Read bura-pabir Ezekiyel 20 Bible Online

Ezekiyel 20 - bura-pabir bible

Ezekiyel 20

¹Akwa vir na kumkur ar thliya na ntəfkur akwa məva na murfəkur tə yeru akwa mafakur, antə bwadukwa mji ol'olər Israila ku si adzə ra kamnyar ka da nggaɓəla su na akwa ɗəffa MTHLAKU. Antə da ku ndzəndzi akəmi.

²Antə MTHLAKU ku gari ali ka pəla,

³“Ɓzər mda, gari aka mji ol'olər Israila, ka gə pəla ala ɗa, ‘I na MTHLAKU na ka Duna ta Shang akwa pəla, giri si ni kamnyar nggaɓəla su akəli ya? Apatə I aɗi, I aɗi ata zhar giri ka giri yu su ata kəri wa. I na MTHLAKU na ka Duna ta Shang an pəla.’ ”

⁴“ ‘Ar nga hara ala ɗa shariya, ɓzər mda! Hara ala ɗa shariya. Ka gə psəmnya ala ɗa shanga sur cika tə kəkayeri arɗa ku hara.

⁵Pəla ala ɗa abbər vir tə I na MTHLAKU na ka Duna ta Shang, carɓəla Israila ni, I ku haptə tsi ka kahyel aka mjir nyarmbwar Yakub, abbər “I an MTHLAKU na Hyelər giri.” Tsuwa I ku ncantə kərna ala ɗa akwa tsəɗi Masar.

⁶Tsu vir nda antə I kahyel abbər I ata fwaɓəla ɗa akwa tsəɗi Masar, kəi mwantə ɗa akwa tsəɗi tə I pakɓəla ala ɗa, tsəɗi na ɓɗaku, na ata ya su, tsəɗi na təramta shanga tsəɗiyayeri ka daraja.

⁷I pəla ala ɗa, “Ka waskəi akwa nca giri pumta shanga sur cika na ɓɗaku aka ncari ni, shanga giri. Tsuwa giri aɗiya diɓərantə kər giri ka haptayeri ar mjir Masar wa. Kamnyar I an MTHLAKU na Hyelər giri.”

⁸Amma da ku nggəlar ndərərna, ka nggəlta psi thləm ali. Da aɗi pumta sur cika na ɓɗaku aka nca ɗa ni wa, wala fwari ata kəra haptayeri ar Masar ni wa.’ ” Antə I dzama abbər I ata pumta ɗəffə bwarbwarkur arna ata kəra ɗa, kəi pumta shanga ɗəffi na ɓzə ni ata kəra ɗa təng tə da tsu akwa tsəɗi Masar.

⁹Amma I aɗi hara kəra wa kamnyar ata sə hilantə thləmi. Kamnyar I aɗi hir ka thləmi hila akwa nca mji tə da akwa nca ɗa ni wa. Kamnyar ata nca mji ndaga, antə I ncantə kərna ala ɗa, sakatə I akwa fwaɓəla mjirna akwa tsəɗi Masar.

¹⁰“ ‘Antə I fwaɓəla ɗa akwa tsəɗi Masar, ka mwantə ɗa akwa mtaku.

¹¹I ku hamta ala ɗa tsawayeri arna ka ncanta ala ɗa suayeri tə I thlamta abbər ka mdə hara, natə ma da ku ɓəlatə da ata ndzi ka mpika.

¹²Tsuwa I ku hamta ala ɗa Vir Ghərəmtaghəra na ar sati, kamnyar ka tsa ndzi seɗa akwa daɓwa iya ka da, kamnyar ka da sənda abbər I an MTHLAKU na namtə ɗa ɓɗakkarkara.

¹³Amma wala apani mjir Israila ku nggəlar ndərərna akwa mtaku. Da aɗi nu tsawayeri arna wa, da nggəlar nu suayeri tə I thlamta abbər ka mdə hara, suayeri natə ma da ku ɓəlatə da ata ndzi ka mpika. Tsuwa da ku hilantə Vir Ghərəmtaghəra arna ɗimi ɗimi.’ ” Antə I dzama abbər I ata pumta bwarbwarkur ɗəffi ni ata kəra ɗa akwa mtaku, kəi kuri ka da shang ata kəma duku.

¹⁴Amma I aɗi hara kəra wa kamnyar ta asə hilantə thləmi. Kamnyar I aɗi hir ka thləmi hila akwa nca mji tə da akwa nca ɗa ni wa, mji tə I fwaɓəla mjirna ata nca ɗa ni.

¹⁵Tsuwa I ku kahyel ala ɗa akwa mtaku ni abbər I aɗi ata mwantə ɗa akwa tsəɗi tə I hamta ala ɗa ni wa, tsəɗi na ɓɗaku, na ata ya su, tsəɗi na təramta shanga tsəɗiyayeri ka daraja.

¹⁶I hara apani ni kamnyar tə da ku nggəlar tsawayeri arna ka nggəlar hara suayeri tə I thlamta abbər ka mdə hara, ka hilantə Vir Ghərəmtaghəra natə I an vəi, kamnyar tə ɗəffa ɗa ku nutə haptayeri arɗa.

