Read bura-pabir Ezekiyel 18 Bible Online

Ezekiyel 18 - bura-pabir bible

Ezekiyel 18

¹Antə MTHLAKU ku jaktə gari ali abbər,

²“Man nufi karapu ngəni tə mji akwa pəlari akwa tsəɗi Israila nə ri? Tə da akwa pəla, ‘Mjir ya ku ɓɗə yar nfu na mumwasu, amma maɗa' ɗa antə thlira ɗa fəidzi’ ni

³I na MTHLAKU na ka Duna ta Shang akwa pəla abbər apatə I aɗi, mda aɗi ata jaktə kəthlər ka karapu ngəni akwa Israila wa.

⁴Nggədza ma shang mpika shanga mji an arna. Mpika mdər ya japu ka mpika ɓzər, an arna. Mdə na ku hara biku, tsa an ata mta.”

⁵“Ma mdə na ka jirkur, tsuwa tsa ana hara su na kalkal,

⁶ma tsa aɗi səm susəma akwa vəi vəngkər səli aka haptu na ata kəra ga wa, wala haptə ncari aka haptər mjir Israila wa, wala hara adiyakur ka mwalar ntəwulərni wa, wala bara mwala akwa sakar kəcirni wa,

⁷wala hara bwani aka mdə wa. Amma tsa ana ngka aka mdə na dlu təmbəl akəlari su tə mdə ni vəi adzə ni kamnyar dlu təmbəl. Tsuwa tsa aɗi ana həl wa, amma tsa ana ndlantə mji na ka mi, ka hamta ləptu aka mji na dura.

⁸Tsa aɗi ana hamta təpa ka bara riɓa ata kər wa, wala bara jaka ata kər wa. Tsa ana kəɓəla tsiyari akwa kəlara su na ɗimi, ka hara shariya ar jirkur akwa daɓwa mdə ka nvwa ni.

⁹Tsa ana nu tsawayeri arna, ka ɓəlatə shanga suayeri tə I thlamta abbər ka mdə hara. Jiri, tsa mdə na ka jirkur, antə tsa ata ndzi ka mpika. I na MTHLAKU na ka Duna ta Shang an pəla.”

¹⁰“Amma ma mdə ngəni ku yaɓəla ɓzər sal na ana thla laku, ka tsi mda, wala mdər hara pal akwa nca suayeri ngəni,

¹¹wala tə babani aɗi ɗar pal akwa nca ɗa wa, ɓzər ni ata mta. Ɓzər ni ana səm susəma akwa vəi vəngkər səli aka haptu na ata garayeri, tsuwa tsa ana hara adiyakur ka mwalar ntəwulərni.

¹²Tsa ana zambatə mjir bwani, ka mjir tursu, ka thla laku, ka ngkatə su tə mdə vəi adzə ni kamnyar bara təpa. Tsa ana vəngkər səli aka haptayeri, ka hara shanga sur cika.

¹³Antə tsa ana hamta təpa kamnyar bara riɓa ata kər, ka bara jaka ata kər. Kaha, jili mda apani ata mzhi ndzi ka mpika ya? Awa, tsa aɗi ata ndzi ka mpikə wa. Təng tə tsa ku hara shanga sur cika nayeri ni, to jiri, tsa ata mta. Antə watsəɓər bikər mtərni ata ndzi ata kərari.”

¹⁴“Amma ma ɓzər ngəni ku yaɓəla ɓzər na ku wutə shanga bikayeri tə baba'ni hara ni, ka thlivəra, amma tsa aɗi hara jili suayeri ngəni wa,

¹⁵wala səm susəma akwa vəi vəngkər səli aka haptu ata kəra garayeri wa, wala vəngkər səli aka haptayeri ar mjir Israila wa, wala hara adiyakur ka mwalar ntəwulərni wa,

¹⁶wala ɓzamtə su aka mdə wa, wala dlu sur mdər bara təpa akəlari ka vəi wa, wala thla laku wa, amma tsa ana hamta susəma aka mji na ka mi, ka hamta ləptayeri aka mji na dura,

¹⁷ka kəɓəla tsiyari akwa kəlara su na ɗimi, ka nggəlar dlu riɓa wala jaka ata kəra təpa tə tsa hamta, ka ɓəla tsawayeri arna kəga suayeri natə I thlamta abbər ka mdə hara, to tsa aɗi ata mtə kamnyar bikər baba'ni wa, amma jiri, tsa ata ndzi ka mpika.

