Read bura-pabir Ezekiyel 12 Bible Online

Ezekiyel 12 - bura-pabir bible

Ezekiyel 12

¹Antə MTHLAKU ku gari ali ka pəla,

²“Ɓzər mda, ga andzəndzi akwa nca mji na ka kəra ɗa ɓəɓal. Da ka nca, amma da ana wutə su wa, tsuwa da ka thləm, amma da aɗi ana nggatə su wa, kamnyar da mji na ka kəra ɗa ɓəɓal.

³Antə ɓzər mda, ɗəmhə thləvur nga kamnyar ɗuwa, ka gə təra apa mdər ləkwa tsəɗi mafakur, tsu ka pci, ata nca ɗa. Ga ata ɗəmhə kariyir nga apa mdər mwari akwa tsəɗi mafakur, ka gə mwari akwa vəi damwa tə nca ɗa akwa wul nga. Nuhum da aɗar dzam su ata kər ka nggaɓəla, wala tə kəra ɗa ɓəɓal ni.

⁴Ka gə fwaɓəla thləvur nga tsu tə pci aɗi tə nca ɗa akwa wulari, thləvur mwari akwa tsəɗi mafakur ni. Ka gə təra ka mnya tahaku tə nca ɗa akwa wulari, tsu apatə mjir mwari akwa tsəɗi mafakur ana hara.

⁵Ka gə ntuli gula ata dza katangga ata nca ɗa, ka gə ləɓəla ka thləvur ngə ni ata gula ni.

⁶Tsu ata nca ɗa, antə ga ata hatə thləvur ngə ni ata thlimbəla ga, ka gə təra tsu ka vəi zhimzhim. Ga ata hartə kəma ga ta ga awutə tsəɗi ni, kamnyar I ku namtə nga apa seɗa aka mjir Israila.”

⁷Antə I hara kalkal apatə MTHLAKU ku pəla ali. I ku fwaɓəla thləvurna tsu ka pci, apa thləvur mdər mwari akwa tsəɗi mafakur. Antə tahaku tsuwa I ku ntuləmta gula ata dza katangga ni ka tsi surna. Tsuwa ata nca ɗa antə I ku ləɓəla ka thləvurna ata thlimbəli akwa kuthlu.

⁸Səɓəla ɗəpari ɗəɗəpa antə MTHLAKU gari ali abbər,

⁹“Ɓzər mda, mjir Israila na ka kəra ɗa ɓəɓal ni akwa yu nga abbər, ‘Man tə ga akwa harari nə ri?’

¹⁰Antə kara pəla ala ɗa su tə I na MTHLAKU na ka Duna ta Shang akwa pəlari abbər, ‘Labar ngəni an kamnyar kuthlir Urushalima, ka shanga mjir Israila na akwa Urushalima.

¹¹Pəla ala ɗa abbər I an seɗa ala giri. Apatə I ku hara, apani antə suari ata wutə giri. Antə mda ata fatə giri ka mwanta akwa tsəɗi mafakur.’

¹²Antə wala kuthlir ɗa ata kətə thləvurni ata pathlahari ka təra akwa kuthlu ata kəma duku kəga da.Tsa ata ntuli gula ata katangga ni ka tsa ləɓəla ata. Tsuwa tsa ata hartə kəmari ta tsa awutə tsəɗi ka ncari.

¹³Antə I ata pungkər alari banggamarna kəi kətə ni akwa. Antə I ata mwantə ni akwa tsəɗi Babila, tsəɗi mjir Kaldiya, wala tə tsa aɗi ata wutari wa, amma tsa ata mta anda.

¹⁴Antə I ata titiləmta shanga mji na kalaktə ni akwa shanga bwa, watau mjir dlar ni kəga sojayeri arni. Tsuwa I ata ntsuɓəla katsakarərna, kəi kədləghəla ɗa kəgari.

¹⁵Antə da ata sənda abbər I an MTHLAKU, ma sakatə I ku ndəkəmta ɗa akwa nca mji, ka titiləmta ɗa tsəɗiyayeri.

¹⁶Amma I ata zhar bwadukwa ɗa ka da msəra akwa mpa ni, ka akwa mi ni, ka akwa shilkayeri ni, kamnyar ka da sə jikaɓəla mnya ɗa ata kəra sur cika tə da hara akwa tsəɗiyayeri tə da mwari akwa ni. Atar apani antə da ata səndəɓəla abbər I an MTHLAKU.”

¹⁷Antə MTHLAKU ku gari ali,

¹⁸“Ɓzər mda, ka gə kwasə buradi ka dza ga akwa kədza, ka gə sa yimi ka tsiya ga akwa kənggəra kamnyar thlivəra.

¹⁹Pəla aka mjir Israila su tə I na MTHLAKU akwa pəlari ata kəra mji na ka ndzi akwa Urushalima akwa tsəɗi Israila ni abbər da ata sə kwasə buradi arɗa ka damitədzi, ka da sa yimi ka thlivəra. Kamnyar mda ata sə fwaɓəla shanga su na akwa tsəɗiyir ɗa, kamnyar tə da mji na hir haptə hangkal.

²⁰Bərniyayeri na ka mji ata sə ndzi fya, antə fakayeri ata sə ndzi shizha. Apani antə giri ata nggaɓəla abbər I an MTHLAKU.”

²¹Antə MTHLAKU ku jaktə gari ali ka pəla,

²²“Ɓzər mda, man karapur karapu ngəni tə mda ana pəla akwa tsəɗi Israila, abbər, ‘Virayeri akwa təramta saɓəl, kula su tə mdə wuta akwa wulsu nghyaɓəladzi’ nə ri?

²³Kamnyar ngəni kara pəla ala ɗa su tə I na MTHLAKU na ka Duna ta Shang akwa pəlari, abbər, ‘I ata tsi karapu ngəni, antə mda aɗi ata jaktə kəthlər ka karapu ngəni akwa Israila wa.’ Amma ka gə pəla ala ɗa abbər virayeri ni ku hara kudzəha, tə kəlara su mdə wuta akwa wulsu ni ata sə nghyaɓəladzi.

²⁴Kamnyar mda aɗi ata jaktə thlandər ata kəra wulsu kəra wa, wala hara hakdzər namtə ɗəffa mda akwa Israila wa.

²⁵Kamnyar I na MTHLAKU an ata gari ka da, tsuwa su tə I pəla ni ata haratədzi. Mda aɗi jaktə shamta saka kəra wa, amma akwa sakar giri, giri na nggyarɗu ni, antə I ata pəla su kəi harata. I na MTHLAKU na ka Duna ta Shang an pəla.”

²⁶Antə MTHLAKU jaktə gari ali abbər,

²⁷“Ɓzər mda, nggədza mjir Israila akwa pəla abbər, ‘Su tə Ezekiyel akwa wuta akwa wulsu ni, ata jaktə fəi akəmazi, su tə tsa hara naɓikur ata kər ni an su na ciju akəmazi.’

²⁸Antə ka gə pəla ala ɗa abbər, I na MTHLAKU na ka Duna ta Shang akwa pəla, ndər tə I pəla aɗi ata jaktə fəi wa kula nghyaɓəladzi wa, kəlara su tə I pəla ata haratədzi. I na MTHLAKU na ka Duna ta Shang an pəla.”