Read bura-pabir Ezekiyel 10 Bible Online

Ezekiyel 10 - bura-pabir bible

Ezekiyel 10

¹Sakatə I akwa wul su, təng I wutə su laga apa dəkələr kuthlikur tə mdə nam ka pela na ɓɗaku ar sapfiya, ata kəra su laga dlampəramma amta abwa kəra kerubayeri ni.

²Antə MTHLAKU pəla aka mdə na ka kari lilin ni abbər, “Mwa akwa daɓwa garegareyeri na akira kerubayeri ni. Nghyantə kuta tsiya ga ka hakthlir u'u, ka gə titiləmta hakthlir u'u ni ata kəra bərni ni.” I tsu akwa wul su, təng tsa ləmbwa.

³Tsuwa kerubayeri ni athləthlatə təbwar anəm ar mbwar vəngkər səli ni sakatə mdə ni ləmbwa ni, antə dlamba ku nghyantə kuta bəbal na akwa ni.

⁴Antə parakər səliyir MTHLAKU ku thlata amta abwa kəra kerubayeri ni, ka təra mwari adzə bagaɗi nyarmbwa ni. Dlamba ni ku nghyantə kutambwar vəngkər səli ni antə parakər səliyir MTHLAKU ni ku nghyantə kuta bəbal.

⁵Antə har mda akwa mzhi nggatə kuraka ɓəɓəka kerubayeri ni akwa bəbal na aɓəlaɓəla, apa kuraka Hyel na ka Duna ta Shang an akwa ndəra.

⁶Sakatə MTHLAKU tsawa aka mdə na ka kari lilin ni abbər, “Kətə u'u na akwa daɓwa garegareyeri na akira kerubayeri ni.” Antə mdə ni ləmbwa ka thləthlata athlimbəla garegare pal.

⁷Antə pal akwa nca kerubayeri ni haɓəla tsiyari ka vu akwa u'u na akwa daɓwa ɗa ni, ka kətsə hakthlir u'u ni, ka pu akwa tsiya mdə na ka kari lilin ni. Antə mdə ni kətə hakthlir u'u ni ka təra ləɓəla.

⁸Tsuwa I ku wutə su laga apa tsiya mda akira ɓəɓəka kerubayeri ni.

⁹I akwa wul su, təng I wutə garegareyeri laga nfwar athlimbəla kerubayeri ni, kəlara kerub ka garegare pal athlimbəlari. Tsuwa garegareyeri ngəni akwa mbəlmbəla apa pela na ɓɗaku ar Tarshish.

¹⁰Tsuwa shanga garegareyeri ngəni nfwar ni dludludzi kəga nvwa ɗa, kəlara pal akwa nca garegareyeri ni kadludzi akwa gular garegare nvwani.

¹¹Kəlara sakatə kerubayeri ni ata mwa, da ata mzhi mwari akwa kəlara bwar kuɗəma pal na abwakəma ɗa. Kəlara bwa tə da ku thlentə kəma ɗa, təng da ata nuwari, aɗi tar ka da shinardzi wa.

¹²Dza ɗa shang, baɗita ata bwahila ɗa, ka tsiya ɗa, ka ɓəɓəka ɗa, purəm kəga garegareyeri na nfwar ni, shang ncir ncayeri.

¹³Antə I nggatə kuraku laga akwa kəga garegareyeri ngəni ni abbər, “Tayayeri na akwa tawardzi.”

¹⁴Tsuwa kəlara kerub pal ka kəmari nfwar. Kəmari na pal an kəma kerub, kəmari na suɗkur an kəma mda, kəmari na makərkur an kəma tsəngi, ka tsuwa kəmari na nfwarkur an kəma duku.

¹⁵Antə kerubayeri ni fəla ka ləmta. Ngəni an suayeri na ka mpika tə I wuta adzə Zərkəu Kebar ni.

¹⁶Kəlara sakatə kerubayeri ni ku mwa, garegareyeri na athlimbəla ɗa ni ata mwa tsuwa. Tsuwa ma sakatə kerubayeri ni ku kəlar ɓəɓəka ɗa, ka fəla kazhar di, garegareyeri ni ata ndzi tsu ata thlimbəla ɗa.

¹⁷Ma sakatə kerubayeri ni ku thləthlatə tsəkəm, garegareyeri ni ata thləthlatə tsəkəm tsuwa, antə ma sakatə kerubayeri ni ku fəla, garegareyeri ni ata fəla ata kəma duku kəga da. Kamnyar tə mambələr suayeri na ka mpikə ni akwa garegareyeri ni.

¹⁸Antə parakər səliyir MTHLAKU ku təra kazhar bagaɗi nyarmbwar vəngkər səli ni, ka ra thləthlata amta abwa kəra kerubayeri ni.

¹⁹Tsu ata nci, antə kerubayeri ni kəlar ɓəɓəka ɗa, ka fəla kazhar di, antə garegareyeri ni ku fəla ata kəma duku ka da. Antə da ra thləthlata akwa nyarfu na abwa raghəi ar ləvəi akwa mbwar MTHLAKU ni, ka parakər səliyir Hyelər Israila amta abwa kəra ɗa.

²⁰Nayeri ni an suayeri na ka mpika tə I wuta akira Hyelər Israila, adzə Thlyagha Kebar nda.

²¹Kəlara pal akwa nca ɗa ka kəmari nfwar, ka ɓəɓəkari nfwar, tsuwa ɓəɓəka ɗa ni an apa tsiya mda.

²²Tsuwa kəma ɗa tsu apa ar suayeri tə I wuta ata mnya Thlyagha Kebar nda. Antə kəlara kerub ku mwa dwaɗu ka bwakəmari.