Read bura-pabir Ezekiyel 22 Bible Online

Ezekiyel 22 - bura-pabir bible

Ezekiyel 22

¹Antə MTHLAKU gari ali ka pəla,

²“Antə ar nga, gə na ɓzər mda, ka gə hara alari shariya. Ka gə hara shariya aka bərni na hir pumta mamshi ni. Ngkərɓəla alari ata bəbal shanga sur cika tə tsa ku hara.

³Pəla, I na MTHLAKU na ka Duna ta Shang akwa pəla, sha ku wutə nga, gə na bərni na hir kurəmta mjir nga ka kər nga! Antə su ngəni ku hara kamnyar ka sakar ɗi nga si taktar, gə na mdər nam haptayeri, kamnyar ga ku diɓərantə kər nga.

⁴Ga ku hara biku atar mji tə ga kurəmta, ka diɓərantə kər nga atar haptayeri tə gə namta. Antə apani ga ku shahə virər nga kudzəha, məvayeri tə mdə thlamta ala gə ku kuri. Antə apani I ku namtə nga sur nggəla aka mji, ka sur kumshi aka shanga tsəɗiyayeri.

⁵Antə mji na kudzəhə ka na ciju shang ata sə mnya ɗimi ata kəra ga, gə na bərni na ka thləm na ɗimi, ncir thlentə hangkal.”

⁶“Nggədza tsuwa, shanga mji ol'olər Israila na akwa ga, waskəi ka dunari, ku ndzangkir pumta mamshi.

⁷Akwa ga, mji ana rutə mjir ya. Tsuwa mda ana fəi mətəpi na akwa nca giri, ka hara bwani aka mwanki na kughung ka maɗa' na muta.

⁸Giri ku rutəmta suayeri arna na ɓɗakkarkara ka hilantə Vir Ghərəmtaghəra natə I an vəi.

⁹Mji laga aɗi akwa ga, na ana ngkər ndər ɗimi ata nvwa ɗa kamnyar ka mdə tsi ɗa. Tsuwa mji laga aɗi akwa ga, na ana səm susəma tə mdə ku hamta aka haptayeri ata kəra gar. Tsuwa mji laga aɗi akwa gə na ana hara adiyakur.

¹⁰Akwa ga, mji shili laga aɗi na ana pi ka mwalar baba' ɗa. Tsuwa tsu akwa ga antə mji shili laga ana pi ka mwanki ka dwalikurari, akwa sakar kəcir ɗa.

¹¹Mji laga ana hara adiyakur ka mwalar ntəwulər ɗa, mji laga tsuwa ana hara adiyakur ka mwalaɓzər ɗa, wala ngkwardar ɗa.

¹²Akwa ga, mji laga aɗi na ana dlu sur dzəɓ mnya kamnyar ka da tsi mda. Ga ana dlu riɓa ata kəra su tə gə təpata aka mda, ka bara jaka ata kər, ka hara gəna atar fəi ntəwulər nga. Tsuwa ga ku fwari ata kəri. I na MTHLAKU na ka Duna ta Shang an pəla.”

¹³“Antə apani, I ku ɓumta tsi ata kəra ga kamnyar riɓa tə gə wuta atar dlərpəkur ka pumta mamshi tə ga akwa harari ni.

¹⁴Nənga gə ka ɗəffər nggitari ri? Nənga ga tamata abbər ga ata wutə dunar mzhi haptə tsiya ga akwa vir tə I ata kəɓa ka gə ri? I na MTHLAKU an pəla ngəni, tsuwa I ata haratari.

¹⁵I ata titiləmta mjir nga akwa nca mji, kəi ɓucimta giri akwa tsəɗiyayeri, kəi kuri famta adiyakur na akwa gə ni.

¹⁶Antə thləmi ata sə hilantədzi akwa nca mji kamnyar surharar nga, antə ga ata sə sənda abbər I an MTHLAKU.”

