Read bura-pabir Ezekiyel 11 Bible Online

Ezekiyel 11 - bura-pabir bible

Ezekiyel 11

¹Antə mambəl ku haptə ra, ka mwantə ra akwa nyarfu na abwa raghəi ar ləvəi akwa mbwar MTHLAKU, na ka kəmari awul bwar raghəi ni. Antə I wutə mji shili sərkumari ka ntəfu, akwa nyarfur ləvəi akwa mbwar vəngkər səli ni. Antə akwa nca ɗa ni I ku wutə Yaazaniya na ɓzər Azzur, ka Pelatiya na ɓzər Benaiya, natə da an mji ol'olər mji.

²Antə Hyel pəla ali, “Ɓzər mda, nayeri ni an mji na ana ɗəmhə ɗimikur ka hamta sauri ar kəmanggarkur akwa kuta bərni ngəni.

³Da an mji na ana pəla, ‘Sakar hən mbwayeri aɗi hara katagu wa. Bərni ngəni an tughum ta ni, antə yeru an kum ni.’

⁴Antə ka gə hara naɓikur ata kəra ɗa, gə na ɓzər mda.”

⁵Antə mambələr MTHLAKU jaktə si ata kəri, ka pəla ali kəi pəla aka mjir Israila abbər, “MTHLAKU akwa pəla,‘Ngəni an su tə giri akwa dzama ata kər mjir Israila, kamnyar I asəndə su na akwa hangkala giri.

⁶Giri ku tsəgəi mji hang akwa bərni ngəni, ka nghyantə lakwayeri na akwa kuta di ka mshiyayeri leɓleɓu.’

⁷Antə MTHLAKU na ka Duna ta Shang, akwa pəla, ‘mshiyayeri tə giri pumta leɓleɓu akwa kuta bərni ni da an kum ni, antə bərni ngəni an tughum ta ni. Amma giri na mji ol'ol ni, mda ata puɓəla giri kazhar tughum ni.

⁸Giri ku thlivər mpa, antə I ata səntə mpa ata kəra giri. I na MTHLAKU na ka Duna ta Shang an pəla.

⁹I ata fwaɓəla giri kazhar bərni ni, kəi hamta giri aka mətəpiyayeri, kəi thlamta shariya ata kəra giri.

¹⁰Mda ata kurəmta giri akwa mpa, tsu akwa kəla tsəɗi giri Israila. Antə giri ata nggaɓəla abbər I an MTHLAKU.

¹¹Bərni ngəni aɗi ata ndzi ala giri apa tughum ta wa, tsuwa giri aɗi ata ndzi apa kum akwa wa. I ata ɗi giri har ba akwa kəlara tsəɗiyir giri Israila.

¹²Antə giri ata sənda abbər I an MTHLAKU. Kamnyar giri aɗi nu tsawayeri arna wa, wala haratə suayeri tə I thlamta abbər ka giri hara wa, ata vəyari giri ku nu surharar mjir tsəɗiyayeri na kalaktə giri.’ ”

¹³Sakatə I tsu akwa hara naɓikur ni, təng I nggata abbər Pelatiya na ɓzər Benaiya ni ku mti. Antə I ndla ka kəmi ata di ka tuwa ka kuraku akwa pəla, “Aiyi MTHLAKU na ka Duna ta Shang, ga ata kuri tsəgəi mambila mjir Israila ni ya?”

¹⁴Antə MTHLAKU ku gari ali ka pəla,

¹⁵“Ɓzər mda, ga kəga maɗama' nga, kəga yangkura ga, kəga mji tə giri ata kəma duku kəga da akwa mafakur, ka shanga mjir Israila, shanga giri nggwa hwatu, antə mji na akwa Urushalima akwa pəla ala giri abbər, ‘Giri ku hara ciju ta MTHLAKU, kulini yeru antə mdə hamta ala yeru tsəɗi ngəni.’

¹⁶Kamnyar ngəni antə MTHLAKU na ka Duna ta Shang akwa pəla, ‘Wala tə I ku famta ɗa ka mwantə ɗa ciju akwa nca mji, wala tə I ku titiləmta ɗa akwa tsəɗiyayeri damwa, tsu I ku ndzi Vəi na Ɓɗakkarkara ala ɗa akwa saka laga, akwa tsəɗiyayeri tə da mwari akwa ni.

¹⁷Tsuwa pəla ala ɗa abbər I na MTHLAKU na ka Duna ta Shang, ata fwaɓəla ɗa kazhar tsəɗiyayeri tə mdə titiləmta ɗa akwa ni, kəi tsaptə ɗa ata vəi duku, kəi jaktə hamta ala ɗa tsəɗi Israila.’

¹⁸Ma sakatə da ku ngka anda, da ata famta shanga suayeri na ɗimi ɗimi, ka shanga sur cika na akwa tsəɗi ni.

¹⁹Antə I ata na ala ɗa ɗəffu duku, kəi vu mambəl na bilən akwa ɗəffa ɗa. I ata kəɓəla ɗəffər pela na akwa dza ɗa ni, kəi hamta ala ɗa ɗəffu na ɓɗaku,

²⁰kamnyar ka da mzhi nu tsawayeri arna, ka da hara shanga suayeri tə I thlamta ala ɗa abbər ka mdə hara, ka ɓəlatə ɗa. Antə da ata ndzi mjirna, antə I ata ndzi Hyelər ɗa.

²¹Amma ar mji natə ɗəffa ɗa ku nutə suayeri na ɗimi ɗimi kəga sur cika, I ata ntəmta ɗimikur tə da hara ni tsu ata kəra ɗa sur ɗa. I na MTHLAKU na ka Duna ta Shang an pəla.”

²²Antə kerubayeri ni ku haptə ɓəɓəka ɗa, ka garegareyeri ni athlimbəla ɗa, ka parakər səliyir Hyelər Israila amta abwa kəra ɗa.

²³Antə parakər səliyir MTHLAKU ku thlatə ka təra kazhar kuta bərni ni, ka ra ndzi ata kəra gar na abwa raghəi ka bərni.

²⁴Tsu akwa wulsu ni antə mambələr Hyel ni ku haptə ra, ka jaktə mwantə ra ahar Babila, adzə mji na akwa mafakur anda ni. Antə wulsu ni ku təra ka ləmta kazhar ra.

²⁵Antə I jikatə shanga su tə MTHLAKU ncanta ali ni aka mji na akwa mafakur ni.