Read bura-pabir Ezekiyel 24 Bible Online

Ezekiyel 24 - bura-pabir bible

Ezekiyel 24

¹Akwa vir na kumkur, ar thliya na kumkur ar məva na əmdləkur, antə MTHLAKU gari ali ka pəla,

²“Ɓzər mda, rəbutə thləma vir na ashina, vir na ashina ni, kamnyar ashina antə kuthlir Babila ata baɗitə kalaktə Urushalima ka mpa.

³Pəla karapu ngəni aka mjirna na ka kəra ɗa ɓəɓal ni abbər I na MTHLAKU na ka Duna ta Shang akwa pəla, “ ‘Kara vətə tughum ata u'u, ka gə pu yimi akwa.

⁴Ka gə pu ɗəvər kum tə mdə thləthlamta, shanga bwayeri na ɓɗakɓɗaku, ka gə carɓəla pathlahəu ka kiɗa, ka gə nghyantə tughum ni ka ɗethlayeri na carcara.

⁵Ka gə kəɓəla na ɓɗakta shang akwa ciɓa, ka gə pungkir gangər u'u akira tughum ni. Ka gə zhar kum ni ka tsa mbu swaiswai, ka tsa ɓwa shang kəga ɗethlayeri ni.’ ”

⁶Kamnyar ngəni I na MTHLAKU na ka Duna ta Shang akwa pəla, “Sha ku wutə bərni ngəni na ana pumta mamshi ni! Tsa an tughum na ka diɗi, natə diɗərni aɗi səɓəla akwa kutari wa! Ɗəmbəla shanga su na akwa kutari ni pal pal, ga aɗiya carcar wa.

⁷Kamnyar mamshi tə tsa pumta ni akwa kutari, tsa pumta ni ata bəbal ata pirakthlya. Tsa aɗi pumta ni ata di, ata vəi tə mda ata hartari ka bərbər wa.

⁸Tsa hara kamnyar thlentə hangkali, kamnyar kəi ntə dawa ata kər, antə I ku pumta mamshi tə tsa pumta ata bəbal ata pela, kamnyar ta mda ahartə ni.”

⁹Antə I na MTHLAKU na ka Duna ta Shang akwa pəla, “Sha ku wutə bərni na ana pumta mamshi! I ma I ata jakəngkər hangkur udzəm u'u ni.

¹⁰Tsaptə gangayeri, ka gə hatə u'u, ka gə ti kum ni ɓɗaku, ka gə paktə kari yaji akwa, ka mdə zhar ka ɗethlayeri ni mbamtadzi.

¹¹Ka gə vətə tughum na kula su akwa ni ata hakthlir u'u ni, ka mdə zhar ni ka tsa hara bwarbwar, har ka tughum əmzə ni ta mamza pitu, ka diɗərni juwamtadzi akwa kutari, ka vəi adiyakurərni mbamtadzi tuktukku.

¹²I ku ghərantə kərna gapani, kamnyar diɗərni ku nggəl ta ləɓəla, apani ka mdə pumta diɗərni ni akwa u'u!

¹³Shang ata kəra kəcəkəcəkur tə I hara ala gə ni, abbər ka gə kəcimtadzi kazhar adiyakur ni, ga aɗi kəcimtadzi wa. Antə ga aɗi ata jaktə kəcimtadzi kəra wa, tar ma sakatə I ku kuri pumta ɗəffi ata kəra ga.

¹⁴I na MTHLAKU ku pəla, saka akwa si tə I ata hara su ata kər. Tsuwa I aɗi ata pali su tə I ku ɗəmha akwa ɗəffi wa, I aɗi ata zharari wa, tsuwa I aɗi ata pali mnyi wa. I ata hara ala gə shariya kalkal ka halər nga ka suayeri tə gə hara. I na MTHLAKU na ka Duna ta Shang an pəla.”

¹⁵Antə MTHLAKU ku gari ali ka pəla,

¹⁶“Ɓzər mda, ata saka duku antə I ata kələmta mdə tə gə hirhira ta shang kazhar nga akwa məcikər nca. Amma diya ga aɗi ata tuwa wa, wala jikatuwa wa, wala pumta shimwi wa.

¹⁷Ga ata səsəkəi, amma ga aɗiya hir har ka mdə nggatə kuraka gə wa. Tsuwa ga aɗiya hara su tə mji ana hara akwa tuwa mshi wa. Ga aɗiya zhar kəra gə bwang wa, wala mwa kula ɓaɓi wa. Ga aɗiya vətə səlkum wa, wala kwasə ɗəvə tə mjir tuwa ana kwasə wa.”

¹⁸Antə ɗəɗəpa I ku gari aka mji apatə I na hara hwatu. Antə tahakər vir nda mwalankiya mta. Antə səɓəla ɗəpari ɗəɗəpa I ku hara tsu apatə mdə ku tsawa ali nda.

¹⁹Antə mji ni ku yu ra abbər, “Kamnyar mi tə ga akwa hara su apani ri? Ga aɗi ata pəla ala yeru karapur suayeri ngəni wa ya? Man tə ga akwa bara pəla ala yeru ri?”

²⁰Antə I pəla ala ɗa, “MTHLAKU ku gari ali ka pəla,

²¹kəi pəla ala giri na mjir Israila abbər tsa na MTHLAKU na ka Duna ta Shang pəla, ‘I ata hilantə Vəi Ndzəndziyirna na Ɓɗakkarkara, na an afər gayar giri, vəi na ɓɗakta shang ala giri, tə ɗəffa giri hirhir ta shang. Antə maɗa' giri shili ka mwanki natə giri zhari abwahili ni tsuwa, mda ata kurəmta ɗa akwa mpa.

²²Antə giri ata harari tsu apatə I ku hara. Giri aɗi ata vətə səlkum wa, wala kwasə ɗəvə tə mjir tuwa ana kwasə wa.

²³Giri aɗiya zhar kəra giri bwang wa, wala mwa kula ɓaɓi wa. Giri aɗiya tuwa wa, wala jikatuwa wa, amma giri ata hilantədzi kamnyar bikər giri, ka giri kəɗar nggyinggya, waskəi wa akwa nca giri.

²⁴Antə Ezekiyel ata ndzi ala giri surthlipa, shanga su tə tsa hara antə giri ata harari. Ma sakatə su ngəni ku hara antə giri ata sənda abbər I an MTHLAKU na ka Duna ta Shang.’ ”

²⁵“Antə ar nga, gə na ɓzər mda, ma vir tə I ku huzamta vəi ɗuwardzər ɗa kazhar ɗa, watau mbwar vəngkər səli na an sur kucali ka daraja arɗa, vəi na ɓɗakta shang ala ɗa, tə ɗəffa ɗa hirhir ta shang, ka famta maɗa' ɗa shili ka mwanki,

²⁶vir nda antə mdə na ku msərəmta ata sə sənta ala gə labar ata kər.

²⁷Vir nda antə mnya ga ata kəlardzi, ka gə gari aka mdə na hwi ka si ni. Tsuwa mnya ga aɗi ata jaktə ndzi dləɓdləɓari kəra wa. Antə ga ata ndzi surthlipa ala ɗa. Antə da ata sənda abbər I an MTHLAKU.”