¹⁷Amma wala apani, I ku wul ɗa ka ncar kətadza, antə I aɗi kurəmta ɗa wa, wala kuri ka da ata kəma duku akwa mtaku ni wa.

¹⁸“ ‘Ata vəyari, I pəla aka maɗankyarər ɗa akwa mtaku ni abbər, “Giri aɗiya hara suayeri tə kəkayeri ar giri thlamta abbər ka giri hara wa, wala ɓəlatə tsawayeri na arɗa wa, wala hilantə kər giri ka haptayeri arɗa wa.

¹⁹I an MTHLAKU na Hyelər giri. Antə hara giri suayeri tə I thlamta abbər ka mdə hara, ka giri vədzə hangkala giri, ka ɓəlatə tsawayeri arna.

²⁰Tsuwa ka giri namtə Vir Ghərəmtaghəra natə I an vəi ka tsa ndzi ɓɗakkarkara, ka tsa ndzi seɗa akwa daɓwa iya ka giri, kamnyar ka giri sənda abbər I an MTHLAKU na Hyelər giri.

²¹Amma maɗa' ɗa ku nggəlar ndərərna. Da aɗi nu suayeri tə I thlamta abbər ka mdə hara ni wa, wala vədzə hangkala ɗa ka ɓəlatə tsawayeri arna wa, tsawayeri natə ma da an ɓəlata, da ata ndzi ka mpika. Da hilantə Vir Ghərəmtaghəra natə I an vəi.” ’ ” “ ‘Antə I dzama abbər I ata pumta bwarbwarkur ɗəffi ni ata kəra ɗa, kəi kuri pumta ɗəffi na ɓzə ni ata kəra ɗa akwa mtaku ni.

²²Amma I ku ngkatsi, ka hara su na ata kəsi darajar thləmi. Kamnyar I aɗi hir ka thləmi hila akwa nca mji tə da akwa nca ɗa ni wa, mji tə I fwaɓəla mjirna ata nca ɗa ni.

²³Amma wala apani I ku kahyel ala ɗa akwa mtaku ni abbər I ata titiləmta ɗa akwa nca mji, ka da ndəkəmtadzi akwa tsəɗiyayeri,

²⁴kamnyar tə da aɗi ɓəlatə tsawayeri arna wa, amma da nggəlar nu su tə I thlamta ala ɗa abbər ka da hara, ka hilantə Vir Ghərəmtaghəra natə I an vəi, tsuwa ka hangkala ɗa ku nutə haptayeri ar kəkayeri arɗa.’ ”

²⁵“Tsuwa ata kəra ngəni ma I ku hamta ala ɗa tsawayeri na aɗi ɓɗaku wa, ka na amzhi hamta ala ɗa mpikə wa.

²⁶I ku zhar ɗa ka da ɓzamtə kərɗa atar hamta saɗaka ka shanga maɗashilər ɗa na yarakəma akwa u'u, kamnyar kəi ndəndatə hangkala ɗa. I hara ngəni kamnyar ka da sənda abbər I an MTHLAKU.”

²⁷“Antə apani, gə na ɓzər mda, ka gə gari aka mjir Israila, ka gə pəla ala ɗa su tə I na MTHLAKU na ka Duna ta Shang akwa pəlari, abbər har ba kulini ma kəkayeri ar giri ku ɓzamtə ɗəffi atar ndzi kula jirkur ali.

²⁸Kamnyar sakatə I səntə ɗa akwa tsəɗi tə I kahyel abbər I ata hamta ala ɗa ni, təng kəlara vəi tə da wutə gar na nal, wala nfu na ka thlali, da ata hamta saɗakayeri arɗa. Apani antə da ku thlentə hangkali atar saɗakar ɗa ni. Anda antə da hamta saɗakar ɗa na ar sur shiwura na msəra ka na ar sur sa.

²⁹Antə I pəla ala ɗa, ‘Man vəi na amta tə giri ləmta akwa nə ri?’ Antə mdə ku ləkəma ka kəga thləma vəi ni abbər Vəi na Amta har ba ashina.”

³⁰“Antə ka ra pəla aka mjir Israila su tə I na MTHLAKU na ka Duna ta Shang akwa pəlari, abbər giri ata hilantə kər giri tsu apatə kəkayeri ar giri ku hara, ka shamta kər giri akwa nu suayeri arɗa na sur cika ni ya?

³¹Kamnyar har ba ashina giri ana hamta cautayeri ar giri, ka hara saɗaka ka maɗashilər giri tə da təramta akwa u'u. Antə apani giri akwa diɓərantə kər giri ka shanga haptayeri ni ba ashina. Antə wutər giri, giri ata bara sauri akəli ya, mjir Israila? Apatə I na MTHLAKU na ka Duna ta Shang aɗi, I aɗi ata zhar ka giri yu sauri akəli wa!”

³²“Dzam na akwa kəra giri abbər giri akwa bara ndzi apa mji damwa, apa durayeri na akwa tsəɗiyayeri na ana vəngkər səli aka udzəm ka pela ni, aɗi ata hara wa.”

