Read bura-pabir Ezekiyel 23 Bible Online

Ezekiyel 23 - bura-pabir bible

Ezekiyel 23

²“Ɓzər mda, maɗankwi laga aɗi suɗa, natə mama' ɗa duku.

³Da ku hara karwakur sakatə da akwa Masar. Təng sakatə da tsu maɗankyar, antə da baɗitə hara karwakur ni. Anda antə mji ngkingkyaɓtə uwa ɗa, ka gyal ka mnya uwa ɗa, ka ngkyaɓtə kərathla ɗa, natə mdə sal aɗi na ku ɗar tsəkwarari wa.

⁴Thləma ngkwa na olari an Ohola, antə Oholiba an rakari. Da ku ndzi arna, antə da ku yaɓəla ali maɗashili kəga maɗankwi. Ata kəra thləma ɗa ni tsuwa, Ohola an Samariya, antə Oholiba an Urushalima.”

⁵“Tsa na Ohola ku ləkəma ka karwakur wala sakatə tsa ndzi arna ni, antə tsa ku ləkəma ka nggukə bangayeri arni na sojayeri ar Assiriya.

⁶Da ka ləptayeri arɗa lipəla. Gwamnayeri aɗi, ka mji ol'ola na mjir fəl taku. Shanga ɗa maɗadakwi na dakwi dakwi tə mda angguka.

⁷Antə tsa hamta kərni akwa karwakur ka shanga ɗa, watau mji shili na carcara ar tsəɗi Assiriya. Antə tsa ku diɓərantə kərni ka shanga haptayeri ar kəlara mdə tə tsa ku nggukta.

⁸Tsa aɗi zhar hara karwakurərni tə tsa tsəli ka harari təng ahar Masar ni wa. Kamnyar təng akwa sakar ɓzərngkwakurərni antə mji shili pi ka tsa, ka ngkingkyaɓ mnya uwari, ka kuri shanga nggukər ɗa ata tsa.

⁹Antə I hamta ni aka bangayeri na ahar Assiriya ni, natə tsa hir ɗa ka duna ni.

¹⁰Antə mji ngəni ku ntsui ni dura, ka dlutsə maɗa'ni shili ka mwanki, ka tsi ni ka katsakar. Sakatə mdə ku thlamta alari shariya ka ɗi ni apani ni, antə tsa ku ndzi sur ngkər akwa nca mwanki.”

¹¹“Ngkwarma'ni Oholiba ku wutə su ngəni. Amma wala apani tsa ku təramta ni akwa nggukər karwakur, natə har karwakurərni ku hara ɗimi ta ar ngkwarma'ni Ohola.

¹²Oholiba ku nu shilər Assiriya, watau gwamnayeri, ka mji ol'ola, ka mji na masəkur mpa na ka kari mpa ata dza ɗa, ka mjir fəl taku. Shanga ɗa maɗadakwi na dakwi dakwi tə mda angguka.

¹³Antə I wuta abbər tsa ku hilantə kərni tsu apa ngkwarma'ni ni. Japwa ɗa ku nutə laku duku.”

¹⁴“Amma Oholiba ku ləkəma ka karwakurərni ni. Tsa wutə dludzər mjir Babila tə mdə ɗahəta ka su mamza ata dza mbwa, ka nggukta.

¹⁵Ɗahə ni ncanta abbər da ka sur mbwadzi ata kusara ɗa, ka sur barkər ata kəra ɗa tə mdə pughəi mnyari abwahili, shanga ɗa apa mji ol'olər vəi kəthlər, kalkal ka surharar mjir Babila natə hwatu tsəɗiyir ɗa an Kaldiya.

¹⁶Təkəma tə tsa wutə ɗa təng tsa ngguktə ɗa, har tar tə tsa thlentə mji adzə ɗa ahar Babila.

¹⁷Antə mjir Babila ni ku si ka da pi ka tsa, ka hilantə ni ka ngguka ar shambarkur. Aghəla tə tsa ku hilantə kərni ka da, antə tsa baɗitə cikə ɗa ka duna.

¹⁸Sakatə tsa vəi kərni akwa hara karwakur ka mji ata bəbal, ka kəlar vəi durakurərni, antə I ku cikə ni, ka shinardzi kazhar ni, tsu apatə I shinardzi kazhar ngkwarma'ni.

