Read bura-pabir Ezekiyel 14 Bible Online

Ezekiyel 14 - bura-pabir bible

Ezekiyel 14

¹Vir laga mji ol'olər Israila laga si adzə ra, ka ndzəndzi akəmi.

²Antə MTHLAKU gari ali ka pəla,

³“Ɓzər mda, mji shili ngəni ku hamta ɗəffa ɗa aka haptayeri, ka fəfahə suayeri na ku vu ɗa akwa hara biku. Antə kalkal kəi zhar ɗa har ka da yu ra su laga ya?

⁴Kamnyar ngəni, ka gə pəla ala ɗa abbər I na MTHLAKU na ka Duna ta Shang pəla, ‘Kəlara mdər Israila na ku vu hangkalari akwa nu haptayeri, tə tsa zhar tə da ndzi sur vu ni akwa hara biku, antə tsa si adzə naɓi, to I ka kəri an ata hamta ala amsa kalkal ka hangkur haptayeri arni.

⁵I ata hara apani kamnyar kəi ndəkərtə hangkala mjir Israila, na ku ndəkəmtadzi ka iya atar nu haptayeri arɗa.’ ”

⁶“Antə kara pəla aka mjir Israila, su tə I na MTHLAKU na ka Duna ta Shang akwa pəlari, abbər, ‘Ka giri tubi! Ka giri zhar nu haptayeri ar giri! Ka giri zhar hara shanga sur cika ar giri.

⁷Kamnyar kəlara mdər Israila, wala mətəpi na ka ndzi akwa Israila, na ku zhar nu ra, ka vu hangkalari akwa nu haptayeri, na ndzi sur vu ni akwa hara biku, amma wala apani tsa si adzə naɓi kamnyar bara sauri akəli, to, I na MTHLAKU ni ka kəri surna an ata hamta alari amsari!

⁸I ata hərtə kəmi alari ar nggəlar ni. I ata namtə ni ka tsa ndzi seɗa ka sur ngkəra, kəi kəɓəla ni akwa nca mjirna.Atar apani antə giri ata sənda abbər I an MTHLAKU.

⁹Antə ma har naɓi ni ku hara bəlkəkur ka ngkər ndər, I na MTHLAKU an ndəndatə naɓi ndaga. Antə I ata nca kuleng alari, kəi kəɓəla ni akwa nca mjirna Israila.

¹⁰Antə da ata wutə watsəɓər bikər ɗa, watau naɓi ni ka mdə na mwari adzə ni kamnyar yu su ni, japwa ɗa ata dlu ɗya jili duku.

¹¹I ata hara ngəni kamnyar ta mjir Israila asə jaktə pəra kazhar ra, wala jaktə diɓərantə kərɗa ka bikayeri arɗa. Apani antə da ata ndzi mjirna, antə I ata ndzi Hyelər ɗa. I na MTHLAKU na ka Duna ta Shang an pəla.’ ”

¹²Antə MTHLAKU ku gari ali ka pəla,

¹³“Ɓzər mda, ma mjir tsəɗi laga ku hara biku ali atar ndzi kula jirkur, antə I ku haptə tsi abbər I ata ɗi ɗa atar thlamta lakur wutə susəmərni, ka atar thlentə mi na ata kurəmta mji kəga mwaɓiyir ɗa shang ata kəma duku.

¹⁴Wala ma mji shili ngəni makər ni an akwa tsəɗi ni, watau Nuhu, ka Daniyel, ka Ayuba, ɓɗakkurər ɗa aɗi ata mzhi msərantə mjir tsəɗi ni wa, tar da ka kərɗa daci. I na MTHLAKU na ka Duna ta Shang an pəla.

¹⁵Wala tsuwa ma I ku vu tə mwaɓiyayeri ar mtaku təramta akwa tsəɗi ni, ka tsəgəi mji na akwa, ka namtə ni fya, har tə mdər mzhi jaktə təramta akwa aɗi wa kamnyar mwaɓiyayeri ni,

¹⁶wala ma mji shili ngəni makər ni an akwa tsəɗi ni, I akwa kahyel ala giri abbər, apatə I na MTHLAKU na ka Duna ta Shang aɗi, wala maɗa' kuta ɗa shili ka mwanki, mda aɗi ata msərantə ɗa wa, tar da ka kərɗa daci an ata msərantədzi. Antə tsəɗi ni ata ndzi fya.

¹⁷Wala ma I səntə mpa ata kəra tsəɗi ni, ka pəla, ‘Ka katsakar təramta akwa tsəɗi ni, kəi tsəgəi mji kəga mwaɓi ata kəma duku na akwa.

¹⁸Tsuwa wala ma mji shili ngəni makər ni an akwa tsəɗi ni, I akwa kahyel ala giri abbər, apatə I na MTHLAKU na ka Duna ta Shang aɗi, wala maɗa' kuta ɗa shili ka mwanki, mda aɗi ata msərantə ɗa wa, tar da ka kərɗa daci an ata msərantədzi.

¹⁹Wala tsuwa ma I ku thlentə shilku akwa tsəɗi nda, ka pumta ɗəffi na bwarbwar ni ata kəra ɗa ka tsi mji, har ka kurəmta mji kəga mwaɓiyayeri na akwa,

²⁰to, wala ma Nuhu, ka Daniyel, ka Ayuba an anda akwa tsəɗi ni, I akwa kahyel ala giri abbər, apatə I na MTHLAKU na ka Duna ta Shang aɗi, wala maɗa' kuta ɗa shili ka mwanki, mda aɗi ata msərantə ɗa wa, tar da ka kərɗa daci an ata msərantədzi, kamnyar kəcəkəcəkur arɗa.’ ”

²¹Kamnyar MTHLAKU na ka Duna ta Shang akwa pəla abbər, “Apa madi tə mda ata mzhi msəra, ma sakatə I ku thlentə bwaniyayeri na mwavər mwavər nfwar, watau bwani ar mpa, ka mi, ka mwaɓi mtaku, ka shilku, ata kəra Urushalima ri! Bwani na ata kurəmta mji kəga mwaɓiyayeri shang ata kəma duku!

²²Wala apani, tsu mda ata wutə mji na ata mbil ka mpika akwa tsəɗi ni, maɗashili kəga maɗankwi, tə mda ata səɓəla ka da adzə giri akwa mafakur. Ma sakatə giri ku wutə hala ɗa ka surharar ɗa, da ata ndzi ala giri sur shiktə giri ata kəra shanga asarayeri tə I sənta aka Urushalima ni.

²³Da ata shiktə giri, ma sakatə giri ku wutə hala ɗa ka surharar ɗa. Antə giri ata sənda abbər I aɗi sənta asarayeri ngəni ni kula suari aɗi wa. I na MTHLAKU na ka Duna ta Shang an pəla.”