Read bura-pabir Ezekiyel 21 Bible Online

Ezekiyel 21 - bura-pabir bible

Ezekiyel 21

¹Antə MTHLAKU ku gari ka iya abbər,

²“Ɓzər mda, thlentə kəma ga təbwar Urushalima, ka gə hara naɓikur ata kəra vəyayeri tə da ana vəngkər səli ata. Ka gə hara naɓikur ar tsaktə tsəɗi Israila.

³Ka gə pəla aka tsəɗi Israila abbər, ‘I na MTHLAKU akwa pəla, I ku nggəlar giri, antə I ata ntsuɓəla katsakarərna akwa kəyari, kəi kurəmta giri, mji na ɓɗaku ka mji na ɗimi.

⁴Tə ku ndzi I ata kurəmta mji na ɓɗaku kəga mji a ɗimi na akwa nca giri ni, katsakarərna ata ləɓəla kazhar kəyari, ka tsa pwa aka shanga mji, baɗita akwa bwar anəm har ka mwanta abwar yala.

⁵Antə shanga mji ata sənda abbər, I na MTHLAKU, an ntsuɓəla katsakarərna akwa kəyari, antə I aɗi ata ngka kəgari akwa kəyari kəra wa.’

⁶Antə, Ɓzər mda, tuwa, kara nggyinggya ata nca ɗa, ka ɗəffə ɓzəɓza, apa ka gə thləvamtadzi.

⁷Ma da ku yu nga abbər, ‘Kamnyar mi tə ga akwa tuwa nə ri?’ Ka gə pəla ala ɗa abbər, ‘Kamnyar labar na akwa si ni. Ma sakatə tsa ku si, hyala waskəi ata nthləi ni, tsuwa shanga mji dza ɗa ata mta, kəlara mda ata thləvamtadzi, tsuwa ɓunja waskəi ata hara mtathlaku apa yimi.’ Nggədza su ni akwa si, antə su ni ata hara. I na MTHLAKU na ka Duna ta Shang an pəla.”

⁸Antə MTHLAKU gari ali ka pəla,

⁹“Ɓzər mda, hara naɓikur kara pəla su tə I na MTHLAKU ata pəlari. Pəla, ‘Katsakar, katsakar tə mdə tsələmta ka fwavi,

¹⁰mdə tsələmta ni kamnyar ka ta tsi mda, ka fwavi ni kamnyar ka tsa mbəlmbəla apa wurka. Mburu amzhi hara kucali kəra ya? Ɓzərna, ga ku rutəmta zwal, ka shanga su tə mdə nam ka udzəm.

¹¹Mdə hamta katsakar ni kamnyar ka mdə fwavumta, kamnyar ka mdə kəsi ni akwa tsiya mda. Mdə tsələmta ni ka fwavumta katsakar ni kamnyar ka mdə hamta ni akwa tsiya mdər tsər mda.’ ”

¹²“Ɓzər mda, tuwa ka gə jaɓtuwa, kamnyar mdə ɗəmhə katsakar ngəni kamnyar mjirna, ka shanga mji ol'olər Israila. Mdə ku hamta ɗa aka katsakar da ka shanga mjirna. Ɓumta gir tsiya giri kamnyar su ku hili.”

¹³“Kamnyar jiri, ngkərtədzi ata si aka mjirna. Mdər mzhi ngkatari aɗi ya? I na MTHLAKU na ka Duna ta Shang an pəla.”

¹⁴Antə ar nga, gə na ɓzər mda, hara naɓikur, ka gə ɓu tsiya ga. Ka gə kədaɓtə katsakarər nga ka suɗa, har ma ka makər. Katsakar na kamnyar tsi mji, katsakar na ata kurəmta mji hang, tsuwa tsa ku kalaktə ɗa.

¹⁵Katsakar ni ata hara ka hyala ɗa nthlə ɗa, ka mji hang ndlagamtadzi akwa nyarfayeri arɗa. Kamnyar I ku ncigəmta katsakarayeri na ata mbəlmbəla akwa nyarfayeri ni. Mdə namtə kəlara katsakar ka tsa mbəlmbəla apa wurka, ka fwavumta ni kamnyar kurəmta mji.

¹⁶Tsa ata nthlə su təbwar mazəm ka matsəkar, akwa kəlara bwa tə mnyari ku shinardzi akwa.

¹⁷Tsuwa arna I ata ɓu tsi, antə ɗəffi na bwarbwar ni ata pwi. I na MTHLAKU an pəla.

¹⁸Antə MTHLAKU ku jaktə gari ali ka pəla,

¹⁹“Ɓzər mda, ngkəri laku suɗa na ata ndzi apa seɗar vəi tə katsakarər kuthlir Babila ni ata nuwari. Japwa ɗa suɗə ni ata thlata akwa tsəɗi duku. Ka gə vəi seɗa akwa kəlara matəngndla, seɗa na ata ncantə lakur ləkwa kuta bərni.