¹⁹Amma wala apani tsa ku vəri vəri ləkəma ka karwakurərni ni, tsa akwa ɗangtə sakar ɓzərngkwakurərni tə tsa akwa hara karwakur akwa tsəɗi Masar.

²⁰Antə kamnyar nggukərni tsa ku ləkəma ka nu bangayeri arni, na ka sur ɗa apa ar kwara, ka yimərdza ɗa apa ar taku.”

²¹“Apani, ga ku bara ka gə hara adiyakur tə ga ana hara akwa ngkyarkurər nga, sakatə mjir Masar akwa ngkingkyaɓ mnya uwa ga, ka gyal ka uwar ɓzərngkwakur sakatə da tsu raka raka.”

²²“Kamnyar ngəni, Oholiba, I na MTHLAKU na ka Duna ta Shang akwa pəla, I ata hara ka bangayeri ar ngə ni nggəlar nga, mji tə gə shinardzi kazhar ɗa akwa cikə ɗa ni, I ata hara ka ɗəffa ɗa ɓza adzə nga, ka da kalaktə nga akwa kəlara bwa apa dawayeri.

²³Kamnyar mjir Babila, ka shanga mjir Kaldiya, ka mjir Pekod, ka Showa, ka Kowa, ata kəma duku ka shanga mjir Assiriya, ata nggəlar nga. Watau maɗadakwi na dakwi dakwi na ata hara ngguka aka mdə ni, ka gwamnayeri, ka shanga mji na ol'olər sojayeri, ka mji ol'olər tsəɗi, ka mji na masəkur mpa, shanga ɗa akwa si ata takwayeri.

²⁴Da ata thlata abwar yala, ka da sə pwa ata kəra ga ka sur mpa, ka wagənayeri ar taku, ka wagənayeri ar thla, ka sojayeri dlama dlama. Antə da ata kalaktə nga akwa kəlara bwa ka sur mpa, ka partauwayeri na raka raka ka na ol'ola, ka dzakwar mpa. Antə I ata hamta ala ɗa shariya ni, antə da ata ɗi nga kalkal ka su tə tsawur ɗa thlamta.

²⁵I ata pumta ɗəffi na ɓzə ni ata kəra ga, antə da ata ɗi nga akwa ɗəffə bwarbwarkurər ɗa. Da ata nthləmta kucira ga, kəga thləma ga. Antə mji na ku mbil ka mpika tsuwa mda ata kurəmta ɗa ka katsakar akwa mpa. Da ata fatə maɗa' nga shili ka maɗankwi, na ku mbil ka mpika akwa ga, ka da mbamta ɗa ata wula.

²⁶Da ata ntsui ləptər nga, ka fəi sur dəɓar nga na ɓɗakɓɗaku.

²⁷Apani antə I ata thləthlatə ka adiyakurər nga ka karwakurər nga, natə gə thlatə kəgari akwa tsəɗi Masar ni. Antə ga aɗi ata jaktə nggukə ɗa kəra wa, wala jaktə ɗangtə ɗa wa.”

²⁸“Kamnyar I na MTHLAKU na ka Duna ta Shanga akwa pəla, I ata hamta nga aka mji tə kəra ga aɗi hir wa, akwa tsiya mji tə ga ku cikə ɗa ka shinardzi kazhar ɗa.

²⁹Antə kamnyar tə da ku nggəlar nga da ata ngkərta ala gə su, ka da famnya shanga su tə gə ghəra akwa tsaptari, ka da zhar nga dura sul kula su, ka da zhar durakur ar karwakurər ngə ni ata bəbal. Adiyakurər nga ka karwakurər nga,

³⁰an sənta ala gə su ngəni ni, kamnyar ga ku hara karwakur ka mji zumzum, ka hilantə kər nga ka haptayeri arɗa.

³¹Ga ku nu halər ngkwarma'nga, antə I ata ɗi nga ka jili kwapər bwani duku ka tsa.

³²I na MTHLAKU na ka Duna ta Shang akwa pəla, “Ga ata sa su akwa kwapər ngkwarma' nga, kapər shariya na ka kutari bau ka zurang, mji ata hara ala gə kyartəkur ka kumshi nga, kamnyar tə kwapə ni ku nghyi ka duna.

³³Ga ata sari ka gə wika ka ɗəffə ɓzəɓza, kapər thlivəra ka hilhilkur, jili kapər shariya tə I hamta aka ngkwarma'nga Samariya.