³³“ ‘I na MTHLAKU na ka Duna ta Shang akwa pəla abbər jiri apatə I aɗi, I ata hara kuthlikur ata kəra giri ka duna swaiswai, ka ɗəffu, ka kuthlikur laga na ata ndatə mda.

³⁴Ka duna ka ɗəffu antə I ata fwaɓəla giri akwa nca mji, I ata fwaɓəla giri akwa tsəɗiyayeri tə I titiləmta giri akwa ni, kəi tsaptə giri ata kəma duku.

³⁵I ata mwantə giri akwa mtaku na ar mji, anda antə I ata kəɓa ka giri nca ka nca, kəi hara ala giri shariya.

³⁶Tsu apatə I ku hara shariya aka kəkayeri ar giri akwa mtakər tsəɗi Masar, antə I ata hara shariya ala giri tsuwa. I na MTHLAKU na ka Duna ta Shang an pəla.

³⁷I ata vu giri ka giri təramta akira zwal, kəi səntə giri akwa alkawal tə mburu an mbwi.

³⁸I ata fwaɓəla mjir thlentə hangkal na akwa nca giri ni, ka mjir hara biku dzakdzakku ali. I ata fwaɓəla ɗa akwa tsəɗi tə da ka ndzi akwa kulini, amma da aɗi ata ləkwa tsəɗi Israila wa. Antə giri ata sənda abbər I an MTHLAKU.’ ”

³⁹“ ‘Amma ar giri, giri na mjir Israila, I na MTHLAKU na ka Duna ta Shang akwa pəla, mwar giri, ka waskəi ra vəngkər səli aka haptərni, baɗitə kulini har ka ləkəma, ma ku ndzi giri aɗi psi thləm ali wa. Amma giri aɗiya jaktə hilantə thləmi na ɓɗakkarkara ni ka cautayeri ar giri ka tsuwa nu haptayeri ni wa.’ ”

⁴⁰“ ‘Kamnyar I na MTHLAKU na ka Duna ta Shang akwa pəla, ata kəra Garərna na Ɓɗakkarkara ni shini antə giri ata vəngkər səli ali. Anda ata kəra gar na nal ta shang akwa Israila ni, antə shanga mjir Israila ata vəngkər səli ali, shanga ɗa na akwa tsəɗi ni. Anda antə I ata dlu ɗa, tsuwa anda antə I ata bara ka giri hamta ali saɗakayeri ar giri, ka cautayeri ar giri na ɓɗakta shang, ka shanga sur hamta ar giri na ɓɗakkarkara.

⁴¹Ma sakatə I ku fwaɓəla giri akwa nca mji, sakatə I ku fwaɓəla giri akwa tsəɗiyayeri tə I titiləmta giri akwa, ka tsaptə giri ata kəma duku, antə I ata nggatə msərakurər giri apa saɗakar sur shiwura na msəra. Antə I ata ncantə vəi ɓɗakkarkarkurərna akwa nca giri ata nca mji.

⁴²Antə giri ata sə nggaɓəla abbər I an MTHLAKU, ma sakatə I ku ngka ka giri akwa tsəɗi Israila, tsəɗi tə I kahyel abbər I ata hamtari aka kəkayeri ar giri.

⁴³Antə anda giri ata sə ɗangtə suayeri tə giri hara, ka shanga sur cika tə giri hara ka hilantə kər giri ni. Antə giri ata cikə kər giri kamnyar shanga ɗimikur tə giri ku hara.

⁴⁴Antə giri na mjir Israila ata sə sənda abbər I an MTHLAKU, ma sakatə I ku hara ala giri apani kamnyar nar səli aka thləmi. Kamnyar I aɗi ata ɗi giri kalkal ka surharar giri na ɗimi ɗimi ni wa, wala hilhilkur tə giri hara ni wa. I na MTHLAKU na ka Duna ta Shang an pəla.’ ”

⁴⁵Antə MTHLAKU ku gari ali ka pəla,

⁴⁶“Ɓzər mda, thlentə kəma ga təbwar anəm, ka gə hara naɓikur ata kəra bwar anəm ni. Ka gə hara naɓikur ata kəra tsəɗiyir kuɓər nfwa na akwa anəm.

⁴⁷Pəla aka kuɓər nfwa na akwa anəm abbər, ‘Nggatə su tə MTHLAKU akwa pəlari. I na MTHLAKU na ka duna ta Shang akwa pəla, I ata hatə u'u ata ga. Antə u'u ni ata mbamta shanga nfwayeri na akwa ga, na miraku ka na ul'ulari. Antə sur mzhi tsi u'u ni aɗi wa. Antə tsa ata mbamta shanga su na aɗi, na thlata akwa anəm har ka mwanta abwar yala.

⁴⁸Tsuwa shanga mji ata wutari abbər I na MTHLAKU an ha u'u ni, antə mda aɗi na ata tsiyari wa.’ ”

⁴⁹Antə I pəla, “Aiyi, MTHLAKU na ka Duna ta Shang! Da akwa gari ata kəri ar rutə abbər, ‘Ai tsa hir mnya akwa karapu!’ ”