¹⁷Antə MTHLAKU ku gari ali ka pəla,

¹⁸“Ɓzər mda, mjir Israila ku ndzi apa civəkəthla, na ana mbiləmta aghəla tə mdə ku mbaɓəla adzərfa. Shanga ɗa ku ndzi apa civəkəthla ar nggirkumi, ka kuza, ka liya mənggəl, ka dalma na ana mbila aghəla tə mdə ku fwaɓəla adzərfa ka zhar kəthla.

¹⁹Antə I na MTHLAKU na ka Duna ta Shang akwa pəla ala ɗa abbər, kamnyar tə shanga giri ku ndzi apa civəkəthla, kulini I ata tsaptə giri ata kəma duku akwa Urushalima.

²⁰Apatə mda ana tsapta adzərfa, ka əmza, ka liya mənggəl, ka dalma, ka kuza akwa vəikəthla, ka mdə mbatə u'u ata kəra ɗa kamnyar ka da juwamtadzi. Apani tsuwa antə I ata tsaptə giri ka ɗəffu akwa ɗəffə bwarbwarkur arna, kəi juwamta giri.

²¹I ata tsaptə giri, kəi mbangkər ala giri u'ur ɗəffi na bwarbwar ni, antə giri ata juwamtadzi akwa kutari.

²²Apatə mda ana juwamta adzərfa akwa kəthla antə giri ata juwamtadzi akwa kutari. Antə giri ata sənda abbər I na MTHLAKU an puɓəla bwarbwarkur ar ɗəffi ata kəra giri.”

²³Antə MTHLAKU ku jaktə gari ali ka damwa ka pəla,

²⁴“Ɓzər mda, pəla aka Israila abbər, ‘Ga an tsəɗi na aɗi kəcəkəcari wa, natə ma vir tə ɗəffi ku ɓzi, mda aɗi ata kəcimta nga ka yimərhyel wa.’

²⁵Naɓiyayeri na akwa kutari, na ana paktə mnya ata kəra mda, ku ndzi apa tsəngi na akwa tuwa ata kəra mwaɓi tə tsa ngkəi. Da ku kurəmta mji, ka famnya gənar ɗa shang kəga sur ɗa na ka daraja. Tsuwa da ku hara tə mwanki hang ku ndzi kughung.

²⁶Pristayeri arni ku ɓəli tsawurna, ka hilantə shanga surna na ɓɗakkarkara. Da aɗi ndəkɓəla zumzumkur na akwa daɓwa su na ɓɗakkarkara ka su na ndzang wa. Tsuwa da aɗi thlipa ata kəra zumzumkur ar su na kəcəkəcari ka su na ɗimi wa. Tsuwa da aɗi kətə Vir Ghərəmtaghəra arna ka daraja wa. Antə apani thləmi ku hilantədzi akwa nca ɗa.

²⁷Mji ol'ola na akwa tsa ku ndzi apa mwaɓəlayeri na akwa kukwahəmta mwaɓi tə da ngkəi. Da ana tsi mda ka pumta mamshi kamnyar ka da hara gənar dlərpəkur.

²⁸Naɓiyayeri arni ku ɗuwamta bikər ɗa apatə mda ana fəi dza mbwa ka həi mwapu. Da ana wulsur thlandər ka hara naɓikur na ar thlandər aka mji. Da ana pəla, ‘MTHLAKU na ka duna ta Shang akwa pəla,’ amma I na MTHLAKU aɗi gari ka da wa.

²⁹Mjir tsəɗi ana fəi mji ka thla laku. Da ana hara bwani aka mji na kula su ka mjir tursu, ka fəi mətəpiyayeri kula thlivəra.

³⁰I ku bara mda akwa nca ɗa na ata jaktə namtə məciɓə ni, ka tsa thləthlata akəmi ata vəya tsəɗi ni, kamnyar ta ɓdləmta tsəɗi ni. Amma I aɗi wutə mdə wala duku wa.

³¹Antə apani I ku pumta ɗəffə bwarbwarkurərna ata kəra ɗa. I ku mbamta ɗa akwa u'ur bwarbwarkur ɗəffi na ɓzə ni, ka ntəmta watsəɓər ɗimikur tə da hara ni. I na MTHLAKU na ka Duna ta Shang an pəla.”