³⁴Ga ata sari har ka tsa kur kwaktaku, ga ata ɓɗə kəthləmər kwapə ni, ka gə thləthluhtə uwa ga kəgari.” I na MTHLAKU na ka Duna ta Shang an pəla.

³⁵“Kamnyar ngəni antə I na MTHLAKU na ka Duna ta Shang akwa pəla, kamnyar tə ga ku fwari ata kəri, ka psəmta ra abwahila ga, to, ga ata ɗar bwani kamnyar adiyakur ka karwakur tə gə hara ni.”

³⁶Antə MTHLAKU pəla ali, “Ɓzər mda, ga an ata hara shariya aka Ohola ka Oholiba ya? Ncaɓəla ala ɗa bikər ɗa ar sur cika tə da hara ni ata bəbal.

³⁷Kamnyar da ku ləkə shilər mji, ka tsəgəi mji, antə mamshari ata tsiya ɗa. Da ku hara karwakur ka haptayeri arɗa, ka hara saɗaka ka maɗankyarər ɗa, maɗankyar tə da yaɓəla ali, tə da ndzi saɗakar susəma aka haptayeri arɗa.

³⁸Tsuwa aɗi an kura su tə da hara ali wa, kamnyar tsu akwa saka ndaga antə da diɓərantə Vəi na ɓɗakkarkara arna, ka hilantə Vir Ghərəmtaghəra natə I an vəi.

³⁹Sakatə da kuri hamta maɗa' ɗa saɗaka aka haptayeri arɗa, antə da ləkwa Vəi Ndzəndziyirna na Ɓɗakkarkara ka hilanta.

⁴⁰Da ku thlentə mjir thlentə ka da ra kəga ala ɗa mji shili akwa tsəɗi na ciju. Antə da ku si. Sakatə da ku si antə gə na Oholiba, ku pərəmta pəra, ka hau tozali akwa nca ga, ka dəɓamtadzi.

⁴¹Antə gə ndzəndzi ata kujara na ola na ka daraja. Akəma kujara ni tsuwa tebər aɗi tə mdə vəi, natə gə putə sur shiwura na msəra ka mal na arna.”

⁴²Antə I nggatə kuraka mji dlama dlama adzə ni akwa sa su ka kucali, ata kəma duku kəga mətəpiyayeri natə mdə səntə ni. Antə da putə surtsi ata wulya tsiya Oholiba ka ngkwarma'ni, ka tsangkər ala ɗa dzakwar kuthlikur na ɓɗak laga ata kəra ɗa.

⁴³Antə I pəla akwa ɗəffi abbər aiyi, mwala ngəni haləmta kərni akwa ləka ni, antə mji ngəni ata hara karwakur ka tsa! Təng tə an kəthlərərni!

⁴⁴Apani antə da ku pi ka tsa. Apatə mji ana pi ka karwayeri antə da pi ka mwanki ngəni adiya ni, watau Ohola ka Oholiba.

⁴⁵Amma mji na pwa an ata sə hara shariyar jirkur aka maɗankwi ngəni suɗə ni, ka psəmnya bikər ləka ka ar pumta mamshi tə da hara ni, kamnyar surharar ɗa ləka ka mjir pumta mamshi, antə tsiya ɗa ka mamshi.

⁴⁶“Kamnyar I na MTHLAKU na ka Duna ta Shang akwa pəla, I ata səntə sojayeri dlama dlama ata kəra ɗa, na ata hara ka da ndzi akwa thlivəra, ka tsuwa mji tə mda ata famnya sur ɗa.

⁴⁷Antə sojayeri na dlama dlama ni ata ndzəndzəhtə ɗa ka pela, ka da thləthlau ɗa ka katsakarayeri arɗa. Da ata tsəgəi maɗa' ɗa shili ka mwanki, ka mbagamta kəyayeri arɗa.

⁴⁸Apani I ata thləthlatə ka adiyakur akwa tsəɗi ni, kamnyar ka tsa ndzi surthlipa aka shanga mwanki, ta mwanki asə jaktə hara karwakur apatə da hara ni.

⁴⁹Tsuwa mda ata ntəmta watsəɓər ɗimikur tə giri hara ni ata kəra giri, ka giri ɗar bwani kamnyar bikər nu haptu tə giri hara ni. Apani antə giri ata sənda abbər, I an MTHLAKU na ka Duna ta Shang.”