Read bura-pabir Ezekiyel 16 Bible Online

Ezekiyel 16 - bura-pabir bible

Ezekiyel 16

²“Ɓzər mda, pəlaɓəla aka Urushalima shanga sur cika tə tsa hara ni.

³Ka gə pəla, ‘Nggədza su tə I na MTHLAKU na ka Duna ta Shang akwa pəla ata kəra Urushalima abbər, gə mdər Kanana, kamnyar mahəhəyir nga akwa tsəɗi mjir Kanana. Baba nga an mdər Amor, tsuwa mama' nga ngkwar Hitti.

⁴Ata kəra yaɓəladzər nga, vir tə mdə yaɓəla nga, mda aɗi thlamta shimbura gə wa, wala pərantə nga ka yimi kamnyar kəcimta ngə wa, tsuwa mda aɗi fufuləmta dza ga ka una wa, wala pərtə nga akwa zhaɓi na gərgəra wa.

⁵Mda aɗi na kətadzə nga ka hara ala gə suayeri ngəni wa. Amma mdə ku psəmta nga akwa mtaku, kamnyar ga ku ndzi sur cika vir tə mdə yaɓəla nga.’ ”

⁶“ ‘Saka tə I akwa təramta antə I wutə nga akwa takəla akwa mamshir yar nga. Sakatə I wutə nga akwa mamshir ngə ni antə I pəla, “Ndzi ka mpika!”

⁷I ku vu tə ga ku kəla lapiya apa nfwa na akwa mtaku. Antə ga ku kəla, ka hara saɓəl, har ka hara ɓzərngkwa na ola akwa ha sur dəɓa na ata mbəlmbəla. Ga ku ha uwa, tsuwa shishir nga ku kəli. Amma wala apani gə tsu dura, kula ləptu.’ ”

⁸“ ‘Saka tə I akwa jaktə təramta adzə nga ka damwa, antə I wul nga, ka wuta abbər sakar nga ar bara sal ku hara. Antə I pəbələngkər ləptərna na ola ata kəra ga, ka hartə durakurər nga. Antə mwa ku hara mnya duku ka ga, ka mbwi alkawal har ka kahyel, tsuwa ga ku ndzi arna. I na MTHLAKU na ka Duna ta Shang an pəla.

⁹Antə I pərantə nga ka yimi, ka kəcimta mamshir nga, ka kəkərtə dza ga ka mal.

¹⁰Antə I hadza ala gə ləptu tə mdə dəɓatə ka ndəɓwa, ka hata ala gə ɓaɓi tə mdə nam ka kəsəm ɓɗaku. Tsuwa I ku namta ala sur barkər tə mdə na nam ka lilin na ɓɗaku, ka mbwadza ala gə zhaɓər gəna.

¹¹Antə I dəɓatə nga ka suayeri na ɓɗakɓɗaku, ka hata ala gə surtsi, ka gənar wulya.

¹²Tsuwa I ku hata ala gə lenduwar kucir, kəga sur thləm, ka dzakwar kuthlikur na ɓɗaku laga.

¹³Apani antə mdə ku dəɓatə nga ka dinar ka adzərfa. Tsuwa ləptər nga an ləptər lilin na ɓɗaku, ka zhaɓər gəna tə mdə dəɓata ka ndəɓur tsi. Ga ku kwasə ɗəvər mpu na ɓɗakta shang, ka cirməma, ka mal. Antə ga ku kəla ka hara dakwi ka duna, har ka sə ndzi apa kuthli mwala.

¹⁴Tsuwa thləma ga ku tuwa akwa shanga tsəɗiyayeri kamnyar dakwikurər nga, kamnyar ɓɗakkur ɓzərngkwakur nga ku mwanta aka vəyari atar daraja tə I hamta ala gə ni. I na MTHLAKU na ka Duna ta Shang an pəla.’ ”

¹⁵“ ‘Amma ga akwa mbərsa ka ɓɗakkurər nga ka olkur thləma gə na tuwa ni, har tə ga ku ləkwa hara karwakur, ka gyalntə kər nga aka kəlara mdə na akwa təramta.

¹⁶Ga ku fatə bwadukwa zhaɓayeri ar nga, ka dəɓatə vəi vəngkər səli aka haptayeri ar nga kəgari, ka hara karwakur ata. Jili su ngəni aɗi ɗar hara wa, tsuwa aɗi ata jaktə hara wa.

