Read bura-pabir Ezekiyel 17 Bible Online

Ezekiyel 17 - bura-pabir bible

Ezekiyel 17

¹Antə MTHLAKU ku gari ali ka pəla,

²“Ɓzər mda, tsa karapu akwa makumdla aka mjir Israila,

³ka gə pəla, ‘I na MTHLAKU na ka Duna ta Shang akwa pəlari ala ɗa abbər duku laga aɗi ka ɓəɓəkayerari ol'ola ka shishirni saɓəl saɓəl ka kalarni zumzum ɓɗaku. Antə tsa fəla ka mwari ahar Lebanon, ka kəli kəra nfur seda laga.

⁴Tsa nthləi kəra tsiyari na amta ta shang, ka mwanta akwa tsəɗi fəli ka vəi akwa bərniyir mjir fəli.

⁵Antə tsa kətə hwulfa laga akwa tsəɗi Israila, ka thləkamta akwa həi laga na ɓɗaku. Tsa thləkamta ni ata mnya yimi na ola, tsu apatə mda ana ncimta nfwa ata vəi tə tsa ata kəl taktar.

⁶Antə hwulfə ni ku ptsa, ka ndzi nfur anap na pəbəlidzi apa ka tsa tsəkwar di. Antə tsiyayerari ku kəla ka ndərardzi təbwar duku ni, amma nggilangari ku ləghəi zurang akwa di. Apani antə tsa ku ndzi nfur anap, ka hara tsi hang, ka thlali hang tsuwa.

⁷“Amma duku laga aɗi damwa na ola ka ɓəɓəkayerari ol'ola, ka shishirni hang. Antə nfur anap ngəni ku shinar nggilangayerari kəga tsiyayerari təbwar ni, kamnyar ka tsa hamta alari yimi ata vəya di tə mdə thləka ni ata.

⁸Tsa hara apani, wala tə mdə ku thləkamta ni ata həi na ɓɗaku ata mnya yimi na ola, kamnyar ka tsa hara tsi ka ya hang, ka tsa ndzi anap na jirari.

⁹Antə ka gə pəla aka mir Israila, ‘I na MTHLAKU na ka Duna ta Shang pəla abbər nfur anap ngəni ata mbə ya? Duku na ntangkəma ni aɗi ata ntsuɓəla nggilangayerari ni, ka tsa ɓumta yari ni, kamnyar ka shanga thlaliyayerari na haɗa ɗəɗa ni tətəɓu ka ula wa ya? Tsuwa aɗi ata tur duna wa, wala mji hang kamnyar ka da ntsumta nggilangayerari ni wa.

¹⁰Amma wala ma mda an ncimta ni, tsa ata mbə ya? Tsa aɗi ata tətəɓwa ma sakatə shambar raghəi tsa ni wa ya? Jiri, tsa ata tətəɓwa akwa vəi tə mdə nci ni ata ni.’ ”

¹¹Antə MTHLAKU pəla ali abbər,

¹²“Pəla aka mjir haptə hangkal ni abbər, ‘Giri aɗi səndə karapur suayeri ngəni wa ya? Pəla ala ɗa abbər nggədza kuthlir Babila ku si akwa Urushalima ka kətə kuthli ka kwakunayeri arni, ka mwantə ɗa ahar Babila.

¹³Tsa kətə mdə pal akwa nyarmbwar kuthlikur, ka mbwi alkawal ka tsa, ka kahyel abbər tsa ata ndzi ka jirkur alari. Antə kuthlir Babila ni ku fatə mji ol'olər tsəɗi ni,

¹⁴kamnyar ka mdə kəli səliyir kuthlikur ni, ta kuthlikur ni asə jaktə thlata. Antə tar atar kəsi alkawal ni daci antə kuthlikur ni ata sə jaktə thlata.

¹⁵Amma kuthlir Yahuda ku hara kər ɓəɓalkur ka thlentə wakilayeri ahar Masar kamnyar ka mdə na alari takwayeri ka sojayeri hang. Amma tsa ata mzhi səm ya? Mdə na ku hara jili su apani ata mzhi msər ya? Tsa ata mzhi ɓəli alkawal ni, ka msər ya?’ ”

¹⁶“ ‘Jiri, I na MTHLAKU na ka Duna ta Shang akwa kahyel abbər apatə I aɗi, jiri kuthli ngəni ata mta ahar Babila, kamnyar tə tsa ku gyal ka kahyel tə tsa hara, ka ɓəli alkawalərni tə tsa hara aka kuthli na vətə ni ata kuthlikur.

¹⁷Wala kuthlir Masar ka sojayeri arni na ka duna, ka mjirni na dlama dlama ma, da amzhi dlar ni akwa mpa, ma sakatə mjir Babila ku həntə bagaɗi kamnyar mpa, ka thlegantə sur ndlə katanggar bərni kamnyar kurəmta mji hang wa.

¹⁸Kamnyar tə kuthlir Yahuda ku gyal ka kahyel tə tsa hara, ka ɓəli alkawal. Tsa an mbwi alkawal ni ka tsiyari, amma tsu tsa an jaktə hara su nayeri ni. Antə apani tsa aɗi ata msər wa.’ ”

¹⁹“ ‘Kamnyar ngəni, I na MTHLAKU na ka Duna ta Shang akwa kahyel ka pəla, apatə I aɗi, I ata ɗi ni kamnyar tsa ku rutəmta kahyelərna, ka ɓəli alkawalərna.

²⁰I ata pungkər banggamarna ata kərari, kəi kətə ni ata dərkurna. Antə I ata mwantə ni ahar Babila, anda antə I ata hara alari shariya, kamnyar kula jirkur tə tsa hara ali ni.

²¹Antə shanga sojayeri arni na carcarari mda ata kurəmta ɗa akwa mpa. Antə mji na mbili mda ata titiləmta ɗa akwa kəlara bwa. Apani antə giri ata sənda abbər I na MTHLAKU an gari ni.’ ”

²²“ ‘I na MTHLAKU na ka Duna ta Shang, vir laga I ka kəri an ata nthləi tsiya nfur seda na haɗa thləla na nal ta shang, kəi ncimta ni. I ata ɓəli pal akwa nca tsiyayerari na ngyingyaɓu na nal ta shang, kəi ncimta ni ata kər gar na nal.

²³Ata gar na nal ta shang akwa Israila antə I ata ncimta ni, kamnyar ka tsa hara tsi hang, ka ya, kamnyar ka tsa ndzi nfur seda na jirari. Antə ɗikayeri zumzum ata sə ndzi akirari, ka latə mbwar ɗa akwa shanggurər tsiyayerari.

²⁴Antə shanga nfwayeri na akwa mtaku ata sənda abbər I an MTHLAKU. I ana hara ka nfu na nal ndzi kwadang, ka na kwadangari ndzi nal, I ana hara ka nfu na miraku ulantədzi, ka na ul'ulari ɗəɗa. I na MTHLAKU an pəla, antə I ata hara su tə I ku pəla.’ ”