na ka mpikə ni ku thləthlatə tsəkəm, da ana pughəi ɓəɓəka ɗa.

²⁵Antə kuraku laga səɓəla akwa su na apa kəra mbwa ata kəra ɗa ni. Kəlara sakatə da ku thləthlatə tsəkəm, da ana pughəi ɓəɓəka ɗa.

²⁶Tsuwa ata kəra su na apa kəra mbwa tawarwar ni, su laga aɗi na dludzər dəkəl kuthlikur tə mdə namtə ka pelar dəɓa, ka dludzər mda andzəndzi ata kəra dludzər dəkəl kuthlikur ni.

²⁷Tsuwa I wutə baɗita ata kusarari har ka ləmta ni akwa mbəlmbəla apa əmza ata ɗəffa u'u. Antə baɗita ata su na dludzi ka kusarari har ka ləghəi ni tsuwa, I wutə su laga apa u'u, antə parakəu ku kalaktə ni.

²⁸Apatə mda ana wutə kigyau ana hamta parakəu akwa dlamba vir tə yimi ata hara, antə mdə wutə vəi na kalaktə ni ni akwa mbəlmbəla. Ngəni an dludzər səli ar MTHLAKU. Antə sakatə I wutə su ngəni, I ndla ka kəmi ata di. Antə I nggatə kuraka mdə laga akwa gari.