¹⁷Tsuwa ga ku fatə sur dəɓa na ɓɗakɓɗaku tə mdə nam ka dinar ka adzərfa, sur dəɓa natə I an na ala ga, ka namtə dludzər mji shili kəgari, ka hara karwakur ka da.

¹⁸Tsuwa ga ku fatə ləptayeri ar nga tə mdə dəɓata ka ndəɓur tsi, ka hartə ɗa kəgari, ka pwi mal na arna ka tulari na arna akəma ɗa.

¹⁹Tsuwa susəma natə I hamta ala ga, watau mpu na liktikti, ka mal, ka cirməma, natə I ndlantə nga kəgari. Amma ga ku fatə ka ra pwi ɗa akəma ɗa, kamnyar ka da ndzi saɗakar sur shiwura na msəra ala ɗa. I na MTHLAKU na ka Duna ta Shang an pəla.’ ”

²⁰“Antə ga ku fatə maɗa' nga shili ka mwanki, natə gə yaɓəla ali, ka hamta ɗa apa saɗaka susəma tə ka da kwasəmnya. Apa karwakur tə gə hara shang ni aɗi mzhi ngə wa,

²¹tar tə gə kurəmta maɗa'na, ka hamta ɗa saɗaka ala ɗa.

²²Akwa sakatə ga akwa hara sur cika ka karwakurər nga, ga aɗi ɗar ɗangtə sakar ngkyarkurər ngə wa, sakatə gə dura kula ləptu, akwa takəla akwa mamshir nga.”

²³Antə I na MTHLAKU na ka Duna ta Shang pəla, “Sha ku wutə nga! Sha ku wutə nga! Tə ata kəra shanga ɗimikurər ngə ngəni,

²⁴ga ku jaktə həntə mbwayeri na nal nal aka dludzər mji ni akwa shanga vəi tsaptədzi na akwa kuta di.

²⁵Ga ku həntə mbwayeri na nal nal akwa kəlara vəi tə laku ku ɗengidzi akwa kuta di, kamnyar ka gə gyalntə ɓɗakkurər nga anda akwa karwakur, atar hamta kər nga aka kəlara mdə na akwa təramta ar laku, ka vərantə karwakurər ngə ni.

²⁶Tsuwa ga ku hara karwakur ka mjir Masar, ntəwulayeri ar nga na ka nggukər dza hang ka duna, ka vərantə karwakurər nga, kamnyar ka gə thlentə hangkali.

²⁷Antə kulini I ku nca kuleng ala ga, I kəmta bwa tə mdə thli ala ga, ka hamta nga aka dawayeri ar nga na hir mbulamkur ni, watau maɗankwi Filistiya na akwa ngga səliyir halər nga na akwa hara cika aka mdə ni.

²⁸Tsuwa ga ku hara karwakur ka mjir Assiriya, kamnyar tə mji na aɗi ni aɗi mzhi ngə wa. Ga ku hara karwakur ka da, amma wala apani aɗi mzhi ngə wa.

²⁹Ga ku vərantə karwakurər ngə ni atar ndzi karwar mjir fəli na ahar Babila, amma wala apani aɗi mzhi ngə wa.”

³⁰“Gə ka jili ɗəffu laga na mtathlaku kamta, ndə I na MTHLAKU na ka Duna ta Shang, təng tə ga akwa hara shanga suayeri ngəni, surharar karwa na kula səli!

³¹Ga ku həntə hən na nal akwa kəlara vəi tə lakur kuta di ku ɗengidzi akwa kuta di, ka mbwayeri na nal nal akwa kəlara vəi tsaptədzi na akwa kuta di. Amma ga aɗi ncantə halər karwa wa, təng tə ga aɗi dlu kwaba karwakur wa.

³²Gə ndzi apa mwala na ana ləka, na ana dlu mətəpi ata vəya salngkiɗa.

³³Mji shili ana hamta cautayeri aka mwanki na karwa, amma ar nga ga an ana hamta cauta aka shanga mjir bara nga, har ga ana hamta kwaba kamnyar ndəkərtə hangkala mji akwa kəlara bwa, ka da si adzə nga.

³⁴Antə apani akwa karwakur ni gə zum ka karwayeri damwa, təng tə ar nga aɗi mji shili an bara ka da pi ka gə wa, tsuwa mda aɗi na nta ala gə kwabari wa, amma ga andər ntə ɗa! Apani karwakur ngə ni zum.”