¹⁸Amma ar baba'ni, kamnyar tə tsa ku zambatə mji, ka thla ɓzərma'ni, ka hara su na aɗi kalkal wa aka mjirni, to, tsa ata mtə kamnyar bikərni.”

¹⁹“Amma wala apani giri akwa pəla, ‘Kamnyar mi tə ɓzərni aɗi ata ɗar bwani kamnyar bikər baba'ni wa ri?’ Kamnyar kəlara sakatə ɓzər ku hara jirkur ka su na kalkal, ka ɓəlatə shanga suayeri tə I thlamta abbər ka mdə hara, to jiri, tsa ata ndzi ka mpika.

²⁰Mdə na ku hara biku, tsa an ata mta. Ɓzər ni aɗi ata ɗar bwani kamnyar bikər baba'ni wa, wala baba kamnyar bikər ɓzərni wa. Ɓɗakkur tə mdə na pwa ku hara ata ndzi tsu ata kərari surni, antə ɗimikur tə mdə na kəmanggar ku hara ata ndzi tsu ata kərari surni.”

²¹“Amma ma mdə na kəmanggar ku zhar hara shanga bikayeri arni tə tsa hara, ka ɓəlatə shanga suayeri tə I thlamta abbər ka mdə hara, ka hara su tə tsawa ku bara, ka hara su na kalkal, to, jiri, tsa ata ndzi ka mpika, tsa aɗi ata mtə wa.

²²Mda aɗi ata jaktə ɗangtə bikayeri arni tə tsa hara ni wala duku kəra wa. Tsa ata ndzi ka mpika kamnyar tsa ku hara su na kalkal.

²³I ana nggatə msərakurər mtər mdər biku ya? I na MTHLAKU na ka Duna ta Shang akwa pəla, ai I ana bara abbər ka tsa zhar surhararni na ɗimi, ka tsa ndzi ka mpika.

²⁴Amma ma mdə na ana hara su kalkal ku zhar surhararni na kalkal ni, ka ləkwa hara biku, akwa hara shanga sur cika tə mdə na kəmanggar ni akwa harari, tamatər giri tsa ata ndzi ka mpika ya? Ai mda aɗi ata ɗangtə kəthlərayeri tə tsa hara ɓɗakɓɗaku ni wala duku wa. Kamnyar ndzi kula jirkur tə tsa hara ka bikayeri tə tsa hara, tsa ata mta.”

²⁵“Amma wala apani giri akwa pəla, ‘Laku tə MTHLAKU ana hara su akwa ni aɗi kalkal wa.’ Antə kulini psi giri thləma giri, giri na mjir Israila, laku tə I ana hara su akwa aɗi kalkal wa ya? Aɗi lakur giri wa ya an kalkal wa ni?

²⁶Ma mdə na ana hara su kalkal ku zhar suayeri tə tsa ana hara kalkal, ka ləkwa biku, tsa ata mta. Jiri, tsa ata mta kamnyar biku tə tsa hara ni.

²⁷Tsuwa, ma mdə na kəmanggar ku zhar kəmanggarkurərni tə tsa akwa hara ni, ka hara su tə tsawa thlamta, akwa hara su na kalkal, to, tsa ata mbantə mpikari.

²⁸Kamnyar ma tsa ku nggaɓəla vəi sharni, ka zhar hara shanga bikayeri tə tsa ana hara, to, tsa ata ndzi ka mpika, tsa aɗi ata mtə wa.

²⁹Amma wala apani mjir Israila akwa pəla, ‘Laku tə MTHLAKU ana hara su akwa ni aɗi kalkal wa.’ Aiyi, mjir Israila, laku tə I ana hara su akwa aɗi ɓɗaku wa? Aɗi lakur giri wa ya an ɓɗaku wa ni?”

³⁰“Antə apani, I ata hara ala giri shariya, giri na mjir Israila, kəi ɗi kəlara mdə kalkal ka su tə tsa hara, ndə I na MTHLAKU na ka Duna ta Shang. Antə tubi giri, ka giri zhar hara shanga sur hara shanga bikayeri ar giri, bikər giri ni asə ndzi ala giri sur tsamta səl.

³¹Pumta gir shanga ɗimikur tə giri ana hara ali, ka giri dlu ɗəffu na bilənari, ka mambəl na bilənari! Kamnyar mi tə giri ata bara mtə ri, mjir Israila?

³²Kamnyar I aɗi ana nggatə msərakur mtər wama wa, ndə I na MTHLAKU na ka Duna ta Shang. Antə ngka giri adzə ra, ka giri ndzi ka mpika.”