²⁰Ka gə ncantə laku pal natə katsakar ni ata nuwari kamnyar mwari ahar Rabba na ar mjir Ammon, ka palari tsuwa na ata mwari ahar Urushalima, bərni na akwa məciɓa, akwa tsəɗi Yahuda.

²¹Kamnyar kuthlir Babila ata thləthlata adzə seɗa na akwa matəngndlə ni, akwa vəi tə lakwayeri ndəkəmtadzi ni, ka tsa hara hakdzi kamnyar nggaɓəla laku tə ka tsa nuwa. Antə tsa ata kənggərantə afayeri, ka tsa yu sauri akəla haptayeri, ka tsa wul mira mwaɓi saɗaka tə tsa hamta ni.

²²Su na akwa tsi mazəmari ata ncantə Urushalima, ka laku tə tsa ata nci gangayeri kamnyar huzamta məciɓa ka mdə səm bərni ni ka mpa.Tsuwa su ni ata ncantə laku tə mda ata tsa ləlu ar ləkwa mpa kamnyar tsəgəi mji, ka laku tə mda ata səntə gangayeri ar huzamta məciɓə ni kamnyar huzamta nyarfayeri ar di ni, ka laku tə mda ata tsaptə həi kamnyar ndlə məciɓa ka ləvəi akwa ka mpa.

²³Amma akwa wutər mjir Urushalima, hakdzə ngəni an hakdzər thlandər, kamnyar tə da ku kurtə kahyel akwa alkawal tə da kəta aka kuthlir Babila. Amma su ngəni ata ɗangtə ala ɗa bikayeri arɗa, na ata vu har ka mdə sə fatə ɗa.”

²⁴“Ngəni an su tə I na MTHLAKU na ka Duna ta Shang akwa pəlari, abbər, ‘Jiri, giri ku hara ka mdə ɗangtə bikər giri, atar kəlar bikayeri ar giri, ka atar ncantə bikər giri akwa shanga suayeri tə giri ana hara. Antə təng tə giri ku hara tə I ku ɗangtə ɗa ni, to, ka tsi antə mda ata fatə giri apa mafa.

²⁵Antə ar nga, adiya ragai, kuthlir Israila na kəmanggar, virər nga ku si. Vir tə mda ata ɗi nga kamnyar bikər nga ku hara.

²⁶Antə I na MTHLAKU na ka Duna ta Shang akwa pəla, pəri sur barkərər nga, kara ntsui dzakwar kuthlikur ar nga! Kamnyar su aɗi ata ləkəma ka ndzi apani kəra wa. Mda ata haptə mji na aɗi suma wa, ka faghəi mji na ka kuthlikur!

²⁷Su ku hili! Su ku hili! I ata hara ka bərni ni ndzi su hilhila! Tsuwa su ngəni aɗi ata hara katagu wa, tar ma sakatə mdə na ka dunar shariya ni ku si, tsa antə I ata hamta alari.’ ”

²⁸“Antə ar nga, gə na ɓzər mda, hara naɓikur kara pəla, I na MTHLAKU na ka Duna ta Shang akwa pəlari ata kəra mjir Ammon, ka nggəl tə da hara aka mjirna ni. Pəla ala ɗa, “ ‘Katsakar, katsakar, mdə ku ntsuɓəla katsakar kamnyar ka tsa tsi mda! Mdə ku fwavumta ni kamnyar ka tsa səma, ka tsa mbəlmbəla apa wurka!

²⁹Shang kəga naɓikur thlandər tə mdə hara ata kəra giri, ka hakdzər thlandər tə mdə hara ata kəra giri, tsu mda ata vətə katsakar ata wulya mjir adiyakur ka kəmanggarayeri, kamnyar ar mji ngəni virər ɗa ku si, sakatə mda ata ɗi ɗa ku si.

³⁰Katsakar, ngka akwa kəya ga, Akwa vəi tə mdə alaktə nga, akwa tsəɗi tə mdə ya nga, anda antə I ata hara ala gə shariya.

³¹I ata pumta ɗəffi ata kəra ga, kəi mbatə u'ur ɗəffi na bwarbwar ni ata kəra ga. I ata hamta nga akwa tsiya mji na kula kətadza, mji na masəku akwa kurəmta mji.

³²Ga ata ndzi udzəmər mba u'u, mda ata pumta mamshir nga akwa tsəɗiyir nga, mda aɗi ata jaktə ɗangtə nga kəra wa, kamnyar I na MTHLAKU an pəla.’ ”