³⁵“ ‘Kamnyar ngəni, karwa ragai, psi thləma ga, kara nggatə ndərər MTHLAKU.

³⁶I na MTHLAKU na ka Duna ta Shang akwa pəla kamnyar tə ga ku kəlar ashira ga, ka kəlar vəi durakur nga akwa karwakur aka bangayeri ar nga. Tsuwa kamnyar tə ga ku vəngkər səli aka haptayeri, ka hamta ala ɗa mamshir maɗa' nga,

³⁷to nggədza su tə I ata harari. I ata tsaptə shanga mji na bangər nga natə ga ana nggatə msərakurər ɗa, mji tə gə hir ɗa, ka mji tə ga aɗi hir wa, shang ata kəma duku. I ata tsaɓəngkər ɗa ala ga akwa kəlara bwa, kəi fəi nga dura akəma ɗa, kamnyar ka da wutə durakur nga apa vir tə mdə yaɓəla nga.

³⁸Tsuwa I ata hara ala gə shariya apatə mda ana hara shariya aka mwanki na ku ləka, ka mwanki na ku pumta mamshir mji. Antə kamnyar ɗəffi na ku ɓzi ka duna kamnyar səlka, I ata tsi nga.

³⁹I ata hamta nga aka mji na bangər nga, antə da ata huzamta mbwayeri ar nga na nal nal ni, kəga vəyayeri na nal nal tə gə namtə kamnyar vəngkər səli aka haptayeri ni. Da ata fəi zhaɓər nga, ka shanga sur dəɓa ar nga na ɓɗakɓɗaku, ka da zhar nga dura kula ləptu.

⁴⁰Da ata tsaɓəngkər mji ata kəra ga, ka da ndzəndzəhtə nga ka pela, ka da thləthlau nga raka raka ka katsakarayeri arɗa.

⁴¹Da ata mbamta mbwayeri ar nga, ka hara ala gə shariya ata nca mwanki hang. I ata vu ka gə zhar hara karwakur ni, antə ga aɗi ata jaktə hamta kwaba aka bangayeri ar nga kəra wa.

⁴²Apani antə ɗəffi ata pwi ata kəra ga, tsuwa I aɗi ata səlkər hirkur ata kəra ga kəra wa. I ata peri hangkali, antə ɗəffi aɗi ata ɓzə kəra wa.

⁴³Ga aɗi ɗangtə laku tə I wulwul nga akwa sakar dakwikurər ngə wa, amma ga ku ɓzamtə ɗəffi atar shanga suayeri ngəni. Antə apani I ata ntəmta nga watsəɓər suayeri tə gə hara ni. Kamnyar ata kəra shanga sur cika tə gə hara ni, ga ku vəri ka hilhilkur! I na MTHLAKU na ka Duna ta Shang an pəla.’ ”

⁴⁴“ ‘Kəlara mdər kəthlər ka karapu ata sə tsa karapu ngəni ata kəra ga, abbər, “Hala mama'ni an hala ngkwa ni.”

⁴⁵Jiri gə ngkwarma' nga, na nggəlar salngkiɗa kəga maɗa'ni. Gə tsu apa maɗama' nga na maɗankwi, na nggəlar shilər ɗa kəga maɗa' ɗa. Jiri mama' nga an ngkwar Hitti, baba'nga tsuwa an mdər Amor.

⁴⁶Tsuwa ngkwarma'nga na ola an Samariya, na ka ndzi kəga maɗa'ni na maɗankwi akwa bwar yala. Ngkwarma'nga na raka tsuwa an Sodom, na ka ndzi kəga maɗa'ni na maɗankwi akwa bwar anəm.

⁴⁷Amma aɗi surharar ɗa na sur cika daci antə gə nuwa ka thliptə wa. Awa, akwa saka laga raka har ga ku təramta ɗa akwa hilhilkur akwa kəlara su.

⁴⁸Jiri I na MTHLAKU na ka Duna ta Shang akwa kahyel abbər apatə I aɗi, ngkwarma'nga Sodom ka maɗa'ni na maɗankwi aɗi hara su na ɗimi na mzhitə su tə gə ka maɗa' nga na maɗankwi hara wa.

