Read bura-pabir Ezekiyel 13 Bible Online

Ezekiyel 13 - bura-pabir bible

Ezekiyel 13

¹Antə MTHLAKU gari ali ka pəla,

²“Ɓzər mda, hara naɓikur ar pəlangkər ata kəra naɓiyayeri ar Israila na ana hara naɓikur ar su na ku si akwa kəra ɗa ni abbər, ‘Psi giri thləm aka su tə MTHLAKU pəla!’

³MTHLAKU na ka Duna ta Shang akwa pəla abbər sha ku wutə naɓiyayeri na caku, na ana nu dzamər ɗəffa ɗa daci, kula da wutə su!

⁴Israila, naɓiyayeri ar nga ku ndzi kula ampani apa ufwayeri na akwa fyayeri.

⁵Da aɗi ləmta akwa vəi tə banggwa ni ntagamtadzi wa, tsuwa da aɗi namtə məciɓa aka mjir Israila, kamnyar sə dlara akwa mbuli ɗa akwa dləra na ata si akwa vir ar MTHLAKU ni wa.

⁶Da akwa thlandər, ka thlandər abbər da ku wutə su akəla Hyel. Da ana pəla, ‘MTHLAKU akwa pəla,’ amma MTHLAKU aɗi thlentə ɗa jiri wa, amma wala apani da akwa hamta jiri abbər su tə da pəla ni ata hara jiri.

⁷Wulsu tə giri pəla giri wutə ni aɗi shang thlandər wa ya, tə giri ana thlandər abbər giri wuta akəla Hyel ni? Har giri ana pəla, ‘MTHLAKU akwa pəla,’ wala tə I aɗi pəla su wa.”

⁸“Antə apani I na MTHLAKU na ka Duna ta Shang akwa pəla abbər təng tə giri ku ngkər ndər na aɗi jiri wa, ka thlandər abbər giri ku wutə su, to, I ata nggəlar giri. I na MTHLAKU na ka Duna ta Shang an pəla.

⁹I ata ɗi naɓiyayeri na ana thlandər abbər da ku wutə su, ka mji na ana pwaktəmta mda abbər da mjir hakdzi. Da aɗi ata ləkwa tsaptədzi na ar mjirna wa, tsuwa mda aɗi ata rəbutə thləma ɗa akwa kakaɗər thləma mjir Israila wa, tsuwa da aɗi ata ləkwa tsəɗi Israila wa. Atar apani antə giri ata sənda abbər I an MTHLAKU na ka Duna ta Shang.”

¹⁰“I ata hara apani kamnyar tə giri ku shamta mjirna akwa laku. Kamnyar giri akwa pəla, ‘Msərakur,’ akwa sakatə msərakur aɗi wa. Tsuwa kəlara sakatə mji ku həntə banggwa təng naɓiyayeri ngəni ana fəi dzari ka həi mwapu.

¹¹Pəla aka mji na fəi dza banggwa ni ka həi mwapu ni abbər banggwa ni ata ndla! Kamnyar yimi ata təra ata kər ka handzəkəla, ka shambar na mwavər si ka tsa ndlamta ni.

¹²Antə ma sakatə banggwa ni ku ndla, mji aɗi ata yu giri abbər, ‘Ama həi mwapu tə giri fəi dzari kəgari nə ri?’ ”

¹³“Kamnyar ngəni antə MTHLAKU na ka Duna ta Shang akwa pəla abbər kamnyar ɗəffi na ku ɓzi, I ata vu ka shambar na mwavər səɓəla, ka yimərhyel səghəi ka duna, ka handzəkəla na ol'ola səghəi, shang kamnyar ndlamta banggwa ni.

¹⁴I ata ndlamta banggwa natə giri fəi dzari ka həi mwapu ni, ka tsa ndla ata di, har ka mdə mzhi wutə kirari ata bəbal. Ma sakatə banggwa ni ku ndla, tsa ata shamta giri akwa. Antə apani giri ata sənda abbər I an MTHLAKU.

¹⁵Apani antə I ata pumta ɗəffi ata kəra banggwa ni, ka ata kəra mji na fəi dzari ka həi mwapu ni. Tsuwa I ata pəla ala giri abbər banggwa ni aɗi kəra wa, tsuwa mji na fəi dzari ma aɗi kəra wa,

¹⁶watau naɓiyayeri na hara naɓikur ata kəra Urushalima, ka wuta abbər tsa ata wutə msərakur, akwa sakatə msərakur aɗi wa ni. I na MTHLAKU na ka Duna ta Shang an pəla.”

¹⁷Antə MTHLAKU pəla ali abbər, “Ɓzər mda, hərtə kəma ga aka mwanki na akwa nca mjir nga na ana hara naɓikur ata kəra su tə da dzama daci. Ka gə shuwumta ɗa.

¹⁸Ka gə pəla ala ɗa su tə MTHLAKU na ka Duna ta Shang pəla, abbər, ‘Sha ku wutə giri mwanki! Giri na ku mbwatə məsəpar ata shanga wulya tsiya giri, ka namtə sur barkər aka kəla mda kalkal ka saɓəlkurərni kamnyar ka da ra nggwar mjirna! Aghəla tə giri ku həlatə mpika mjirna, giri ana wuta apa giri ata mzhi msərantə mpika giri ya?

¹⁹Giri ana hilantə thləmi ata nca mjirna kamnyar ka giri wutə mthlir barli raka akwa kutatsiya giri, ka buradi tə mda ana nthləi ala giri raka. Atar thlandər tə giri ana hara aka mjirna, na ana psi thləm aka thlandərayeri ar giri, antə giri ana tsi mji natə aɗi kalkal ka da mtə wa, ka zhar mji natə aɗi kalkal ka mdə zhar ɗa ka mpikə wa.’ ”

²⁰Antə apani, MTHLAKU na ka Duna ta Shang akwa pəla, “I ku nggəlar məsəparayeri tə giri ana mbwa, tə giri ana kəthlər kəgari akwa həla mjirna ka giri ngkəi ɗa apa ɗika ni. Antə I ata ɓudzəgəmta ɗa kazhar shaha giri, kəi msərantə mpika mji tə giri ngkəi apa ɗika ni.

²¹Tsuwa I ata kwahəmta sur barkər ar giri ni, kəi mbulɓəla mjirna akwa tsiya giri. Antə da aɗi ata ndzi akwa tsiya giri apa su tə mdə ngkəi akwa bara ni kəra wa. Apani antə giri ata sənda abbər I an MTHLAKU.

²²Kamnyar giri ku fəi shaha mjir jirkur atar thlandərayeri ar giri, wala tə arna I aɗi fəi shaha ɗa wa. Tsuwa giri ku dunautə mji na kəmanggar abbər da aɗiya zhar kəmanggarkurər ɗa ni ka da msərantə mpika ɗa wa.

²³Kamnyar ngəni giri aɗi ata jaktə wulsu ar thlandər ni kəra wa, wala jaktə hakdzə wa. I ata mbulɓəla mjirna akwa tsiya giri. Apani antə giri ata sənda abbər I an MTHLAKU.”