⁴⁹Nggədza jili biku tə ngkwarma'nga Sodom hara. Tsa ka maɗa'ni na maɗankwi ana nca kər olkur. Nggədza da ka susəma hang apa ka da pumta, tsuwa da akwa ngga msərakur swaiswai, amma aɗi dlar mjir bwani ka mjir tur su wa.

⁵⁰Da mji na ka kər olkur, antə da ku hara sur cika akəmi, antə I ku famta ɗa sakatə I wuta.

⁵¹Samariya aɗi hara retar bikayeri tə gə hara wa. Ga ku hara sur cika hangta arɗa, ka vu har tə maɗama' nga na maɗankwi ndzi apa mji na kula biku adzə nga, kamnyar shanga sur cika tə gə hara ni.

⁵²Antə ar nga, tar ka gə nggitə sur səli ar nga! Kamnyar tə bikər ngə ni ku hara ɗimi kamta ta na ar maɗama' nga na maɗankwi ni, har tə da ku ndzi kəcəkəcari ta ga. Apani tar ka gə ləkwa səli, antə tar ka gə nggitə sur səli ar ngə ni. Kamnyar ga hara tə maɗama' nga na maɗankwi ni ndzi apa kəcəkəcari.’ ”

⁵³Hyel pəla, “‘I ata jaktə thlentə darajar Sodom ka maɗa'ni na maɗankwi, kəi jaktə thlentə darajar Samariya ka maɗa'ni na maɗankwi. Tsuwa I ata jaktə thlentə darajar nga, gə na Urushalima akwa nca ɗa,

⁵⁴kamnyar ka gə nggatə səliyir kər nga, ka səliyir nga təri kamnyar shanga suayeri tə gə hara ni. Antə səliyir nga na təri ni ata vətə ɗəffu aka maɗama'ngə ni, təng bikər ɗa aɗi mwanta ar ngə ni wa.

⁵⁵Ar maɗama'ngə na maɗankwi ni, watau Sodom ka maɗa'ni na maɗankwi, da ata ngka akwa darajar ɗa na hwatu. Tsuwa Samariya ka maɗa'ni na maɗankwi ata jaktə ngka akwa darajar ɗa na hwatu. Antə wala gə kəga maɗa' nga na maɗankwi ata jaktə ngka akwa darajar nga na hwatu.

⁵⁶Aɗi Sodom na ngkwarma'nga an ndzi sur kyartəkur akwa mnya ga akwa sakatə ga akwa nca kər olkur,

⁵⁷akəmata vəi ɗimikurər nga aləɓəla ata bəbal ni wa ya? Kulini ga ku ndzi tsu apa tsa, sur nggəla aka maɗa' Siriya na maɗankwi ka shanga mji na kalaktə ni, ka aka maɗa' Filistiya na maɗankwi, mji na kalaktə nga ka rutəmta ngə ni.

⁵⁸Antə dwali ka gə nggahə bwani ar watsəɓər hilhilkur ka shanga sur cika tə gə hara ni. I na MTHLAKU an pəla.’ ”

⁵⁹“‘Ngəni an su tə I na MTHLAKU na ka Duna ta Shang akwa pəlari, abbər, I ata hara ka ga kalkal ka su tə ga ku hara, gə na ku rutəmta kahyel tə gə hara, ka ɓəli alkawal tə gə kəta.

⁶⁰Amma wala apani I ata ɗangtə alkawal tə I hara ka ga akwa sakar dakwikurər nga, kəi mbwi alkawal ka gə na ata ndzi har ba saka madi.

⁶¹Antə ga ata sə ɗangtə su tə gə hara, ka nggatə səliyari, akwa sakatə I ku fatə ngkwarma'nga na ola ka ntsaha, ka hamta ɗa ka da ndzi maɗa' nga na maɗankwi, wala tə I aɗi kətə alkawalər hara ngəni ala gə wa.

⁶²Apani antə I ata jaktə mbwi alkawalərna ka ga, antə ga ata sənda abbər I an MTHLAKU,

⁶³kamnyar ka gə ɗangtə ɗimikur tə gə hara ni, ka gə nggatə səliyari, tə ga amzhi ndər wa, kamnyar səliyir nga na ku təri, sakatə I ku yafitə nga ata kəra shanga su tə gə hara ni. I na MTHLAKU na ka Duna ta Shang an pəla.’ ”